Naʌ̃ cartara Lucaba b̶ʌsia. Idjira griego basica b̶ʌa. Colosa 4:14d̶e, Pilemoʌ̃ 24d̶e bid̶a jara b̶ʌa Lucara Paulo ume nĩbasida. Mateoba, Marco bid̶a ãdjiza carta Jesucritod̶ebema b̶ʌped̶ad̶acarea Lucaba naʌ̃ cartara b̶ʌsia.

Lucaba naʌ̃ cartara ẽberã dji droma Teopilo itea b̶ʌsia cawamãrẽã Jesud̶ebema idjía jaradiaped̶ad̶ara wãrãda (1:1-4). Lucaba waabemarã cãyãbara ebud̶aara b̶ʌsia Borocuebari Juaʌ̃ toped̶ad̶ad̶ebemada (1:5-80), Jesu toped̶ad̶ad̶ebema sid̶a (2:1-52). Maʌ̃are b̶ʌ́ b̶ʌa Juaʌ̃ba Jesu borocued̶ad̶ebemada (3:1-22), Jesu drõã naẽnabemarã trʌ̃da (3:23-38), idjab̶a diauruba Jesu mĩã sẽ b̶ad̶ad̶ebemada (4:1-13). Maʌ̃are b̶ʌ́ b̶ʌa Jesuba Galilea druad̶e jaradia nĩbad̶ad̶ebemada (4:14d̶eba ab̶a 9:50d̶aa) idjab̶a Jerusaleʌ̃naa wãbʌrʌd̶e jaradia b̶ad̶ad̶ebemada (9:51neba ab̶a 19:27d̶aa).

Jĩrũare b̶ʌ́ b̶ʌa Jesu Jerusaleʌ̃ne mãwãnanebemada: Jerusaleʌ̃ puru carea jĩãnada, crud̶e beaped̶ad̶ada, ʌ̃rẽbad̶ada, idjab̶a idji ĩjã b̶earã quĩrãpita bajãnaa wãnada (19:28d̶eba ab̶a 24:53d̶aa).

Lucaba ebud̶a b̶ʌsia Ãcõrẽba cawa oid̶ebemada (2:25-35; 19:37-44; 21:20-24) idjab̶a cadjirua obadarã idjimaa jẽda zebʌdarãda ẽdrʌ edaid̶ebemada (1:67-80; 15:1-32; 19:1-10). B̸arima zocãrã b̶ʌsia cadjirua obadarã Jesuba quĩrã djuburiad̶ada: judiorãda, judiorãẽ́da, Samariad̶ebemarãda, ne neẽ́ qued̶eada, Romanebema boro itea parata jʌrʌ pebadarã sid̶a.

Luca cartad̶e ebud̶a b̶ʌa wẽrãrã sid̶a Jesuare panasid̶ada. B̸ʌ́ b̶ʌa Elisabed̶ebemada (1:5-66), Mariad̶ebemada (1:26d̶eba ab̶a 2:52d̶aa), Ananebemada (2:36-38), idjab̶a Jesu carebabadarãnebemada (8:1-3). Maʌ̃ awara wẽrãrãba idji ʌ̃rẽbad̶ad̶ebemada naãrã cawasid̶aa (24:1-12).