Anyi bụ ụnwu, Chileke nwụru
3
Unu whụwaru-a gẹ Chileke,
bụ Nna yetaberu anyi obu nke t'o ku anyi ụnwu iya,
mbụ ọ bụkwaru ụnwu iya ọbu bẹ anyi bụ.
Iwhe meru ndiwhe ta ama anyi bụ lẹ whẹ ta amadụ iya.
2 Ndu mu yeru obu;
lẹ ntaa bẹ anyi bụakwa ụnwu Chileke.
Iwhe anyi l'e-be bụru tẹke afụtakwaa iwhoro,
ọle iwhe ọwhu anyi maberu bụ lẹ nteke Kuráyisutu l'a-bya bẹ anyi l'a-dụ-zhiawho g'ọ dụ;
o noo l'ọolewho g'ọ dụ bụ gẹ l'ọo-dụ anyi awhụ iya.
3 Ọo ya bụ l'onye nọ Jisọsu l'ẹka ele ẹnya abyabya iya ono;
t'onye ono bụkwaru onye l'anọje eme tẹ mmerwu ba adụ iya l'ẹhu;
lẹ Jisọsu ọbu l'onwiya ta adụkwa mmerwu dụ iya l'ẹhu.
4 Iwhe bụ onye l'eme iwhe-dụ-ẹji bẹ ikpe nmaakwarụ l'onye ono bụ onye l'emebyi iwu Chileke;
o noo l'ome iwhe-dụ-ẹji,
bụhukwawho omebyi iwu Chileke.
5 Unu marụ-a l'ọo Kuráyisutu ọbu bẹ byarụ tẹ ya bya asafụ madzụ iwhe-dụ-ẹji,
dụ madzụ l'ẹhu;
tẹmenu Kuráyisutu ono l'onwiya ta adụkwa iwhe-dụ-ẹji,
dụ iya l'ẹhu.
6 O to nwekwa onye yẹle Kuráyisutu tụgbaru bụru nnanụ l'emejekwadu iwhe-dụ-ẹji;
tọ dụhunu onye l'eme iwhe-dụ-ẹji whụjeru iya nụ;
ọwhu ọ bụroo onye l'ekfu nke l'ọ marụ iya.
7 Ụnwu mu;
t'unu be ekwekwa t'o nweru onye l'a-kwawhu unu ẹnya;
duwhua unu l'iwhe nke Kuráyisutu.
Onye l'eme iwhe dụ chịriri bẹ bụkwa onye dụ chịriri lẹge Kuráyisutu bụkwawho onye dụ chịriri.
8 Onye l'eme iwhe-dụ-ẹji bụkwa nke Oshifutuswe;
o noo lẹ Oshifutuswe l'anọje emeswe Chileke eshi mbụlembu.
Iwhe Nwa Chileke byaturu bụkwa tẹ ya mebyishia iwhe Oshifutuswe l'emeje.
9 Onye bụ onye Chileke nwụru te emejehedu iwhe-dụ-ẹji;
o noo lẹ Ume Chileke l'emewaa ire l'ẹhu onye ono.
Onye ono ta afụhedu mee iwhe-dụ-ẹji ọdo;
eshi-ọwhu ọ bụwaa Chileke nwụru iya.
10 Ọ waa gẹ l'ee-gude marụ ndu bụ whẹ bụ ụnwu Chileke mẹe ndu ọwhu bụ ụnwu nke Oshifutuswe.
Onye l'ete eme iwhe l'ụzo,
dụ chịriri te eshikwa lẹ Chileke.
Onye l'ete eyee nwanna iya obu te eshikwawho lẹ Chileke.
Oye ibe onye obu
11 Unu makwarụ-a l'ozhi-ọma ono,
e shi eshi mbụlembu ono zhita unu bụ t'anyi ye ibe anyi obu.
12 T'anyi ba adụkwa g'ọo Kenu.
Lẹ Kenu bẹ nọkwa l'ẹka onye ejo-ụboku-ono,
bụ Oshifutuswe gbua nwune iya.
Sụa,
?ọo gụnu kpatarụ o gbua nwune iya ono?
Iwhe kparụ iya nụ bụ lẹ Kenu ọbu l'onwiya bẹ umere iya dụ ẹji;
umere nke nwune iya dụ chịriri.
13 Ụnwunna mu;
t'ọ bọ dụjekwa unu biribiri l'unu dụ ndiwhe ashị.
14 Iwhe ka anyi odo ẹnya bụ l'anyi shi nwụhu anwụhu,
ọle anyi shiwaa l'anwụhu ono fụtawaa bahụwaa lẹ ndzụ.
Iwhe mekwanuru anyi marụ l'o noo g'ọ dụ bụru l'anyi yeru ụnwunna anyi obu.
Onye l'ete eyee madzụ ibe iya obu bẹ nwụhukwaduru-a anwụhu g'ọ nwụhuru.
15 Iwhe bụ onye nwanna iya dụ ashị bụakwa ọchi bẹ onye ono gbụru,
unu manụru-a l'onye gburu ọchi bẹ ndzụ tututu-mịmimi l'ẹte adụdua l'ẹhu.
16 Sụa,
ọ wakwa g'anyi gude marụ iwhe ọbu bụ oye obu ndọwa;
lẹ Kuráyisutu harụ t'e gbua ya l'iswi ẹhu anyi.
Ọo ya bụ l'anyịbedua b'ọ gbakwarụwho nke t'anyi haa t'e gbua anyi l'iswi ẹhu onye anyi l'iya tụkoru nọdu Chileke l'ẹka.
17 Ọle nteke bụ l'ọ dụ onye ẹku nke mgboko-o byarụ;
mkpa byarụ onye yẹle iya tụkoru nọdu Chileke l'ẹka;
o be nke t'o yetaru iya ẹka;
o rwuchiaru nwanna iya ono obu;
?ọo gụnu bẹ ẹgube onye ono l'agbabẹhunu ọkpa sụ lẹ ya yeru Chileke obu?
18 Ụnwu mu;
t'anyi be eyejeshi obu l'eli ọnu yẹle ire mẹchemeche;
t'anyi gudeje umere anyi goshi l'ọo-whọ ezhi-okfu l'anyi yeru-a madzụ obu.
Onweru obu l'iwhu Chileke
19 Ọo ya bụ,
anyi l'emewaa nno anyi amarụ l'anyi shia lẹ Chileke ono bụ iya bụ ọkpobe-okfu l'onwiya.
Ya abụwaru iya rọo bẹ anyi l'e-gude mee t'obu kabaa anyi oshihu ike l'iwhu Chileke ọbu;
20 m'ọ -bụru l'o nwezhiaru nteke obu l'anma anyi ikpe;
o noo lẹ Chileke ka obu anyi shii;
tẹmenu ọ makọtaru iwhe lile.
21 Ụnwunna mu;
ọ bụru l'obu ta anmajẹdu anyi ikpe;
ọ kwa iya bụ l'anyi ta atsụhedu egvu l'iwhu Chileke.
22 Anyi l'anatajẹ l'ẹka iya iwhe bụ iwhe anyi sụru t'ọ nụ anyi;
o noo l'anyi l'anọje eme iwhe ọ tụru l'iwu t'anyi meje;
tẹmenu anyi l'eme iwhe dụ iya ree.
23 Iwhe ọbu bụ iya bụ iwu ọbu,
Chileke tụru sụ t'anyi meje;
bụkwa t'anyi woru onwanyị ye Nwa iya l'ẹka,
bụ Jisọsu Kuráyisutu mẹe t'anyi ye ibe anyi obu bụ iya bụlewho iwhe ọ tụru anyi l'iwu sụ t'anyi mejee.
24 Onye l'emeje iwhe iwu Chileke kfuru bẹ bukwa ebu l'ime Chileke;
Chileke bukwaruwho ebu l'ime iya.
Iwhe anyi l'egudeje marụ lẹ Chileke bu l'ime anyi bụ Ume iya ono,
ọ nụru anyi.