Sonda - 05 Janueri, Namba tu Sande bihain long Krismas (Kongac)
Jeremaia 31:7-14
05-11 Janueri 2020
7 KEBUNGO yofi dede:“Yakoboac ubangerecgoc yegec heimigec;
Isracelac yegec arohoma heigec, bangec fedacde yeneac engena.
Wagec dedengerecngina negenggec,
amma degec, o KEBU,
ngicngacfocga meficyununa damocngo gbori kecdae.’
8 Henggec, ngicngac notfunac meyunuhabade
amma kpeturangyunubade, bangec tegia nobocnobocnac.
Yeneac manaunac kicpisic nga dzeke puring,
nenggac sabac kpenanggedae nga mebesoandae;
ngicngac engenango habesandae.
9 Yeni kiacma ubangerecgoc hagecde;
yeni monggoc hesiyunuhaba numugecde
warai yemmeba doku nedzideu sing sorongaima fede
ihai tiangkpiang mi anggecde,
nocac ni Isracelac mama nga
Efaraing ye neac warac medacna.
10 “Kedzac kpema KEBUAC yoac yomoc negenggec, o bangectoa bangec yomocac ngicngac;
kpacma edeyunugec ngicngac kongdung tegiau kecdae
Ngic merang Isracel ayemmeu sisapapac kpegec
ye monggoc ngicnacfora rama garenggo ramafora kpedzucyunuma garengyunuande ifi isoc ngicngacfora kpedzucyunuma henggareng ayemmeude.
11 KEBU yengenaoc bummeyunuma kucnginagoc yeneac
mariunac kaso ayemmeude.
12 Isracel ngicngac yeni monggoc hamma ubangerecgoc Tsiong tikiu yegec heigecde.
Yeniac kicmesu kperagiec nocac KEBUNGO wiac gombunga ayemmeude-
wit nga waing amma kerec gombunga
nga rama medaha ama burumaka.
Imoc yeni ua dokuyagoc isoc annude
yeni kiac ubahodung monggoc mi anggecde.
13 Anu ngac naroang ngic mi megec yeneng sogaima yegec fedegecde,
ngic medac nga kpengeng yeni ifiangoc anggecde
yeniac kiac ubahodungina meremba sogacsogai anude;
Neng yeneac ubahodung meremba sogacsogai anu nanggeyunubade.
14 Ni womong garengfocna semeng gombungango sokoyunubade,
anu ngicngacfocna yeni neac gobungngo sokoyunuude,”
KEBUNGO ifi dede.
Efeso 1:3-14
3 Nenang Kebunina Yesu Kristo, yeac Anutu Manggac kenehebisina. Kristogoc kpeturanggema kecdimbeac amma yeng kurumenggac kenec Asuac arennu fedacde, imoc sasawa nemmeec. 4 Yennoc bicngoc yombong hanahema bangec kurumeng mi fingecmanu kiwau ebiha kpac nga kpetiac kecnideac Kristoac amma negengising anemmeec. 5 Nga medacfora annideac ye songoya nga negen negenga modacma Yesu Kristoac amma meisinnunuec 6 Amma ye Medackerengaac amma ubangerec yombong anemmeecac nenang eweheimima dengerebisina.
7 Yesu Kristoac danggunucac dzohong imoc wakema fedeac nenang yearu kpeketaheni ye sawango kirecgenunuu mangana meic meicke fingerec. 8 Imocac dzohongau negen negentegec nga negen negeng fora mengeredacma kpetinggenemmeec. 9 Amma yeac ubau wosoefacac negen negeng sufu sufuya fede, imoc deserima yofi deireckenemmeec, 10 “Ni Kristo sueba bangecfu mama wiac sasawa bangecfu nga kurumennu fede, imoc kpeturanggema oruha anude. Nga negen negeng ua mema arenggema nasotoaya negenai, imohai fora fingerude.”
11 Ye areng imoc bicngoc negensima yeac amma eucererenga menideac negengising anemmeec. Ye wiac sasawa ubeau feec, imoc fora fingecbesandeac ifi arenggeec. 12 Imocac nenang hanahema erema Kristoac amma kekecseri mekecnideac dedea, imoc negensinggedimbe. Nga Anutu kpara kengkena dengerema afehebisina. 13 Ngeni ifingoc yoac fora negemma memengerecac siduc gombung mema Yesu negensinggegec. Negensinggema ngeneng yeac anggecdeac amma Tiri Asu ngemmeudeac deec, ye herenginau faima dzadzahacac dzic ngemmeec. 14 Kurumennu finacnina fede, imocac dzadzahacac dzic Tiri Asu ande. Imoc nenang nemmenemmea. Imoc mekecnideu Anutungo kuric bangecfunac nambaracfora mesinunuma menunuude. Imocac Anutuac kuc nga kibikperagia dengerebesonga.
Yohane 1:10-18
10 Anutu ye kperagiango bangec nga wiac sasawa meficgedaru kperagia imocngo bangecfu kefu ngicngac yeneng ine ye mi hensigec. 11 Ye bangehau dzigenemanu arengfora yeneng ama mi heimigec. 12 Nga ngicngac ama heimima kpara negensinggegec, yeni Anutuac nambaracfora anggecdeac deyemmeec. 13 Deyemmeu ngicngac imoc yeni ngic sacfusiunac me sebiac songounac me ngic monggac songounac mong mi fingecgec, kpac. Yeni Anutu yengenaarunac fingecgec.
14 Anu enacyoacngo sebifusiagoc amma botucninau kefec. Kefu medac mocgungo fingecma Manggacarunac kuc nga kibikperagia mekefec, kuc nga kibikperagia imocnoc hening. Henni yearu danggunuc nga yoac fora wake wakea fede.
15 Yohanengo yeac hepuc amma dekperagima kpacma yofi deec, “Ni yeacnoc yofi deai, ngadenau hama kecde, ye kunenna, nocac ni mi fingecbarengoc ye kechakefec.” 16-17 Dedeseriyoacngo Mosegoc hau yearunac meing nga danggunuc amma yoac fora imoc Yesu Kristogoc haec. Amma ye danggunuc hafoangoc femide, imocngo nenannu wisic wisickea kpac hakecde. 18 Ngic mongngo Anutu mong mi henec, kpac. Medaha mocgusac Mamaac hoannu kecande, ye Anutungoc. Yeng Manggac dekperaginemmeec.
Mitiyegec 147:12-15, 19, 20
12 O Yerusalaim, ge Kebu yoyomo heimina. Tsion, ge Anutuga yaiyo kpemibesena. 13 Ye taongga oda mengerema naguyaac aieng meseriu seria monggoc nanude. Yeng amaga manau medacfocga kenecyunuude. 14 Ye bangecgau ma faima ngicngacfocga onggongngunuu ruaegoc kecgecde. Ye wit semeng gombunga yombong meficgengemmeu negebec anggecde.
15 Ye dederecgeyoara bangecfu sueu imocngo bic yombong nedzima haude.
19 Ye yoara Yacakow mekperagimiu sing nga dederecgeyoara imoc Isracel areng mekperagiyemmeec. 20 Ye bangec areng goa yeni faka ifia mong mi ayemmeec. Yeneng yeac dederecgeyoac mi negendae, kpac.
Kebu eriendzong memini, hallelu Yac.
Monda - 06 Janueri, Epifeni (Kongac)
Yesaia 60:1-6
1 O Tsion, KEBUAC kibikperagingo gearu kperagideac
ge yacma kperagina.
2 Henna bangec yomoc
kundungngo semema femanu
KEBUNGO gearu hau
kibikperagiango gearu kperagide.
3 Bangectoa bangecngo geac kperagiu hagecde,
nga ngictau yeneng ifingoc geac kibikperagi hemma hagecde.
4 Ge kpehengaima kicga finakenu henna,
nambaracfocga sasawango kpedzucnema hadae,
Medacfocga yeneng bangec hereaunac hagecde,
nga naroangfocga yeneng mohocyunuma pandzengnginau faiyunuma hagecde.
5 Hagec geng imoc hemma
kpidohoma sogaimana
wage toatoa yeneng iwai homac sere ha genggec
ge bangectoa bangec yenearunac dzofinac toagagoc annade.
6 Midiang nga Efa yeneac camere
yeneng bangecga sokogecde
nga Seba yeneng
gol nga hosuc homung kerengngagoc
oho ohoac iwai mehagecde.
Efeso 1:3-14
3 Nenang Kebunina Yesu Kristo, yeac Anutu Manggac kenehebisina. Kristogoc kpeturanggema kecdimbeac amma yeng kurumenggac kenec Asuac arennu fedacde, imoc sasawa nemmeec. 4 Yennoc bicngoc yombong hanahema bangec kurumeng mi fingecmanu kiwau ebiha kpac nga kpetiac kecnideac Kristoac amma negengising anemmeec. 5 Nga medacfora annideac ye songoya nga negen negenga modacma Yesu Kristoac amma meisinnunuec 6 Amma ye Medackerengaac amma ubangerec yombong anemmeecac nenang eweheimima dengerebisina.
7 Yesu Kristoac danggunucac dzohong imoc wakema fedeac nenang yearu kpeketaheni ye sawango kirecgenunuu mangana meic meicke fingerec. 8 Imocac dzohongau negen negentegec nga negen negeng fora mengeredacma kpetinggenemmeec. 9 Amma yeac ubau wosoefacac negen negeng sufu sufuya fede, imoc deserima yofi deireckenemmeec, 10 “Ni Kristo sueba bangecfu mama wiac sasawa bangecfu nga kurumennu fede, imoc kpeturanggema oruha anude. Nga negen negeng ua mema arenggema nasotoaya negenai, imohai fora fingerude.”
11 Ye areng imoc bicngoc negensima yeac amma eucererenga menideac negengising anemmeec. Ye wiac sasawa ubeau feec, imoc fora fingecbesandeac ifi arenggeec. 12 Imocac nenang hanahema erema Kristoac amma kekecseri mekecnideac dedea, imoc negensinggedimbe. Nga Anutu kpara kengkena dengerema afehebisina. 13 Ngeni ifingoc yoac fora negemma memengerecac siduc gombung mema Yesu negensinggegec. Negensinggema ngeneng yeac anggecdeac amma Tiri Asu ngemmeudeac deec, ye herenginau faima dzadzahacac dzic ngemmeec. 14 Kurumennu finacnina fede, imocac dzadzahacac dzic Tiri Asu ande. Imoc nenang nemmenemmea. Imoc mekecnideu Anutungo kuric bangecfunac nambaracfora mesinunuma menunuude. Imocac Anutuac kuc nga kibikperagia dengerebesonga.
Mataio 2:1-12
1 Yesu Betreheng amau Yudaia provinsiu fingerec, naso imohai Herodengo ngictau kefec. Kecmanu negen negengngic goa bangec wenac ere ereaunac Yerusalennu hama 2 yofi degec, “Yudangic ngeneac ngictau fingecdac, ye dahai? Neni wenac ere ereau tacma yeac asomeng ereu hemma ye eweheiminideac hadimbe.” 3 Ifi degec ngictau Herodengo imoc negemma ubaebic meec. Meu ngicngac Yerusaleng taonnu kecgec, yeneng ifingoc anggec. 4 Nga ye yudaareng yeneac womonggareng enara nga mitiac negen negengngicfocngina sasawa heitaiyunuma yofi dekpesi ayemmeec, “Messiango dahai fingerudeac dedea?” 5 Ifi kpesiyemmeu yofi degec,
“Imoc Betreheng taonnu Yudaia provinsiu. Imocacnoc profetengo yoac yofi ohoec fede, 6 ‘Yuda bangecfu Beterehennac enara mong fingecma israengicngacfocna garengyunuudeac taong imoc yudaarenggac taong goa yeneac mamea kpac.’ ” (Mika 5:2)
7 Ifi edegec Herodengo wenac ere ereaunac negen negengngic tembucfu heitaiyunuma asomeng noc nasoac fingerec, imocac naso dindingac negenudeac dekpesi ayemmeu edegec. 8 Edegec yeng yofi dema Betreheng amau sueyunuec, “Ngeni kemma sabac dahai fede, imoc hofocma meficgema hama edenugec neng mong ifingoc kemma eweheimibesare.”
9-10 Ngictaungo ifi deu yeni imoc negemma sinnu kenggec. Kemma asomeng wenac ere ereau henggec, imocngo monggoc fingeru hemma ubangerectoa negemma desogai homac anggec. Nga asomengngo waraiyemmeu kengkecma sabac feec, ama imocac witiau heiserima tarec. 11 Taru yeni amau emma sabac nga nonggea Maria yerenggec. Yeremma fafoc heima ngonducnema ye afehegec. Amma finachienginaunac ubangerecac wiac yofi widicma migec, gol nga hosuc homungkerengagoc amma icsopea homuna gombunga kpara mira. 12 Nga Anutungo yeni Herodearu sing mi dzigenegecdeac gauu goro dema dederecge ayemmeu yeni sing monnu sing bangecnginau dzigenegec.
Mitiyegec 72:1-7, 10-14
1 O Anutu, ngictau ye geac desi desifakaga dindingacgoc kefudeac derecgemina. Ge ni, ngictauac medac, fakaga dindingacgoc ambadeac derecgenenna. 2 Ge ifi anna yeng faka dindingacfu ngicngacfocga yoacngina desibeso nga sing dindingac modacma makpekpea yoacngina desibeso. 3 Tiki yeneng ngicngac ruae meficgeyemmebisia nga fagang yeneng dindingac kekecac fora meficgeyemmebisia.
4 Ngictauac ngicngacfora tosea makpekpea kecdae, yeni yoacfu nanggeyunuma yoacngina deu firang ambisia. Nga ngicngac iwaiac obohoma eng kecdae, yeni meficyunuma wiac yemmebeso. Ngic mongngo ngicngac ogofora ebicfu faiyunuu ubaebicgoc kecgec ngictaungo hemma kpedzameu kuha kpac ambeso. 5 Wenacngo feengkefude, ye ifi isoc kekec herea kecbeso. Nga afo fekefude, ye ifi isoc fekecma ngicngac fingecsahengina fekefudesoc kecbeso.
6 Neni semeng uanina mengereni kiango imohai heiande, ye semeng ua ifia isoc amma kiango bangecfu heiu dokuyagoc angkecde, ye bangec ifia isoc ambeso. 7 Afo imoc nasosoc fekefude, ifi isocngoc ngictauac nasou faka dindingacngo sabayagoc amma ruae kunengtoa fefeseri fekecbeso.
10 Tarsis bangec nga nuha nuha bangecngina fekendae, imocac ngictau yeneng yeac ubangerec wiac mehama ye mibisia. Arabiaac Saba bangec nga Etiopiaac Seba bangecac ngictau yeneng ifingoc ubangerec wiac mehama ye mibisia.
11 Ngictau sasawa yeneng yeac kicfu ngonducnegec bangec monnunac ngicngac yeni sasawango yeac kingang kpemibisia. 12 Imoc yofiac, ngicngac iwaiac obohoma kecandae, yeneng ye kpacgec yeng ebicfunac mesiyunuude nga ngicngac makpekpea nga memeficngina kpac kecdae, yeneng kpacgec yeng ebicfunac mesiyunuude. 13 Ye ngicngac kucmama nga iwaiac obohokecdae, yeneac uba mangang negemma iwaiac obohokecdae, yeneac kekec onggonggeude. 14 Ye yeneac sacngina negenu engena angkecdeac amma ngic yeneng yarefaka amma ogofocngina ebicfu faiyunugec ubaebicgoc kecgec yeng ebicgoc yeneac kekecngina bummema ebicfunac mesiyunuude.