Ẹkwo
ẸZURA
Sayirọsu l'atụ iwu tẹ ndu Ju, a kpụru lẹ ndzụ lwawhu azụ
1
L'awha mbụ, Sayirọsu watarụ ọbu eze ndu Peshiya bẹ Onye-Nwe-Ọha kpaliru obu iya, o zhia ozhi ryaa ya aryarya l'alị-eze iya l'owhu, bya edee ozhi ono edede l'ẹkwo keshia. Iwhe ono bụru gẹ l'ee-shi t'okfu ono, Onye-Nwe-Ọha shi l'ọnu Jeremáya kfua vụa.2 Ọ waa iwhe Sayirọsu, bụ eze ndu Peshiya l'ekfu ndọwa:
“Onye-Nwe-Ọha, bụ Chileke nke imigwe bẹ mewaru t'iwhe bụ alị-eze lile, dụkota lẹ mgboko lwakọta mu l'ẹka, ọ tụwaa mu ẹka tẹ mu tụaru iya ụlo Chileke lẹ Jerúsalẹmu, dụ l'alị Juda. 3 T'iwhe bụ onye nke Chileke, unu lẹ whẹ bu l'ẹka-a tụgbukwaru lashia Jerúsalẹmu, dụ l'alị Juda je atụa ụlo Onye-Nwe-Ọha, bụ Chileke nke ndu Ízurẹlu, mbụ Chileke ono, nọ lẹ Jerúsalẹmu. Tẹ Chileke unu swikwaru unu eswiru. 4 T'e yetakwaru ndu ono, l'ala nụ ono ẹka. Tẹ ndu whẹ bugee l'ibiya nke whẹ gude mkpọla-ọcha mẹe mkpọla-ododo yetaru whẹ ẹka. T'a nụkwa whẹ arya ọdo, dụ l'iche l'iche, mẹe élwù, mẹwaro iwhe ọdo, shi unu l'obu fụta, tẹ whẹ gude je atụa ụlo Chileke ono lẹ Jerúsalẹmu.”
5 Tọ dụ iya bụ, ndu bụ ishi l'ẹnya-uwhu l'ẹnya-uwhu ndu Juda, mẹe ndu nke Bénjaminu, mẹe ndu l'agbajẹ ẹja nụ Chileke, mẹe ndu Lívayi, mbụ-zhia iwhe bụ onye Chileke kpaliru obu iya bya atụko wụ-lishihu jeshia ọotu ụlo Onye-Nwe-Ọha ono, dụ lẹ Jerúsalẹmu. 6 Ndu buwheru whẹ mgburumgburu gude arya, dụ l'iche l'iche yetaru whẹ ẹka. Mbụ lẹ whẹ vutaru mkpọla-ododo mẹe mkpọla-ọcha nụ whẹ, bya anụ whẹ arya ọdo, dụ l'iche l'iche, mẹe élwù, mẹe iwhe dageeru oke ọnu aswa, t'a gụfukwa iwhe shi whẹ l'obu fụta, whẹ nụru whẹ.
7 Sayirọsu, bụ eze bya egwofutakwawho arya ụlo Onye-Nwe-Ọha ono, Nebukadineza shi lẹ Jerúsalẹmu vuta je edobe l'ụlo agwa iya. 8 Ọ bụru onye l'anọje eche okpoga, l'aza Mituredatu bẹ Sayirọsu, bụ eze ndu Peshiya shi l'ẹka iya gwofuta arya ono. Onye ono woru iya gụkashiaru Sheshubaza, bụ onye ishi, l'achị ndu Juda nnanụ nnanụ.
9 Ole, arya ono dụ bụ:
Efere, e meru lẹ mkpọla-ododo bẹ dụ ụkporo l'iri.
Efere, e meru lẹ mkpọla-ọcha dụ ụnu labọ l'ụkporo l'iri.
Iwhe l'eegudeje akpọ ụ̀nwù isẹnsu ọku, e meru lẹ mkpọla-ọcha dụ ụkporo lẹ tete.
10 Ochi, e meru lẹ mkpọla-ododo dụ ụkporo l'iri.
Ochi, e meru lẹ mkpọla-ọcha dụ ụnu l'ochi iri.
Ụnwu arya ọdo, dụ-gee l'iche l'iche dụ ụnu labọ l'ụkporo iri.
11 Arya, e meru lẹ mkpọla-ododo mẹe ọwhu e meru lẹ mkpọla-ọcha bẹ dụkota ụnu ugbo iri l'ẹto l'ụkporo iri. Arya ono g'ọ ha bẹ Sheshubaza gwolataru nteke ono, ndu ono a kpụru lẹ ndzụ laa alị Bábyilọnu ono wụru lwashia Jerúsalẹmu.