Jesu ume nĩbad̶a Juaʌ̃ba naʌ̃ cartada b̶ʌsia. Poa 80are Epeso purud̶e b̶asid̶e b̶ʌsia. Baribʌrʌ cartad̶e jaraẽ́ b̶ʌa idjia b̶ʌd̶ada. Ʌ̃cʌrʌmaarã naʌ̃ cartad̶e Juaʌ̃ba ara idjida “Jesuba bio quĩrĩã b̶ʌ” trʌ̃ jarabadjia (21:20-24).

Juaʌ̃ba naʌ̃ cartara djabarã itea b̶ʌsia cawad̶amãrẽã ãdjia Jesud̶ebema ĩjãped̶ad̶ara wãrãda. Idjab̶a jũmarã itea b̶ʌsia Jesura wãrãda Ãcõrẽ Warrada ĩjãnamãrẽã. Maʌ̃ crĩcha dromara Juaʌ̃ba b̶ʌsia 20:31ne: “Jũma naʌ̃gʌra b̶ʌsia bãrãba Jesura Ãcõrẽba ẽdrʌ edabari diai jarad̶ada, Ãcõrẽ Warrada ĩjãnamãrẽã. Mãwã ĩjãnibʌrʌ idjid̶eba zocai b̶ai arada erob̶ead̶ia.”

Naʌ̃ cartad̶e Juaʌ̃ba ebud̶a cawabisia Jesura wãrãda Ãcõrẽneba zesida. Maʌ̃gʌra naãrã cawabisia ẽberãrãba jara panʌneba (1:1-51). Maʌ̃are cawabisia Jesuba ne ununaca siete o b̶ʌd̶eba (2:1neba ab̶a 11:44d̶aa). Maʌ̃are Juaʌ̃ba b̶ʌsia Jesu beui carea b̶ʌd̶ebemada (11:45d̶eba ab̶a 17:26d̶aa), idji igara b̶eaba jidad̶aped̶a crud̶e beaped̶ad̶ad̶ebemada (18:1neba ab̶a 19:42d̶aa) idjab̶a idji ĩjã b̶eaba idji ʌ̃rẽbad̶a unuped̶ad̶ad̶ebemada (20:1neba ab̶a 21:25d̶aa).

Naʌ̃ cartad̶e Jesuba ebud̶aara jaradiasia Ãcõrẽ Jaured̶ebemada (3:1-8; 6:63; 7:37-39; 14:15-29; 15:26d̶eba ab̶a 16:15d̶aa, 20:19-23). Maʌ̃ awara ebud̶a bed̶ea b̶ʌa Ãcõrẽba idji Warra quĩrĩã b̶ʌd̶ebemada (5:19-21; 10:17-18; 17:1-26) idjab̶a sãwã idji ĩjã b̶eara quĩrĩã b̶ʌda (3:16-17; 11:33-37; 13:1neba ab̶a 17:26d̶aa).