Pedro naewʉajanpox Cornelio pejbatat
10
Cornelio duk Cesarea paklowaxxot.
Japon soldawpaklon.
“Batallón Italiano” —tis japamʉtpijiw soldaw,
japi Italia tʉajnʉpijiw xot.
2 Cornelio xabich pachaempon.
Japon pijow,
paxi,
pamakjiw sʉapich,
japi Dios naexasit.
Jikajachawaeton judíos,
japi kejilpi.
Japon pomatkoicha Dios kawʉajan.
3 Asamatkoi,
a las tres wʉtlejen,
Cornelio masoxtat taen Dios pej-ángel,
pask wʉt japon pejbaxot.
Do jawʉt,
ángel jʉm-aech Cornelioliajwa:
—¡Cornelio!
—aechon.
4 Cornelio taen Dios pej-ángel.
Do jawʉt,
xabich pejlewlapon.
Jawʉtbej,
wʉajnachaemt wʉt,
jʉm-aechon:
—¿Achaxasiamkat?
—aech Cornelio.
Ángel jʉmnot wʉt,
jʉm-aechon:
—Xam kawʉajnampox Dios jʉmtaen.
Dios nejchachaemil xamliajwa,
kajachawaesfʉlam xot kejila.
5 ¡Ma amwʉt,
asew xamxot toꞌim Jope paklowax poxade japi wʉljaesliajwa Simón!
Japon asawʉl Pedro.
6 Simón duk pejwʉlxoelan pejbatat,
pakbʉꞌan chaemsan pejbatat.
Japon pejba ek marbabʉꞌtat —aech ángel.
7 Ángel japox bʉxtoet wʉt,
athʉ poxasepon nawiase.
Do jawʉt,
Cornelio kolenje pamakan lapon.
Labejpon kaen soldawan.
Japon soldawan naexasitbej Dios.
Japon soldawan chiekal isbejpon,
Cornelio toꞌa wʉt.
8 Dolisdoꞌ,
japi paꞌan wʉt Cornelioxot,
Cornelio japi chapaei puexa ángel jʉmtispox.
Do jawʉx,
japi toꞌapon Jope paklowax poxade,
wʉljaesliajwapi Pedro.
9 Kandiawa,
juimt matnoch ek wʉt,
japi mox fʉlaen wʉt Jope paklowax pasliajwa,
japi wʉajna,
Pedro julach ba matwʉajase,
najapnax poxase,
Dios kawʉajnaliajwa.
10 Jawʉt Pedro litaxaela.
Naxaeyax toejafa-elfʉk japonliajwa.
Do jawʉt,
Pedro masoxtat taen,
Dios kawʉajan wʉt.
11 Taenon athʉ fafachpox.
Taenbejpon pinjiyax,
me-ama sábanabʉꞌ,
fʉlaeflik wʉt satlelsik.
Japox sábanabʉꞌ,
me-ama nataelabʉxsumkʉs wʉt,
ja-aechox.
12 Japasábanatutat nejmachchoef nuil.
Jaxotbej jom,
papunibej.
13 Do jawʉt,
Pedro jʉmtaen jʉmtiskaspox athʉsik:
—Pedro,
¡nande!
¡Ampi choef bem xaeliajwam!
—tis Pedro.
14 Pedro jʉmnot wʉt,
jʉm-aechon:
—¡El,
paklon!
Xan choef chinax xae-enil chaemili,
me-ama ampi choef,
jasi,
tajwʉajnapijiw nakaechafiat xot,
babijax isasamatan xamliajwa —aech Pedro.
15 Pejme athʉsik jʉmtiskas Pedro:
—Dios jʉm-aech wʉt:
‘Pachaem xaeliajwa’ —aech wʉt,
¡japoxliajwa xam nabej jʉm-aecheꞌ:
‘Chaemil’ —nabej aecheꞌ!
—tis Pedro.
16 Pedro ketoꞌas tres veces japi choef beliajwapon,
xaeliajwabejpon.
Do jawʉt,
japasábana athʉ poxase chajulafʉl,
choef sʉapich.
17 Pedro xabich nejchaxoel,
masoxtat taen wʉt sábanabʉꞌ,
choef sʉapich.
Samata,
Pedro jʉm-aech,
nejchaxoel wʉt “¿Masoxkat Dios xan nachanaekabʉanasia,
taenx wʉt japox?”
—aech Pedro,
nejchaxoel wʉt.
Pedro japox nejchaxoel wʉtfʉk,
Cornelio pamak patlisi bafafatat.
Japi fʉlaen wʉtfʉk,
wʉajnachaemti jiw:
“¿Amxotkat Simón pejba ek,
pakbʉꞌan chaemsan pejba?”
—aechi.
18 Dolisi pat wʉti Simón pejbaxot,
pinjametat wʉajnachaemt wʉt,
jʉm-aechi:
“¿Ampabaxotkatlap Simón Pedro duk?”
—aechi.
19 Pedro nakiowa nejchaxoelfʉk japox ja-aechpoxliajwa bamatwʉajtatse.
Do jawʉt,
Espíritu Santo jʉm-aech Pedroliajwa:
“Tres aton pat.
Japi pat xam wʉljaesliajwa.
20 Samata,
¡nande!
¡Balaemik!
¡Japi nejmach nakfʉlaem!
Xan japi toꞌanax xot,
japi fʉlaen” —aech Espíritu Santo Pedroliajwa.
21 Pedro balaek wʉt,
jʉm-aechon paꞌanpiliajwa:
—Xanlap nawʉlwekamponan.
¿Ma-aech xotkat fʉlaeman?
—aech Pedro.
22 Japi jʉmnot wʉt,
jʉm-aechi:
—Xanal fʉlaenx,
tajpaklon Cornelio natoꞌa xot.
Tajpaklon,
japon soldawpaklon,
xabich pachaempon.
Japon Dios naexasitbej.
Judíos jʉm-aech wʉt japonliajwa,
jʉm-aechi chimiajamechan.
Puexa judíos nejxasinkasbejpon.
Kaeliw Dios pej-ángel jʉmtispon:
‘¡Asew xam toꞌim japi wʉljaesliajwa Pedro!
Japon paꞌan wʉt,
¡chiekal naeweꞌe japon xamal jʉmchiyaxaelpox!’
—aech Dios pej-ángel Cornelioliajwa —aechi Pedroliajwa.
23 Pedro japox jʉmtaen wʉt,
tapaeipon japi leliajwa ba.
Do jawʉt,
japabatat namapi kaemadoiliajwa.
Dolisdoꞌ,
kandiawa wʉt,
Pedro nakfol japi.
Asewbej,
naexasiti Jesucristo pejwʉajan,
Jope paklowaxpijiw,
japibej nakfoli Pedro.
24 Kandiawa wʉt,
Pedro paꞌa Cesarea paklowaxxot.
Japi wʉajna,
Cornelio,
pejjiwkola sʉapich,
pejnachala sʉapichbej,
tʉadut natamejax japon pejbatat.
Cornelio bʉꞌwʉajnawet pejjiw Pedro pejpasaxliajwa.
25 Pedro pat wʉt Cornelio pejbaxot,
Cornelio nakoldin bʉꞌkʉlsliajwapon Pedro.
Do jawʉt,
Cornelio brixtat nuk Pedro pejwʉajnalel,
sitaeyaxtat chiekal bʉꞌkʉlsliajwapon.
26 Pe Pedro makafit Cornelio nansliajwa.
Jawʉt Pedro jʉm-aech:
—¡Nande!
¡Tajwʉajnalel xam brixtat nabej nukeꞌ!
Xan atonan.
Me-ama xam,
ja-an xan —aech Pedro Cornelioliajwa.
27 Pedro japox jʉm-aech wʉt Cornelioliajwa,
japi lowlisi Cornelio pejba.
Jaxot Pedro xabich jiw taen,
japi wʉajna natamejapi.
28 Do jawʉt,
Pedro jʉm-aech:
—Xamal chiekal matabijam.
Tajwʉajnapijiw chajia lelox tapae-el nachalaliajwan,
judíos-elpi sʉapich.
Xanal natapae-elbej leliajwan judíos-eli pejbachanxot.
Japoxan xanal judíos tajkabʉan.
Pe amwʉtjel xan matabijtax Dios nafias-el japoxanliajwa.
29 Samata,
namak nawʉljaet wʉt,
asax pae-enil japiliajwa:
‘Xan fʉlaeyaxinil’ —chi-enil.
Kamta nakfolx japi.
Ma amwʉt matabijsasian,
ma-aechxotkat nawʉljaeti —aech Pedro,
natamejapiliajwa Cornelio pejbatat.
30 Cornelio jʉmnot wʉt,
jʉm-aechon:
—Cuatro matkoilisox Dios kawʉajnaxpox tajbatat kaliax,
ampahora wʉtlejen.
Chalechkal natulaelt wʉt,
me-ama aton,
jason,
japon najʉm-aech.
Naxoelox xabich itliak.
31 Japon najʉm-aech:
‘Cornelio,
xam kawʉajnampox Dios jʉmtaen.
Dios nejkiowa-el xam kajachawaesfʉlampox kejila.
32 Samata,
¡toꞌim namak Jope paklowax poxade bʉflaeliajwadini Simón!
Japon asawʉl Pedro.
Japon duk pejwʉlxoelan pejbatat,
pakbʉꞌan chaemsan pejbaxot.
Japon pejba ek mox marbabʉꞌtat’ —na-aech ángel.
33 Samata,
tamak kamta toꞌax xam wʉlwekaliajwapi.
Xam isam pachaempox tajjiwliajwa,
nakfʉlaeman xot.
Amwʉtjel xanal natamejlax Diosliajwa.
Xanal puexa jʉmtaesian xam Dios bʉxtoꞌapoxan xanal nanaewʉajnaliajwam —aech Cornelio Pedroliajwa.
Pedro naewʉajanpox jiw Cornelio pejbaxot
34 Dolisdoꞌ,
Pedro tʉadut wʉt jiw naewʉajnaliajwa,
jʉm-aechon:
—Amwʉtjel ampox matabijtax.
Diachwʉajnakolax,
Dios jiw taen wʉt,
pothatapijiw puexa chiekal najʉpataenpon.
35 Dios natxasisla-ele-el pothatapijiw,
japi itpaei sitaeyax Diosliajwa,
ispibej pachaempoxan.
36 Xamal matabijam Dios xatoꞌa chimiawʉajan,
Jesucristo pejwʉajan,
xanal israelitasliajwan Dios nabeltaeliajwa,
isx wʉt babijaxan.
Japon Jesucristo,
paklokolan puexa jiwliajwa.
37 Xamal chiekal matabijambej Jesús ispoxan judíosliajwa japi pejtʉajnʉchantat.
Juan,
jiw bautisan,
naewʉajnafʉl wʉt,
japon jiw bautisafʉlbej.
Japamatkoiyan Jesús ispoxan tʉadut Galilea tʉajnʉxot.
38 Xamal chiekal matabijambej,
Dios chaxdut Jesúsliajwa,
japon Nazaret paklowaxpijin,
Espíritu Santo.
Dios chaxdutbej pejpamamax Jesúsliajwa.
Samata,
Jesús isfʉl pachaempoxan jiwliajwa.
Boejthʉsfʉlbejpon jiw,
nabijati Satanás pijaxtat.
Diachwʉajnakolax Jesús xajʉp japoxan isfʉlaliajwa,
chalas xoton Dios.
39 Xanal taenx Jesús isfʉlpoxan Jerusalén paklowaxxot,
Judea tʉajnʉxot.
Do jawʉx,
asajiw Jesús kematamatlas cruztat tʉpaliajwa.
40-41 Jesús tʉp wʉt,
tres matkoi wʉt,
Dios mat-echpon pejme dukaliajwa.
Do jawʉx,
xanalxot natulaelton.
Asew jiwxot natulaels-elon.
Dios chajia xanal namakanot,
asamatkoi Jesús taeliajwan,
mat-ech wʉton,
pejme duk wʉt.
Samata,
Jesús xanalxot natulaelt,
mat-ech wʉton.
Do jawʉt,
xanal xaelx,
Jesús sʉapich.
Afxbej.
42 Jesús nabʉxtoꞌa xanal jiw naewʉajnaliajwan Dios wʉlduwpox Jesús juezliajwa.
Asamatkoi japon jiw babejchow pejlel diajkaxael.
Diajkaxaelbejpon pejlel jiw pachaempi.
Jachiyaxaelon jiw laelpiliajwa,
jiw tʉpiliajwabej.
43 Puexa profetas chajia jʉm-aechi Jesús pasaxaelpoxliajwa ampathatat.
Japi jʉm-aechbej:
‘Jiw naexasisaxaelpi japon,
japi Dios beltaeyaxaes babijaxan ispoxanliajwa’ —aechbej profetas,
chajia jʉm-aech wʉt —aech Pedro,
jiw naewʉajan wʉt Cornelio pejbatat.
Judíos-elpi pejmatpʉatanxot paskpox Espíritu Santo
44 Pedro naewʉajan wʉtfʉk,
jawʉt Espíritu Santo pask,
Pedro naewʉajanpox naeweti pejmatpʉatanxotsik.
45 Judíos,
pati,
Pedro sʉapich,
japi chajia naexasiti Jesucristo pejwʉajan.
Japi xabich nejchaxoelanuil,
taen wʉti Espíritu Santo paskpox judíos-eli pejmatpʉatanxotsik.
46 Japi matabija Espíritu Santo paskpox,
naksiya xoti asajamechan,
majt naksiya-eljamechan,
japi jʉm-aechfʉl xotbej Diosliajwa:
“Xam xabich pachaemam” —aechfʉl xoti Diosliajwa.
47 Samata,
Pedro jʉm-aech,
japon sʉapich,
patpi jʉmtaeliajwa:
“Espíritu Santo fʉloek Cornelioxotsik,
pejjiwxotsikbej.
Me-ama xatisliajwa,
jatisbej judíos-elpiliajwa.
Samata,
japi jiw bautisas wʉt,
xatis elchiyaxisal” —aech Pedro.
48 Samata,
Pedro toꞌa Cornelio,
pejjiw sʉapich,
bautisaliajwas Jesucristo pejwʉltat.
Do jawʉt,
japi jiw fiati Pedro namanaliajwa kaematkoi sʉapich japixot.