Naʌ̃ cartara Lucaba b̶ʌsia. Idjira griego basica b̶ʌa. Colosa 4:14d̶e, Pilemoʌ̃ 24d̶e bid̶a jara b̶ʌa maʌ̃ Lucara Paulo ume nĩbasida. Maʌ̃gʌra ebud̶aara b̶ʌa ara naʌ̃ Hecho 16:10-17d̶e, 20:5d̶eba ab̶a 21:18d̶aa, idjab̶a 27:1neba ab̶a 28:16d̶aa. Ʌ̃cʌrʌmaarã 60 poa Jesucrito tod̶acarea Lucaba naʌ̃ cartara b̶ʌsia.

Bed̶ea bia Jesucritod̶ebema ẽberã dji droma Teopilo itea b̶ʌd̶acarea Lucaba naʌ̃ carta sid̶a Teopilo itea b̶ʌsia Jesuba diabued̶arãba oped̶ad̶ad̶ebemada cawamãrẽã. Dji crĩcha dromara 1:8d̶e b̶ʌa. Dadji Boro Jesuba nãwã jarasia: “Ãcõrẽ Jaure bãrã ume b̶ad̶e zebʌrʌd̶e bãrãba idji ʌb̶ʌada edad̶ia. Maʌ̃ba bãrãba Jerusaleʌ̃ne, jũma Judea druad̶e, Samaria druad̶e, drua tʌmʌara b̶ead̶e bid̶a mʌ̃nebemada bed̶ead̶ia.”

Dji naãrãbema capítulod̶e (1:1-26) ed̶a b̶ʌ́ b̶ʌa Jesuba Ãcõrẽ Jaure diai jarad̶ada, Jesu bajãnaa wãnada, idjab̶a Matía Juda Iscariote cacuabari Jesuba diabued̶ada b̶ed̶ad̶ebemada.

Maʌ̃are b̶ʌ́ b̶ʌa Jesuba diabued̶arãba Jerusaleʌ̃ne bed̶ea bia idjid̶ebema jaraped̶ad̶ada (2:1d̶eba ab̶a 8:3d̶aa). Ed̶a b̶ʌ́ b̶ʌa Ãcõrẽ Jaure ãdjimaa zed̶ada, Pedroba Ãcõrẽ de droma caita jaradiad̶ada, Jesud̶erã sãwã ãbaa pananada, idjab̶a judiorãba Estebaʌ̃ beaped̶ad̶ad̶ebemada.

Maʌ̃are b̶ʌ́ b̶ʌa Jesuba diabued̶arãba Judea druad̶e, Samaria druad̶e bid̶a bed̶ea bia idjid̶ebema jaraped̶ad̶ada (8:4d̶eba ab̶a 9:43d̶aa). Ed̶a b̶ʌ́ b̶ʌa Ãcõrẽ Jaure Samariad̶ebema djabarãmaa zed̶ada, Pelipeba nezoca droma Etiopiad̶ebemaa jaradiad̶ada idjab̶a Sauloba Jesucrito ĩjãnanebemada.

Jĩrũare b̶ʌ́ b̶ʌa Jesuba diabued̶arãba bed̶ea bia idjid̶ebema judiorãẽ́a jaraped̶ad̶ada. Ed̶a b̶ʌ́ b̶ʌa Ãcõrẽ Jaure judiorãẽ́maa zed̶ada (10:1d̶eba ab̶a 11:18d̶aa), Pedro Herode jʌwaed̶a ẽdrʌd̶ada (11:19d̶eba ab̶a 12:25d̶aa), Paulo Jesu bed̶ea jarad̶e wãna dji naãrãbemada (13:1d̶eba ab̶a 14:28d̶aa), djabarã dji dromarã Jerusaleʌ̃ne dji jʌreped̶ad̶ada (15:1-35), Paulo Jesu bed̶ea jarad̶e wãna dji umébemada (15:36d̶eba ab̶a 18:22d̶aa), dji ũbeabemada (18:23d̶eba ab̶a 20:38d̶aa), idjab̶a Paulo Romanaa preso edeped̶ad̶ada (21:1d̶eba ab̶a 28:31naa).