Sonda - 12 Janueri, Epifeni 1 Jisas i kisim baptais (Kongac)
Yesaia 42:1-9
12-18 Janueri 2020
KEBUNGO yofi dede, “Yomoc neac uangicna nineannaoc hengsongo ammima meisinggeai.
Imocac ni Asuna yearu kpakeba
yeng dindingac kekec bangectoa bangec yomocac ngicngac yenearu mekperagiude.
2 Ye singtoau uba udumengtoagoc
dearoho amma kiac andae isoc mi anude.
3 Ye kombango patickema usubeso ande imoc mi metackeude
amma kifa pisickebeso ande imoc mi mepisickeude.
Ye serima namma dindingac kekec imoc mekperagiude.
4 Ye ebicngo kucmama mi meficgemiu
serima namma bangectoa bangecfu dindingac kekec mekperagiu, bangec noboc
nobocnac ngicngac yeneng yeac kpoukpouac tomai kecgecde.”
5 KEBU Anutungo kurumenga kurumenga meficgema
bangec mema bangecfu wiac sasawa faidarec
amma kekec asuya fifiu ngicngacfora yenearu kemeec
yeng yofi dede,
6 “Ni KEBU, nennoc dindingac kekec imoc mekperaginadeac kpacguyai.
Ni ge marigau meguba geng
ngicngacfocna yenigoc dzadzahac annade
amma bangeha bangeha ngicngac yeneac kperagi annade.
7 Ge kicpisic kicngina merecgenade.
Nga witicamaunac yungecyununade
amma ngicngac kundunnu kecdae yeni mekperagiyununade.
8 “Ni KEBU, nga KEBU imoc neac kpacna.
Ni neanna dedengerec nga kpackuneng imoc mong me
nemuonga mong mi mibisia.
9 Henggec, wiac fingerudeac deai imoc fingecde.
Nga ni wiac gboria
ngade fingerude imoc
yaguc edengunuduae.”
Aposoro 10:34-43
34 Ifi deu Petorongo enacefac amma yofi edeyunuec, “Anutungo ngicngac isinnunuma monggac songo negemma mong mi waude, imoc foracngoc negentegecyombonggeduae. 35 Ngic bangeha bangeha eweheimima angammeme dindingac angkecdae, yeneac negenu ngereeande. 36 Foracngoc, Anutungo Yesu Kristo mocgu, ngic sasawa nenang Kebunoc sueu maec. Yeng ruaeyoac gombung Israe ngicngac nenearu deficgenemmeec, imoc ngeni negendae. 37 Amma Gariraia bangecfu hanahema wiac fingecma Yudaia bangec sokoma kenec, imoc ngeni negendae. Imoc yofi: Yohane ye ngic dokunadzicac yoac edeyunuec. 38 Anu Anutungo Yesu Nadzaretenac kuc nga Tiri Asu faimiu yeng bangec yerecgema kengha amma ngic meficyunuma mengereyunukefec nga mangana minginaac kucngo ngicngac kekecngina memanganedarec, yeni mengereyunudarec. Anutungo nonggo tacmimanu yeng ua imoc meec.
39 Anu Yesungo yudangic neneac bangecfu nga Yerusalennu ua meec, imoc hennegeng andaring. Ifi amma kecmanu yeni ye mariponnu kpegec homeec. 40 Homema femanu wenac harebec anu Anutungo ye megboriu yacma ngicngac fingecyemmeu henggec. 41 Ngicngac sasawa yenearu mi fingerec, kpac. Anutungo waracngoc siducdedefora meisinnunuec, nenearusac fingerec. Ye homecfunac yaru neninoc nenedoku yegoc neing. 42 Nga Anutungo ngic yenoc ngic gbori nga homemea angammemenina desiudeac gununggeec, yoac imocac hepuc amma ngichabu gorongina kpema desaheyemmenideac denemmeec. 43 Anu profete sasawa yeneng yeacnoc hepuc amma yoac yofi degec, ‘Ye negensinggegecde, yeni yeac kpacfu kopocsicngina wawaya anude.’ ”
Mataio 3:13-17
13 Naso imohai Yesungo Gariraia bangecfunac Yodang dokuu kemma Yohanengo mitidoku nadzicmiudeac edeec. 14 Edeu Yohanengo imoc negenu naric mi anu deec, “Geng ni naric nadzicnennade, imoc ngereede, ammanu geng nearu hama nadzicgembadeac denec.” 15 Ifi deu Yesungo yofi deec, “Ge yoac imoc wana, faka dindingac sasawa fora fingerudeac yaguc edeguduae, ifi anna ngereeude.” Ifi deu naric dema yoara tofohoec. 16 Nga Yesungo doku nadzicma dokuunac eremanu kurumeng anggeec. Anggeu Anutuac Asungo kebesacac siric amma hau hemmanu yearu maec. 17 Mamanu kurumennunac ubaudumeng mongngo yofi deec, “Yomoc songomedacna, ye hensongo ammiduae.”
Mitiyegec 29
1 O, anutu hania hania yeneac medacfocngina kucnginagoc kurumennu kecdae, ngeni Kebu eriendzong memibisia. Amma ngeni Kebuac kuc kibikperagiagoc negensima eweheihei ammibisia. 2 Ngeni Kebuac kpara eweheiheigoc heiwayong memibisia. Kebu ye kpetiac, imocac ngeni ngonducnema numumibisia.
3 Kebuac ubaudumeng imoc doku witinginau fingerude. Anutu kuc nga kibikperagia minginango kondungtoa witiau gbururung amma heiude. 4 Kebuac ubaudumeng imoc kuhagoc yombong. Kebuac ubaudumeng imoc ngictauac ubaudumeng ande. 5 Kebuac ubaudumengngo yomondzoc ic kpetackeude. Kebungo Lewanon bangecac yomondzoc ic kpedzameyunuude. 6 Yeng Lewanon bangec yoac edeu ye burumaka medaha isoc yuude nga Siriong bangec ye burumakangiwa isoc yuude.
7 Kebuac ubaudumengngo gerecborang meficgema ukuyunuu singsararang kpegecde. 8 Kebuac ubaudumengngo bangec kisiu fingeru imocngo dzonoma fedeude. Kebungo Kades bangec kisi kpemindzaheude. 9 Kebuac ubaudumengngo kateburumaka yoac edeyunuu medacfocngina fingecgecde. Yeng ic maria kpemoronggedarude. Yeac womonnu yofi dema arohodacgecde, “Kebu eweheiheiagoc dengereni.”