Saulo naexasitpox Jesucristo
9
Saulo bʉxkofs-el thiyafʉlpox Jesucristo pejwʉajan naexasiti.
Samata,
fʉlaechon sacerdotespaklokolan poxade.
2 Sacerdotespaklokolanxot,
Saulo jʉm-aech:
“¡Nawelelde kaesʉapich carta xan xalaeliajwan Damasco paklowax poxade,
kaenanʉla judíos naewʉajnabachan tataefʉlpi itpaeliajwan japacartan!
¡Japacartantat natoꞌim xan jaxotde jaelaliajwan naexasiti Jesucristo pejwʉajan,
poejiw,
wathoꞌbej!
Japi jaelax wʉt,
ampalel,
Jerusalén paklowaxleldin,
bʉflaeyaxaelen jiw jebatat jeliajwas” —aech Saulo sacerdotespaklokolanliajwa.
Conversión de Saulo (Hechos 9.1-19)
3 Do jawʉt,
japacartan welels wʉt,
xalaechon Damasco paklowax poxade.
Japapaklowax mox wʉt,
chalechkal xabich itliakjala athʉsik japonxot.
4 Itliakjala wʉt,
Saulo jʉwal satadik.
Jawʉt jʉmtaenlison athʉsik jʉmtiskaspox.
Jʉmtison:
—Saulo,
Saulo,
¿ma-aech xotkat xan nachakifolam?
—tison.
5 Saulo wʉajnachaemt wʉt,
jʉm-aechon:
—Tajpaklon,
¿achanamkat xam?
—aechon.
Jʉmnoch wʉt,
jʉmtispon:
—Xan Jesús,
xam nachakifolamponan.
6 ¡Nande!
¡Fʉlaemch Damasco paklowax poxade!
Jaxotde asan aton xam jʉmchiyaxael isaxaelampoxliajwa —tis Saulo.
7 Saulo sʉapich,
foli,
japox xabich beljatas.
Aton pejjamekal jʉmtaenpi.
Pe chinax tae-eli aton,
naksiyapon.
8 Saulo nant wʉt,
natachaemt wʉt,
tae-elon,
itliakal xot.
Tae-el xot,
asew jiw makxafoson Damasco paklowax poxade.
9 Jaxotde paꞌa wʉt,
tres matkoi tae-elon.
Jawʉt chinax naxae-elbejpon.
Fe-elbejpon min.
10 Damasco paklowaxxot duk aton.
Japon pawʉl Ananías.
Japon chiekal naexasit Jesucristo pejwʉajan.
Ananías masoxtat jʉmtaen Jesús pejjame.
Jawʉt Jesús jʉm-aech Ananíasliajwa:
—¡Ananías!
—aechon.
Ananías jʉmnot wʉt,
jʉm-aechon:
—Tajpaklon,
xan ama amxotx —aechon.
11 Jesús jʉm-aech:
—¡Nande!
¡Xabʉaꞌde paklowaxlelde,
pawʉllel Matnochthialax!
Japathialaxxotde,
jaxotde Judas pejbaxot wʉajnachaemsaxaelam:
‘¿Amxotkatlap Saulo duk,
Tarso paklowaxpijin?’
—chiyaxaelam,
wʉajnachaemtam wʉt.
Amwʉtjel Saulo Dios kawʉajan.
12 Dios kawʉajan wʉt,
masoxtat xam taenpon.
Taenbejpon,
xam patampox japon dukxot.
Taenbejpon,
xam ke-otam wʉt japon pejtaꞌtat.
Do jawʉt,
pejme chiekal taenpon —aech Jesús Ananíasliajwa.
13 Ananías japox jʉmtaen wʉt Jesús jʉm-aechpox,
jawʉt jʉm-aechon:
—Tajpaklon,
xabich jiw nachapaei Sauloliajwa.
Wʉltaenxbejpon xabich babijaxan ispox xam nejwʉajan naexasitiliajwa Jerusalén paklowaxxot.
14 Japon ampalel toꞌanas sacerdotespaklochow,
puexa xam nejwʉajan naexasiti jaelaliajwa,
bʉflaeliajwabejpon jiw jeba poxade —aech Ananías Sauloliajwa.
15 Pe Jesús jʉm-aech:
—¡Xabʉaꞌde!
¡Wʉlwekde Saulo!
Xan japon makafitx tajwʉajan naewʉajnafʉlaliajwapon asajiw asatʉajnʉchanpijiw,
japi pejreyesbej,
Israel tʉajnʉpijiwbej.
16 Xan tajaxtat Saulo xabich nabijasaxael,
naewʉajan wʉton tajwʉajan judíos-eli —aech Jesús Ananíasliajwa.
17 Do jawʉt,
Ananías fʉlaech Saulo duk poxade.
Jaxot paꞌa wʉt,
ba lowpon.
Jawʉt,
ke-ot wʉt Saulo pejtaꞌtat,
jʉm-aechon:
—Takoewan Saulo,
wajpaklon Jesús,
japon taenampon,
jʉmtaenamponbej,
fʉlaeman wʉt nʉamtat,
japon xan natoꞌa pasliajwan xamxot.
Jasoxtat Jesús natoꞌa xam pejme chiekal taeliajwam,
Espíritu Santo xam kajachawaesfʉlaliajwabej —aech Ananías Sauloliajwa.
18 Do jawʉt,
Saulo pej-itfutxot koloeyax wejops,
me-ama baxibok,
jasox.
Do jawʉt,
Saulo pejme chiekal taen.
Nant wʉt,
bautisaslison.
19 Do jawʉt,
xael wʉt,
pejme chiekal pachaemlison.
Jawʉt Damasco paklowaxxot Saulo dukfʉk,
naexasiti Jesucristo pejwʉajan sʉapich,
kaematkoiyan sʉapichliajwa.
Saulo naewʉajanpox Jesucristo pejwʉajan Damasco paklowaxpijiw
20 Saulo tʉadut naewʉajnaliajwa Jesucristo pejwʉajan judíos naewʉajnabachanxot.
Naewʉajan wʉt,
jʉm-aechon:
“Jesús diachwʉajnakolax Dios paxʉlan” —aechon.
21 Japi jiw japox jʉmtaen wʉt,
xabich natachaemapi.
Nakaewa najʉm-aechi:
—Saulo majt Jerusalén paklowaxxot chakifol jaelaliajwa naexasiti Jesucristo pejwʉajan.
Japon chakifʉlaen amxot naexasiti Jesucristo pejwʉajan jaelaliajwa,
sacerdotespaklochowxot woeyaliajwa Jerusalén paklowaxxot —na-aech jiw nakaewa.
22 Saulo jiw naewʉajan wʉt Jesucristo pejwʉajan,
pejlewla-elon naewʉajan wʉt.
Chiekal naewʉajanbejpon Jesús diachwʉajnakolax Dios toꞌaspon jiw bʉꞌweliajwa.
Judíos,
japi duili Damasco paklowaxxot,
xajʉpa-el bʉxmalechaliajwapi Saulo naewʉajanpox.
Saulo wiapox judíosxot
23 Do jawʉx,
pin-iamatkoiyan wʉt,
Damasco paklowaxxot judíos nejchaxoel boesaliajwapi Saulo.
24 Pomatkoicha,
pomadoichabej,
Saulo wawech jiw nakakolaxot paklowaxxot boesaliajwas.
Japapaklowax tathoetlel iaꞌkal chaxxajajials.
Japox xabich daꞌnik.
Xabich athʉbejpox.
Saulo jʉmtaen jiw isaxaespox japonliajwa.
25 Madoi wʉt,
Saulo pejnachala chakakofnas canastatat xajajialslelsik tathoetlel.
Jatis wʉt,
Saulo wia.
Saulo apóstolesxotpox Jerusalén paklowaxxot
26 Saulo Jerusalén paklowaxxot pat wʉt,
naknatamejasiapon,
naexasiti Jesucristo pejwʉajan sʉapich.
Pe japi asbʉan jʉmch pejlewla japonliajwa.
Jʉmch nejchaxoeli japonliajwa:
“Saulo bej najiamjebej Jesucristo pejwʉajan naexasitpox” —aechi Sauloliajwa,
nejchaxoel wʉt.
27 Pe nakiowa,
Bernabé pejlewla-el Sauloliajwa.
Samata,
bʉflaechon Saulo apóstoles poxade,
japon chiekal matabijsliajwas apóstoles.
Bernabé bʉꞌpat wʉt Saulo apóstolesxot,
jawʉt jʉm-aechon japiliajwa:
“Saulo nʉamtat fol wʉt,
taenon Jesús.
Jʉmtaenbejpon,
Jesús jʉm-aech wʉt japonliajwa.
Do jawʉx,
Saulo Damasco paklowaxxot xabich pejlewla-el,
naewʉajnafʉl wʉton jiw Jesucristo pejwʉajan” —aech Bernabé.
28 Do ja-aech wʉt,
Saulo naman apóstolesxot dukaliajwa Jerusalén paklowaxxot.
Nanʉamtbejpon,
japi sʉapich.
Saulo naewʉajan wʉt jiw Jesucristo pejwʉajan,
xabich pejlewla-elon.
29 Saulo nospaei wʉt judíos sʉapich,
japi naksiyapi griegojame,
nabʉnlotbejpon japon naewʉajanpoxliajwa.
Samata,
japi Saulo boesax nejchaxoel.
30 Asew Jesús pejwʉajan naexasiti,
jʉmtaen wʉti Saulo boesaxaespox,
japi bʉflaech Saulo Cesarea paklowax poxade.
Jaxotde barkam duk fʉlaeyaxaelpox Tarso paklowax poxade.
Japabarkamtat Saulo toꞌas.
31 Do jawʉx,
Jesús pejwʉajan naexasiti,
Judea tʉajnʉpijiw,
Galilea tʉajnʉpijiwbej,
Samaria tʉajnʉpijiwbej,
chiekal duil wʉajanjilaxtat,
kaes chakifʉlae-esal xot.
Japi kaes Dios xanaboejafʉl kajachawaesfʉlaliajwas.
Japibej isfʉl Dios nejxasinkpoxan.
Do ja-aech wʉt,
kaes xabichfʉl naexasiti Jesucristo pejwʉajan,
Espíritu Santo kajachawaesfʉlas xot.
Pedro boejthʉtpox Jesucristo pijaxtat pawʉlpon Eneas
32 Pedro mathʉn paklowaxan taeliajwapon naexasiti Jesucristo pejwʉajan.
Jawʉt fʉlaechbejpon Lida paklowax poxade.
33 Jaxotde taenon aton.
Japon pawʉl Eneas.
Japon nabejkpox,
ocho waechanlisox.
Laejaxil xot,
okon fʉrbʉꞌtat.
34 Do jawʉt,
Pedro jʉm-aech japonliajwa:
—Eneas,
Jesucristo xam boejthʉsaxael.
¡Nande!
¡Najut nejfʉrbʉꞌ chaemde!
—aech Pedro.
Do jawʉt,
Eneas nancha,
chiekal boejthʉls xoton.
35 Puexa jaxot duili,
Lida paklowaxpijiw,
Sarón tʉajnʉpijiwbej,
taeni majt nabejkpon,
pachem wʉtlison.
Do jawʉt,
puexa japi naexasit Jesucristo pejwʉajan.
Do jawʉtbej,
japi jiw kofa padujnejchaxoelaxan.
Dorcas tʉp wʉt, Dios mat-echpox pejme dukaliajwa
36 Jope paklowaxxot pawis duk.
Naexasitow Jesucristo pejwʉajan.
Japow pawʉl Tabita.
Tabita —aech wʉt,
griegojametat,
Dorcas —chiyaxael.
Japow pomatkoicha is pachaempoxan asew jiwliajwa.
Jiw kejila kajachawaetbejpow.
37 Pedro Lida paklowaxxot wʉt,
Dorcas bʉꞌxaenk.
Bʉꞌxaenk wʉt,
tʉpow.
Dorcas tʉp wʉt,
pejjiw bʉꞌkiachpow,
me-ama japi pejkabʉan.
Do jawʉx,
athʉ piezaxxotse osas.
38 Jope paklowax mox Lida paklowaxxot.
Pedro japapaklowaxxot.
Naexasiti Jesucristo pejwʉajan,
japi wʉltaen Pedro Jope paklowaxxotpox.
Samata,
japixot kolenje toꞌas,
japi wʉljaesliajwa Pedro.
Paꞌa wʉti Pedroxot,
jʉm-aechi:
“¡Xabʉaꞌt!
¡Nabej nejthisleꞌ Jope paklowax poxade xanal nakfʉlaeliajwam!”
—aechi.
39 Do jawʉt,
Pedro nakfʉlaechlison japi.
Pedro paꞌa wʉt,
bʉꞌjulachaspon patʉpow osas poxase.
Jaxotse wathoꞌ,
pamaljiw naetʉpspi.
Japi wathoꞌ xabich wʉnow Dorcas.
Pedro low wʉt japapiezaxxot,
japi wathoꞌ masajiachpon.
Japi wathoꞌ itpaei Dorcas chaxduwspoxan,
chabʉꞌathowspoxanbej,
japow tʉpa-el wʉt.
40 Do jawʉt,
Pedro puexa japi jiw nakolax toꞌa.
Nakola wʉt,
Pedro brixtat nuk Dios kawʉajnaliajwa.
Jawʉt,
Pedro patʉpow natachaemt wʉt,
jʉm-aechon:
—Tabita,
¡najut mat-eꞌe!
—aech Pedro.
Do jawʉt,
patʉpow natachaemcha.
Taen wʉtow Pedro,
do jawʉt,
pajut mat-etbejpow.
41 Pedro japow makafit nansliajwa.
Do jawʉt,
japow nant.
Jawʉt Pedro la naexasiti Jesucristo pejwʉajan,
wathoꞌ pamal naetʉpspibej,
itpaeliajwapon Dorcas mat-echpox pejme dukaliajwa.
42 Puexa Jope paklowaxpijiw japox wʉltaena.
Samata,
japixot xabich jiw naexasit Jesucristo pejwʉajan.
43 Pedro namanfʉk pin-iamatkoiyan Jope paklowaxxot.
Pedro duk Simón pejbatat.
Japon Simón pakbʉꞌan chaemsan.