Ume Chileke yẹle ume Oshifutuswe
4
Ndu mu yeru obu;
t'ọ bọ bụ-zhiakwawho ndu sụru lẹ Ume Chileke bu whẹ l'ẹhu;
bụ whẹ kfujee okfu,
unu ekweta l'ọo ezhi-okfu.
Unu dalejeekwa iya adale t'unu marụ:
?Ume ọbu bụdu nụ Ume Chileke?
L'o nwekwaru ndu wụfutaru dzuru mgboko ntaa.
Iwhe ndu ono l'anọje ekfu l'abụkotaje ejire bẹ whẹ l'anọje adzụshi;
whẹ asụ lẹ whẹ l'ekfuchiru Chileke.
2 Sụa,
unu lekwa g'unu l'e-shije marụ Ume ọwhu shi l'ẹka Chileke ndọwa:
Iwhe bụ onye kfuzhiwaru l'edzudzu-ọha sụ l'ọ bụa ezhi-okfu lẹ Jisọsu Kuráyisutu byarụ-a lẹ mgboko-o bya abụru madzụ,
unu amarụ lẹ Ume,
bu onye ono l'ẹhu bẹ bụa Ume,
shi l'ẹka Chileke.
3 Iwhe bụ onye l'ete ekweje ekfu lẹ Jisọsu Kuráyisutu byarụ-a;
bya abụru madzụ l'ezhi lẹ mgboko-o,
unu amalẹruwho lẹ Ume,
bu onye ono l'ẹhu te eshidu l'ẹka Chileke.
Ume,
bu ẹgube onye ono l'ẹhu bụ Ume nke onye ono,
bụ ọ-chi-nta Kuráyisutu.
?Mbẹ unu nụwaru-a lẹ ọ-chi-nta ono l'e-be bya?
Ọ byaakwaru.
Ọ nọokwa anọ lẹ mgboko-o.
4 Ọle-a,
ụnwu mu,
unubẹdua shikwa lẹ Chileke.
Ndu ono,
l'adzụshi ejire ono lẹ whẹ l'ekfuchiru Chileke bẹ unu lwugbuakwaru.
O noo lẹ Ume nke Chileke ono,
bu unu l'ẹhu bẹ kakwa ume nke ọ-chị-nta Kuráyisutu ono,
bụ iya l'achị mgboko-o ọkpehu.
5 Sụa,
ndu ono,
l'anọje adzụshi ejire ono lẹ whẹ bụ ndu nkfuchiru Chileke bẹ shikwa lẹ mgboko-o.
Ọo ya bụ l'iwhe whẹ l'anọje ekfu bẹ shi l'ọriri ndu nke mgboko-o.
Ọ bụru iwhe ono meru ndiwhe l'anọje azụru whẹ mgbede l'ọo nke whẹ bụ iya.
6 Anyịbedua bụ nke Chileke.
Ọ bụru ndu marụ Chileke bẹ l'ekweje lẹ nke anyi bụ iya.
Ndu l'ẹte abụa nke Chileke te ekwejekwa l'ọ dụ iwhe nke anyi bụ.
O nokwa g'anyi l'egudeje marweta ume,
bụ l'ẹhu onye l'ekfu ọkpobe-okfu mẹe ume ọwhu bu l'ẹhu onye l'adzụ ejire.
Chileke bụ oye obu
7 Ndu mu yeru obu,
unu t'anyi tụko ye ibe anyi obu;
l'oye obu bẹ shikwa l'ẹka Chileke,
mbụ l'onye yeru ibe iya obu bẹ bụkwa onye Chileke nwụru;
ọ bụkwaruwho onye marụ Chileke.
8 Onye l'ete eyee ibe iya obu ta amakwa Chileke;
o noo lẹ Chileke l'onwiya bụ oye obu.
9 Gẹ Chileke gude goshibe lẹ ya yenukaru anyi obu bụ l'o zhiru Nwa lanụ,
ọ nwụru kpụ t'ọ bya lẹ mgboko-o nggẹ anyi shi iya l'ẹka nọdu ndzụ.
10 Ẹka oye obu ọwa gude swịa iche bụ l'ọ tọ bụdu l'ọo anyịbedua yeru Chileke obu;
ọo Chileke goshichiaru l'ọo yẹbedua yeru anyi obu.
G'o gude goshi iya bụ l'o yeru Nwa iya t'ọ bya egude onwiya gbaa ẹja ọha gude gbafụ iwhe-dụ-ẹji,
anyi metagbaberu.
11 Ndu mu yeru obu;
eshi-ọwhu Chileke yeberu anyi obu nno,
b'ọ gbarụ nke t'onyenọnu yekwawho ibe iya obu lẹge anyi ha.
12 Ọ tọ dụkwa onye whụjebuwaru Chileke,
ọle-a;
anyi -yewaa ibe anyi obu;
ọo ya bụ Chileke ebukwanuru anyi eburu l'ẹhu;
tẹmenu oye obu Chileke edzukwaawho oke l'ẹhu anyi.
13 Lẹ Chileke nụkwaru anyi Ume nkiya gẹdegede;
ọ kwa Ume ono,
ọ nụru anyi ono bẹ meru g'o gude anyi marụ lẹ yẹbe Chileke bu ebu l'ime anyi;
anyịbedua bukwaruwho l'ime Chileke.
14 Anyi whụakwaruwho l'ẹnya;
anyi kfuakwaru iya madzụ lile sụ lẹ Nna yeru Nwa iya t'ọ bya abụru Onye Ndzọta l'adzọje ndiwhe.
15 Ọo ya bụ l'onye duzhiwaa ike kfụru l'edzudzu-ọha;
kfua lẹ Jisọsu bụ Nwa Chileke b'a malẹruwho lẹ Chileke buwa iya ebu l'ẹhu;
onye ọbu bukwaru Chileke l'ẹhu.
16 Sụa,
anyi makwarụ-a lẹ Chileke yeru anyi obu;
anyi wowaru onwanyị ye iya l'ẹka nkele anyi kwetaru l'ọo ezhi-okfu l'o yeru anyi obu.
Chileke bụ oye obu l'onwiya.
Ọo ya bụ l'onye gude oye obu buru,
bẹ buwaa ebu l'ime Chileke;
Chileke bukwaruwho l'ime onye ọbu.
17 Iwhe l'e-goshi l'oye obu dzuru oke l'ẹhu anyi bụ l'obu l'e-shihu anyi ike mbọku ikpe ono.
O noo l'ọo gẹ ndzụ Kuráyisutu dụ bụ gẹ ndzụ anyi dụkwawho lẹ mgboko-o.
18 Onye yeru onye ọdo obu ta adụhekwa iwhe l'ọotsu onye ono egvu iya.
Oye obu ọwhu bụ ọkpobe iya l'egbejekwaa chiwhua iwhe bụ-zhia ntsụ-megvu g'ọ ha.
O noo l'ọ -bụru lẹ madzụ l'eme iwhe ọtsu-egvu ọtsu-egvu;
ọ kwa iya bụ l'ọ marụ l'aa-nụ iya awhụ.
Ọ kwa iya bụ l'onye ono bẹ oye obu ọwhu o yeru te edzudu oke.
19 Anyi yeru Chileke obu nkele o vu ụzo ye anyi obu.
20 Nteke ọ -bụ lẹ madzụ bẹ nwanna iya dụ ashị;
onye ono sụkwanu lẹ ya yeru Chileke obu;
ọ kwa ejire bẹ onye ono l'adzụ.
?Ndẹnu g'ọ bụ onye yẹle iya bụ nwanna,
bụ onye l'oole l'ẹnya bẹ l'ooto yedua obu;
ya abụ-chiaru Chileke,
l'ọoto whụa l'ẹnya bẹ l'oogbechia je eye obu.
21 Jisọsu l'onwiya tụkwaru iwu-a sụ t'onye yeru Chileke obu;
yekwawho nwanna iya obu.
O noo bụru iwu ọwhu ọ tụru anyi l'onwiya.