Poa 56are Pauloba naʌ̃ cartada djabarã Roma purud̶ebema itea b̶ʌsia. Roma purud̶aa wãẽ́ b̶ad̶a bẽrã cartara b̶ʌsia idjid̶ebemada cawad̶amãrẽã. Jerusaleʌ̃naa wãi naẽna Corinto purud̶eba diabuesica b̶ʌa (Hecho 20:1-3).

Roma purud̶e djabarã judiorãda, judiorãẽ́ sid̶a baraasia. Judiorãba Ãcõrẽba Moisea diad̶a leyra ẽpẽ panabadjid̶aa baribʌrʌ judiorãẽ́ba ẽpẽnaca basía. Maʌ̃ bẽrã Pauloba naʌ̃ crĩcha dromada Romano 1:16-17d̶e b̶ʌsia: “Mʌ̃ra peracaa bed̶ea bia Jesucritod̶ebemada jaradiai carea, maʌ̃ bed̶ea ĩjãbʌdara Ãcõrẽba idji ʌb̶ʌad̶eba jũma ẽdrʌ edabari bẽrã; judiorãda, judiorãẽ́ sid̶a. Maʌ̃ bed̶ea biad̶eba Ãcõrẽba cawabi b̶ʌa sãwã ẽberãrãra jipa unubarida. Jesucritoda ĩjãsira mãwã unubaria.”

Pauloba naãrã b̶ʌsia judiorãba, judiorãẽ́ bid̶a cadjirua obada carea Ãcõrẽba cawa oida (1:18d̶eba ab̶a 3:20d̶aa). Maʌ̃are b̶ʌsia Ãcõrẽba idji biad̶eba Jesucrito ĩjãbʌdarã jipa unu b̶ʌd̶ebemada (3:21neba ab̶a 5:21naa). Maʌ̃are b̶ʌsia Ãcõrẽba Jesucrito ĩjã b̶eara idji Jaured̶eba ara idji itea bia b̶ʌbarida (6:1neba ab̶a 8:39d̶aa). Maʌ̃are b̶ʌsia zocãrã judiorãba Jesucritora ĩjãnaẽ́ panʌmĩna ewari ab̶a ĩjãnida (9:1neba ab̶a 11:36d̶aa). Maʌ̃are b̶ʌsia sãwã dadjirãra jipa nĩbad̶ida panʌda (12:1neba ab̶a 15:13d̶aa). Jĩrũare b̶ʌsia España druad̶aa wãi naẽna djabarã Romanebemada acʌd̶e wã quĩrĩã b̶ʌda (15:14-28). Pauloba jĩrũare b̶ʌd̶ara 16:1-27d̶e b̶ʌa.