Nteke Éhazu bụ eze ndu Juda
28
Éhazu bẹ gbarụ ụkporo awha nteke ọ watarụ ọbu eze. Iwhe ọ chịru bụ awha iri l'ishii lẹ Jerúsalẹmu. O to medu iwhe kfụru nhamụnha l'ẹnya Onye-Nwe-Ọha, ẹgube ochee-oroke iya Dévidi meru. 2 Ọ wọtaru ẹka ndu eze ndu Ízurẹlu, kpụshia ntẹkpe, e gude abarụ Bálu ẹja. 3 Ọ kpọru isẹnsu ọku lẹ nsụda nwa Hịnomu, kpọo nwa iya nwoke ọku gude gbaa ẹja, bya eyekota ẹka l'ụrwali ono, ndu mba gẹ mba ha ono, Onye-Nwe-Ọha chịfuru ndu Ízurẹlu l'anọje eme. 4 Ọ gbarụ ẹja, kpọo ụ̀nwù isẹnsu ọku l'ẹka l'aagwajẹ iwhe, mẹe l'ugvu ugvu, mẹe lẹ mkpula mkpula oshi, jakashịhuru ẹkali ajakashịhu.5 Ọo ya bụ, Onye-Nwe-Ọha, bụ Chileke iya woru iya ye l'ẹka eze ndu Arámu. Ndu Arámu lwụ-gbua ya, kpụa ikpoto ndu nkiya lẹ ndzụ kpụru whẹ lashia Damásukọsu. E wokwaru iya whọ ye l'ẹka eze ndu Ízurẹlu, o gbua ndu nke Éhazu ono mee whẹ emerekete. 6 Peka nwa Remalaya bẹ gburu ụkporo ụnu unwoke ugbo iri l'ise l'alị ndu Juda l'akpụru ẹnyanwu lanụ; mbụ ndu bụkota ojọgu, ike dụ l'ọgu. Iwhe kparụ iya nụ bụ lẹ whẹ harụ Onye-Nwe-Ọha, bụ Chileke nke nna whẹ. 7 Zikiri, bụ onye ojọgu, shi l'ikfu Ífuremu gbua Maseya, bụ nwa eze mẹe Azurikamu, bụ onye ishi l'ibe eze, gbukwawho Ẹ́lukana, bụ onye l'etsota eze l'ọkwa. 8 Ndu Ízurẹlu kpụa ụnu madzụ ugbo ụnu l'ụnu ụkporo ugbo ise lẹ ndzụ l'ime ndu Juda ono, bụ ndu whẹ lẹ whẹ bụ abụbu. Whẹ kpụru ụnwanyi, kpụa ụnwu whẹ nwoke mẹe ụnwu whẹ nwanyị. O nokwawho gẹ whẹ gworu arya whẹ l'urwuturwu vulahu Samériya.
9 O nwekwanuru onye nkfuchiru Onye-Nwe-Ọha ọbu, ẹwha iya bụ Odedu, bu lẹ Samériya. O jee tẹ ya gbata ndu ojọgu ono, shi ọgu alwa Samériya ono ndzuta, je asụ whẹ: “Unu leeda, Onye-Nwe-Ọha, bụ Chileke nna unu whẹ bẹ kwoberu l'ẹhu l'eghu iya eghu l'ẹka ndu Juda nọ, woru whẹ ye unu l'ẹka. Ọle unu gudewaa ẹnya-ọovu gbushia whẹ; ẹnya-ọovu ono bẹ rwuwaru imigwe. 10 Ntaa bẹ unu tụberu t'unu dobe ndu Juda mẹe ndu Jerúsalẹmu ono, mbụ oke l'anya whẹ tẹ whẹ bụru ohu unu. ?Ọ fụtaru l'o too nwedu iwhe-dụ-ẹji, unubẹdua metagbaberu l'ẹka Onye-Nwe-Ọha, bụ Chileke unu nọ? 11 Unu ngabẹru mu nchị ntaa. Unu duwhu abụbu unu ono, unu kpụkoru lẹ ndzụ azụ, nkele oke ẹhu-eghughu Onye-Nwe-Ọha bẹ tukokwaru unu l'ẹhu.”
12 O nokwawho gẹ Azaríya nwa Jehohananu, mẹe Berekaya nwa Meshilemotu, mẹe Jehizekiya nwa Shalumu, mẹe Amasa nwa Hadulayi, bụ iya bụ ndu ishi ndu Ífuremu kwachiru ndu ojọgu ono, shi ọgu ono alwa ụzo, 13 sụ whẹ: “Unu ba atụkwa ama dubata ndu ono, unu kpụru lẹ ndzụ ono ẹka-a. Nkele iwhe unu tụberu bẹ bụ t'unu metabaa iwhe-dụ-ẹji mẹe iwhe ikpe l'a-nma anyi l'ẹka Onye-Nwe-Ọha nọ yekobe l'ọwhu anyi mewaru eme. Ikpe, nmarụ anyi bẹ panụkaru ẹka, tẹhenu oke ẹhu-eghughu Onye-Nwe-Ọha l'atawaa chichichi l'ẹhu ndu Ízurẹlu.”
14 Ndu ojọgu ono nọdu l'iwhu ndu ishi mẹe l'iwhu edzudzu-ọha ono wehaa ndu ono, whẹ kpụru lẹ ndzụ ono mẹe arya ono, whẹ gwotaru l'ọgu ono. 15 Unwoke whọ, e shi gụa ẹwha whẹ bya achịta ndu ono, a kpụtaru lẹ ndzụ ono. Whẹ ye ẹka l'arya ono, e gwotaru chịta uwe webe ndu gba ọto l'ime whẹ. Whẹ bya anụ whẹ iwhe oye l'ẹhu, mẹe akpọkpa, mẹe nri, mẹe iwhe-angụngu; bya ehua whẹ mmanụ l'ẹka ọnya, dụ whẹ l'ẹhu. E gude nkakfụ-ịgara pata ndu ọwhu ẹhu tsụshiru mmẹe l'ime whẹ. Whẹ chịta whẹ dulahuru ndu abụbu whẹ lẹ Jériko, bụ iya bụ mkpụkpu ẹbo-nkfụ. Ọo ya bụ, whẹbedua latashia Samériya.
Éhazu l'aryọ eyemẹka ndu Asiriya
16 Ọ bụru nteke ono bẹ eze Éhazu zhiru nzhi nụ ndu eze ndu Asiriya tẹ whẹ gbatarụ iya. 17 Nteke ono bẹ ndu Edọmu byarụ ọgu ọdo bya alwụ-gbua ndu Juda, kpụta ndu whẹ kpụtaru lẹ ndzụ. 18 Ọwhube ndu Fílistiya zebata bya ọgu lẹ mkpụkpu, dụ-gee l'alị ọkpa-ugvu, dụ l'ụzo ẹnyanwu-arịba mẹe l'ọhuda alị ndu Juda. Whẹ lwụtawaa mkpụkpu Betu-shẹmeshi, mẹe Ayịjalonu, mẹe Gederotu, mẹe Soko, yẹle ụnwu mkpụkpu, dụkota iya nụ, bya alwụta mkpụkpu Timuna yẹle ụnwu mkpụkpu, dụkota iya nụ, mẹe mkpụkpu Gimuzo yẹle ụnwu mkpụkpu, dụkota iya nụ. Whẹ laa ẹgu l'ẹka ono je eburu. 19 Onye-Nwe-Ọha bẹ kwoberu iwhe Éhazu, bụ eze ndu Ízurẹlu meru, mee ndu Juda whẹ lwaa alị, nkele Éhazu bẹ meru ụrwu-alị ka shii l'alị ndu Juda, tẹhenu Onye-Nwe-Ọha te egude ire iya ẹka. 20 Tigulatu-pyilesa, bụ eze ndu Asiriya byakfuta Éhazu bya echia ya ọnu l'alị, jịka lẹ ya ta agbẹhedu iya ọkpu ike. 21 Éhazu bya eshi l'ụlo Onye-Nwe-Ọha, mẹe l'ụlo eze, mẹe l'ụlo ndu ishi hata iwhe bya anụ eze ndu Asiriya ono, ọle o megeeru iwhe ono t'o nweta n-yemẹka.
Iwhe-dụ-ẹji, Éhazu meru
22 Nteke eze Éhazu nọ l'iwhe-ọtsulanu b'ọ kabaa ọburu onye Onye-Nwe-Ọha l'ete egudee ire iya ẹka. 23 Ọ gbarụ ẹja nụ ọgvu ndu Damásukọsu, bụ iya bụ ndu ono, lwụ-gburu iya l'ọgu. Ọ bya asụ: Eshi-ọwhu ọgvu ndu eze ndu Arámu yetaru whẹ ẹka, bẹ mu l'a-gbaru ẹja nụ ọgvu ndu Arámu ono tẹ whẹ yetaru mu ẹka. Obenu l'ọo ọgvu ono bekochaaru wotaru yẹbedua mẹe ndu Ízurẹlu l'owhu ọla-l'iyi. 24 Éhazu bya achịkobe arya, dụ l'ụlo Chileke, gwee arya ono yọgiri yọgiri. Ọ gụ-chia mgbo ụlo Onye-Nwe-Ọha ono agụ-chi, tụko ẹka lile lẹ Jerúsalẹmu mowhashia ẹnya-mgbẹja. 25 Lẹ mkpụkpu, dụkota l'alị ndu Juda b'o metakotaru ẹka l'aagwajẹ iwhe dobe, bụ ẹka l'aa-kpọjeru agwa ọdo ụ̀nwù-isẹnsu ọku. O shi nno kpatsua Onye-Nwe-Ọha, bụ Chileke nke nna iya ẹhu-eghughu.
26 Iwhe ọdo, nwụru nụ nteke ọ bụ eze, mẹe ẹka ụzo ọwhu o tsokotaru, wata l'ishi jeye lẹ ngvụcha b'e dekotaru l'ẹkwo ndu eze ndu Juda mẹe nke ndu Ízurẹlu. 27 Éhazu nwụhu lakfu nna iya whẹ lẹ maa. Whẹ lia ya lẹ mkpụkpu Jerúsalẹmu. E te elidu iya l'ilu ẹka l'eelije ndu eze ndu Ízurẹlu. Hezekáya, bụ nwa iya nwoke bya abụru eze l'ọzori iya.