Ẹkwo-Ozhi Nke Ẹbo,
PYITA
Deru
1
Ẹkwo-ozhi-a bẹ shi l'ẹka mbẹdua,
bụ Sáyịmonu Pyita,
mbụ mụbe onye l'ejeru Jisọsu Kuráyisutu ozhi,
tẹmenu mu bụkwaruwho onye-ishi-ozhi iya.
Ndu mu l'ede iya anụ bẹ bụ unubẹ ndu ono,
kwetaru woru onwunu ye Chileke l'ẹka lẹge anyịbedua l'ishi onwanyị kwetakwaruwho.
Ekwekwe ono,
anyi g'anyi ha kweru bẹ shi l'ẹka Jisọsu Kuráyisutu,
onye bụ iya bụ Chileke anyi,
ọ bụkwaru iya whọ bụ Onye Ndzọta anyi.
Ọ kwa l'ọ bụnuka onye obu-ọma meru g'o gude o kweta t'anyi l'unu tụko kwetakota nkiya ishi nhamụnha.
2 Mu l'ekfukwa tẹ Chileke mee t'unu kabaa ọma yẹbe Chileke ono,
ya emekwaawho t'unu kabaa ọma Onye-nwe-anyi,
bụ Jisọsu,
marụ iya ọkpobe amama eje eje.
Nggẹ eze-iwhe-ọma mẹe ẹhu ọdu guu erwube unu ẹka,
rwube iya unu nke anyịnyi.
Chileke kuru unu; họta unu
3 Anyi marwetaru Onye-Nwe-Ọha ono ree-ree-ree,
mbụ onye ono,
bụ iya kuru anyi t'anyi bya t'anyi lẹ ya gba mgba l'ọdu-biribiri iya mẹe l'iwhe ọma,
l'ọonoje emegbabe.
Ọo l'amama ono,
anyi marụ iya bẹ Chileke shi gude eze ike nkiya,
nụ anyi iwhe lile,
mkpa iya dụ anyi;
t'anyi gude nọduru yẹbe Chileke ndzụ;
anyi emekwawho umere,
l'egoshi l'anyi l'akwabẹ iya ugvu.
4 Ọo eze ike iya ono b'o gudekwawho kweshia anyi ụkwa iwhe dụkota ree ọkpobe adụdu,
mbụ iwhe ono karikwaruwho gẹ l'aa-nọ atụ ọnu iya,
ọ kwanụ iya bụ nke ọwhu unu l'e-kwobekwanu iswi ụkwa iwhe ono,
o kweshiru anyi gbẹe azụ l'omebyishi onwonye ono,
ndu mgboko-o l'emebyishi onwowhe.
Iwhe mekwaru iya bụkwaru lẹ whẹ l'etso ẹgu ejo iwhe l'anọje agụgbabe whẹ nụ.
Unu kwobekwawho nke iwhe ono,
o kweru unu ụkwa iya ono t'unu lẹ Chileke ono gba mgba meje umere ọma ono,
l'oome.
5 Ọo ya bụ,
t'unu kebeje ẹhu sebaje t'unu meje umere ọma;
yekobe l'anọdu ono,
unu nọduwaa Chileke l'ẹka.
Iwhe ọdo,
unu l'e-mekwaruwho eyekobe l'umere ọma ono,
unu l'eme abụru anọ anwụ g'unu l'e-shi kabaa ọma Chileke,
unu anwụkwawho ome iwhe ọ sụru t'unu mee.
6 Iwhe ọdo,
unu l'e-yekobefua l'amama ono,
unu marụ Chileke abụru esede,
unu l'e-sedeje onwunu.
Iwhe ọdo,
unu l'e-yekwa l'osede onwunu ono abụru ọtaru iwhe nshi;
iwhe l'a-nọ etso ọta-nshi ono abụru ugvu,
unu l'a-nọ akwabẹ Chileke.
7 Unu l'akwabẹ Chileke ugvu ono,
t'unu hejekwa onwunu l'unu bụkwa ụnwunna,
tụkoru nọdu Kuráyisutu l'ẹka.
Iwhe ọdo,
unu l'e-yekobe l'oye ụnwunna obu bụ eyewaro madzụ lile obu.
8 Ọ -bụru whọ l'unu l'eme ẹgube umere ono,
mbụ unu l'emezhiwa iya eje l'iwhu bẹ unu l'ẹte abụkwaa ọ-ga-lẹ-mkpa madzụ whẹ.
Ọo ya bụ l'unu l'a-nọlewho akabaa ọma Onye-nwe-anyi Jisọsu Kuráyisutu aka eje eje.
9 Ọle-a,
ọ -bụkwaru l'o nweru onye woru onwiya ye Kuráyisutu l'ẹka,
iwhe lile ono teke erwubee ya ẹka,
onye ono dụkwa g'ọo onye l'atsọ ishi,
mbụ ọlewho l'onye ono ta awhụdu ụzo ilile.
Onye ono bẹ gbẹwanu nyazọwanu l'ọo Jisọsu bẹ sachafụkotaru iya iwhe-dụ-ẹji ono g'ọ ha,
onye ono metakotaru kpua onwiya nteke ono,
l'ooto wooru onwiya ye Kuráyisutu l'ẹka.
10 Ọo ya bụ ụnwunna mu;
ọ kwa unu bụ ndu Chileke kuru,
họta unu t'unu bụru ụnwu iya.
O noo iwhe unu l'e-kwobe kebezhiawho ẹhu eseba t'unu gude umere unu goshi l'unu bụwhoo ụnwu iya l'ezhi.
Lẹ nteke unu l'emewaa iwhe dụ-gee nno bẹ unu l'ẹte abyakwaa l'e-shiswe ụzo.
11 Unu l'emewaa nno,
ta adụhe-zhikwaa iwhe bya l'anọ-chi unu ụzo t'unu ba abahụshi l'ẹka Onye-Nwe-Ọha,
bụ Jisọsu Kuráyisutu bụ eze tututu-mịmimi,
mbụ Jisọsu Kuráyisutu ono bụ iya bụ Onye Ndzọta anyi.
12 O noo iwhe meru mu je l'anọjelewho anyatajẹru unu iwhe lile ono.
Mu makwarụ-a l'unu makọtahawaru iya;
tẹmenu unu kfụkwaruwho kfụshia ike l'ọkpobe-okfu ono,
e zhiru unu.
13 Mu l'arị l'ọ ka mma tẹ mu nyatakọtaru unu iwhe lile ono ntaa,
mu nọkwadu ndzụ;
gude gbẹe unu ọkpu-ike.
14 O noo lẹ mu marụ-a l'o to nwehedu gẹ mu l'anọ-bekwadu ntaa;
mu alashia,
o noo lẹ Onye-Nwe-Ọha,
bụ Jisọsu Kuráyisutu bẹ goshiwaru mu l'o rwuwaru mu l'alala.
15 Mu l'e-kebeshizhiawho ẹhu ike anyatajẹru iya unu nke ọwhu unu l'ẹte abyaa l'anyazọ iya anyazọ,
mbụ lụfu-gee lụfu lẹ nteke mu l'a-lashiwaa.
Ndu gude ẹnya whụa ugvu, Chileke kwabẹru Kuráyisutu
16 Lẹ nteke anyi l'ezhi unu nke ike Jisọsu Kuráyisutu ono,
bụ Onye-nwe-anyi,
mbụ nke ike ono,
l'oo-gude bya ọdo,
bẹ l'ọoto bụkwa akọ-iwhe,
madzụ rịtaru l'ọriri iya bẹ anyi kọru unu.
L'anyịbedua l'ishi onwanyị bẹ gudekwa ẹnya anyi whụa ọdu-biribiri iya.
17-18 Ọo nteke anyi l'iya tụkoru nọdu l'eli ugvu ono,
Chileke họtaru,
bẹ bụ l'ẹka ono bẹ Chileke,
bụ Nna goshiru anyi ogbu-zaazaa iwhoro nkiya,
bụkwanu iwhe o gude kwabẹ Jisọsu ugvu.
Iwhe ono bẹ meru nteke Chileke,
bụ onye ike iya mẹe biribiri iya kangokotaru iwhe lile sụru iya:
“Onye ọwa bụ Nwa iya nwoke,
ya yeru iya obu shii.
Ọo ya bụ onye l'emeje iwhe dụ iya ree shinene.”
Mbụ anyi nụkwaa olu ono,
shi l'imigwe kfua iwhe ono.
19 O nokwa iwhe meru anyi kabaa okweshi ike;
l'iwhe lile ono,
ndu nkfuchiru Chileke kfuru bẹ bụkota ọkpobe-okfu g'ọ ha.
Unu ngabẹjekwa nchị mee iwhe whẹ kfuru;
l'ọ kwa unu l'eme iya;
bụ l'unu l'eme ree.
O noo l'ozhi whẹ ono bụ iwhoro l'echi lẹ mgboko-o,
iwhe-dụ-ẹji meru;
ọ gbakọta tsụrikiti-a.
Iwhoro ono l'a-nọ-zhiawho echi jeye chi-asahu;
Kuráyisutu abya ọdo.
Kuráyisutu ono l'a-dụ-zhiawho g'ọo kpokponde mbọ-muchi,
l'anọje echi whorowhoro jeye chi-asahu.
Oo-me iwhoro iya ono;
ya angashịa l'ime obu unu.
20 Ọwhu kagezhia,
bụ ọwhu unu l'a-mazhiadanu bụ l'ọ tọ dụkwa onye fụru nke egude uche nke ẹka iya marụ iwhe iwhe ono,
ndu nkfuchiru Chileke deru l'ẹkwo Okfu Chileke bụ.
21 Iwhe meru ọ dụ nno bụkwaru l'ozhi ono,
ndu nkfuchiru Chileke shi anọje ezhi lẹ ndụ-ichee ta abụdu iwhe whẹ rịtaleruwho l'uche whẹ.
Ọo Ume-Dụ-Nsọ bẹ l'edu whẹ tẹ whẹ kfua okfu,
shi Chileke l'ẹka.