Sonda - 22 Desemba, Adven 4 (Pepol)
Yesaia 7:10-16
22-28 Desemba 2019
10 Anu KEBUNGO Ahasiac monggoc yofi deec, 11 “Ge KEBU Anutuga kpesimina, yeng kucfaka kemekemea ferahema kemede me wi sawa ferahema ende ifia meu henna.”12 Deu Ahasingo ine yofi meremmiec, “Ni mi kpesibade; Amma ni KEBU faitobannu mi faibade.”
13 Anu Yesaiango yofi deec, “Dawidiac esangabo ngeni yaguc negenggec! Ngeni modzotiti faka ngic ayemmeandae, faka imocngoc neac Anutuna amigecde me? 14 Imocac Kebu yengenaoc faka mong meude: Ngac naroangngo medac kpenanggema meu, kpara Imanue kpacgecde. 15 Ye mangana nga gombunga isinggeude naso imohai kateac kukungdzau nga burumakaac namu imoc neude. 16 Anu medacngo mangana wama gombunga mi isinggemanungoc ngictau yohockang damoc yereac kengecguande, yereac amabangecngo manganeude.
Roma 1:1-7
1 Ni Paurongo kibi yoc ohoma Roma kpebung ngenearu faiduae. Yesu Kristo ye minginna nga ni yeac wanacngic. Yeng kpacnuma segerenuu aposoro ua mema Anutuac siduc gombung dekperagibadeac denenec. 2 Yeng siduc gombung imocnoc warac profete yenearu yoac dedzege amma habesandeac deu yeneng imoc mitikibi kpetiacfu ohogec fede. 3 Siduc imoc yofi, Anutuac Medac, Kebunina Yesu Kristo, yeng ngicsebiac arennu Dawidiac fingecsaheunac fingerec amma 4 kpetiac minginaac Asungo kucgoc yombong yeac yofi dekperagiec, yennoc homecfunac gborima yarec, imocngo yofi edzacnunude, ye Anutuac Medacyombonga. Imoc Kebunina Yesu Kristoac siduc gombung. 5 Anutungo deu ye wosoefac anemmema aposoro ua nemmeu neni yeac kpacac amma bangec monnunac ngicngac Anutu mi negemmidae, yeneac botucfu yoac dekperagini yeneng ye negensinggema yoara tofohogecde, ua imoc mekecdimbe. 6 Nga Anutungo ngeni ifingoc kpacngunuma Yesu Kristoac areng anggecdeac negende.
7 Anutuac songoareng Roma taonnu kecdae, ngeni kpacngunuu yeac kpetiac areng kecdae. Nga Anutu Manninaac amma Kebu Yesu Kristoac danggunuc nga ruaengo ngenearu febeso.
Mataio 1:18-25
18 Yomoc Yesu Kristoac fingec fingecac siduc. Maria nga Yosefe yeri eweeneng anecdeac yoac dedzege bic anoc nga Maria yeng ine Yosefegoc feyac mi ammaec Tiri Asuarunac medac kpenanggeec. 19 Nga ewea Yosefengo ifi negemma ngic kpetiac kefecac ngicngac yeneac kicfu enembingeha gamekpekpe ammiudeac negenu naric mi anu negen negengua mema tembuhau aikic waudeac negenec.
20 Ye imocac negen negengua mema kecmanu Kebuac angero mongngo ine gauu fingecmima yofi edeec, “Yosefe, Dawidiac kisicfunac, ge enembingecga Maria menadeac mi kengecgubeso. Sabac hereau tacde, ye imoc Tiri Asuarunac. 21 Mariango medac mong meude, yeng kecma ngicngacfora kopocsinginaunac mesiyunuu komoc kpegecde. Imocac ge kpara Yesu mibesena.” 22 Anu Kebungo yoac profete yenearu faiu degec, imocnoc fingecdarudeac ifi fingerec.
Imocac titiha yofi, Anutungo nenanggoc kecde.
24 Anu Yosefengo gauunac yacma Kebuac angerongo yoac edeec, imoc modacma kemma Maria hesickema ameau enec. 25 Enu yeri eweeneng kekec bic mi kecmaecngoc medac fingeru kpara Yesu kparoc.
Mitiyegec 80:1-7, 17-19
1 O Isracelac rama gareng, ge kedzac faima yoacnina negenna. Geng Yosefac areng rama habu isoc wangecyununade. Keruw yeneng miacguma ngictautatacga anggec geng yeneac witiu tacannec, gennoc hama kperagigango nerarannunubesena. 2 Ge Efrayim areng nga Benyamin amma Menasse areng, yeneac kicfu kucga hafoangoc heina kemedaru hama ebicfunac mesinununa. 3 O Anutu, geng monggoc mengerenununa komoc kpenideac kicmesugango mekperaginununa.
4 O Kebu Anutu, kurumenggac wasaiareng kunengngina, ge ngicngacfocga neneac nunumuac ngaba negengkecnec, imoc wisickeudeac tomai kecdimbe. 5 Geng kickumanina gumecnununa imocngo yaka nga dokunina ande. 6 Geng sing meficgena ngicngac wegenac kecdae, yeneng desofoc anemmeandae nga ngabangic yeneng detenic anemmeandae.
7 O Anutu, kurumenggac wasaiareng kunengngina, ge monggoc mengerenunuma kicmesugango nerarannununa komoc kpebisina.
17 Gennoc ngicga meisinggena kuhagoc anudeac amminec, yeng marifoigau tacmanu marigango nanggebesena. 18 Ge ifi anna neneng monggoc mi ngadegunide, kpac. Geng megborinununa geac kpac kuneng kpacma afegunide. 19 O Anutu, kurumenggac wasaiareng kunengngina, ge monggoc mengerenunuma kicmesugango nerarannununa komoc kpebisina.
Dzinta - 24 Desemba, Krismas Nait (Kongac)
Yesaia 9:2-7
2 Ngicngac kudunnu kecdae
yeni kperagi kuneng henggecde;
nga ngicngac homecac bageu kecdae,
yenearu kperagi fingerude.
3 KEBU ge ngicngacfocga yeneac fingecsahe meyadima
sogacsogai kuneng meficgeyemmenec;
ifi anna yeni geac kicfu
uaunac semeng gboria mema sogaiandae ifi isoc sogaigaigecde,
nga dzikacac ngic yeneng
dzikacfunac wiac mehama mederema sogaiandae ifi isoc sogaigecde.
4 Nocac geng warac Midiang yeneac kuc memanec,
ifi isoc ngicngacfocga kudoc kpeyemmema
ayemmegec fuanginau ic kebanga fuama kecgec,
imoc bic kpedzamema meickennec.
5 Dzikac ngic yeneac sepato dzikacfu mekecgec
nga dzikacac ngakpi ngic sacngo hosohosoa
imoc kpedzunegec dzeude
amma imocngo gerecac bingec anude.
6 Imoc yofiac, sabac mong nenannu fingerude.
Nga medac imoc nemmeude,
yeng gawamang ua meu yeac
kpac yofi kpacgecde.
“Dederecgeac ngic gombunga” nga “Anutu Kuctoa Mingina”.
“Amma ye mannina kecengkecfude” nga ye Ruaeac Ngictau,
7 yeac gawamangngo yadiu
ruae wisicwisickea kpac feengkecfude.
Yeng Dawidiac ngictau tatacfu tacma
eucererengnga garenggeude.
Garenggeu dindingac kekeha nga fakaya gombunga
imocngo nanggema meseriu yeng ngictau nasoya kpac kecengkecfude.
KEBU Kuctoa Minginango
ngicngacfora yengena songoya modacma garengnunubeso.
Tito 2:11-14
11 Anutu engenatoa yeac wosoefacngo ngicngac sasawa yenearu fingectegeru komoc kpegecdeac memengerec meficgeyemmeec. 12-13 Ye nga memengerecnina Yesu Kristo, yereng kuc nga kibikperagiau hama fingectegerecde, imocac amma kenehaac tomai kecdimbe. Ifi kecmina Anutuac wosoefacngo metinnunuu yofinenggac bangectoa bangec yomocac faka nga songo ngadehema kekecnina garenggema sing dindingac modacma Anutu eweheimima kecdimbe. 14 Anu Yesu Kristongo singyoac kpekpe arennunac yungecnunuudeac yengenaoc ngabafora maringinau faiemeec. Nga nenang yengena ngicngac amma kpetiac kecma ua gombunga mamangkima menideac faka imoc anec.
Ruka 2:1-14
1-2 Kwiriniungo Siria bangecac gawana kefec, naso imohai Roma bangecac ngictau Sisa Agustongo bangeha bangeha kpacarengngina mengeregecdeac yoac faiu kendarec. Nga imocngo osokporeng hanac hanahea anec. 3 Ifi anu ngicngac sasawango kpacarengngina mengeregecdeac taongngina fekenec, imocacsoc kendacgec. 4 Yosefe ye Dawidiac kisicfunac, imocac amma yeng Gariraia provinsiunac erema Nadzarete wama Yudaia provinsiu Dawidiac taongbisic kpara Betereheng, ihai kenec. 5 Nga enembingeha Maria ye hereagoc anu yegoc yerahafoc kpacngira kpacarennu ohogecdeac kenoc. 6 Yeri ihai kecmaec sabacac fingec fingecnaso haec. 7 Anu yeri amatatacfu titinga mong mi feecac yeri ngadeau tacmaec morocmedacngira fingeru Mariango sangohoma ramaburumaka otou ihai faiu keema feec.
8 Anu toforecfu ramagareng goa yeni Betereheng ama wegenacfu ramafocngina garengyunuma kecgec. 9 Kecmagec Kebuac angero mongngo fingecyemmeu Kebuac kibikperagitoayango mekperagiyunuu yeni kengec ebiria anggec. 10-11 Ifi anggec yeng edeyunuec, “Ngeni kengec mi anggec. Imoc yofiac, yaguc yombong ngeneac amma Dawidiac taonnu Messia Kebungina fingecdac, ye ebicnginaunac mesingunuude. Nga ngicngac sasawa yeac amma ebiriangoc sogaigecde, ni siduc gombung imoc dekperagingemmeduae. 12 Sabac ye merac imoc negenggecdeac ma yomoc ngemmebade, ngeni kemma ramaburumaka otou sabac mong kporucngo birac biranggea feu meficgegecde.” 13 Ye ifi demanu imohaingoc kurumenggac angerohabu kuneng, yeneng fingecma yegoc namma Anutu dengerema yofi degec, 14 “Anutu ohec, wi kurumennu febeso nga bangecfu ruae fingecbeso. Anutungo ngicngac wosoefac ayemmede.”
Mitiyegec 96
1 Kebuac yegec gboria heimibesonga. Bangectoa bangec, ge Kebu yegec gboria heimibesena. 2 Kebu oeha mema yegec heimima yeac kpac kuneng keneheni. Ngeni wenaha wenaha memengerec uayaac yoac edeyunukecbisia. 3 Kebu ye kuc nga kibikperagiagoc, imoc bangeha bangeha ngicngacareng botucnginau dekperagima edeyunugec. Nga yeng kucfaka bibiagoc meec, imoc ngiha ngiha botucnginau edeyunubisia.
4 Kebu ye engenatoa imocac ye oyang boyang memibesonga. Ye tatahau wi yombong tacma anutu hania hania feracyunudacdeac ye kengec nga eweheiheigoc hoanggebesonga. 5 Kebungo kurumenga kurumenga meficyunuec. Nga bangec monnunac ngicngac, yeneac anutufocngina hania hania, yeni ine nemuongasac andacdae. 6 Eweheihei nga ngictauac kuctoa kibikperagiagoc imoc kebuaru fede. Yeac kpetiac amau kuc nga kibikperagia fede.
7 Ngiha ngiha arengnginagoc kecdae, ngeni Kebu dengerema yeac kuc nga kibikperagia afehebisia. 8 Kebuac kpac kuneng imoc kuhagoc nga kibikperagiagoc. Imoc eweheiheigoc hoanggebesonga. Ngeni sese mema yeac amawomongau hama meembisia. 9 Ngeni kpetiac kekec heigec kemeu siricngina gombunga anu Kebu numumibisia. Bangectoa bangecac ngicngacareng, ngeni yeac kicfu kengec amma dzonong fedefedegoc nambisia.
10 Ngeni bangec monnunac ngicngac Anutu mi negemmidae, yeneac botucfu yoac yofi dekperagiyemmebisia, “Kebu ye ngictau. Ye kuc imoc mekecma garengyunuma kecde. Foracngoc, ye bangectoa bangec tatahau faiec, imoc nasoya nasoya seria feu wiac mongngo meu goroc goroc naric mi anude. Ye monde mondea kpac kecma ngiha ngiha faka angammemengina yoacfu isinggema desibesande.”
11 Kurumenga kurumenga ngeni ubangerec negenggec bangecngo sogaibeso. Kondung nga wiac sasawa imohai wakema fedacdae, ngeni udumeng kuneng meficgebisia. 12 Maneng nga semeng ua nga wiac sasawa imohai fedacdae, ngeni sogaibisia. Nga kateu ic sasawa, ngeni sogac sogaiac yegec heibisia.
13 Kebungo hadeac amma yeac kicfu sogaibisia. Ye bangecfu desi desi ua meudeac hama bangec sasawa faka dindingacfu isingyunuma ngiha ngiha faka forau yoacngina desiude.
Mitiwoc - 25 Desemba, Krismas De (Kongac)
Yesaia 62:6-12
6 O Yerusareng ni oda naguyaac gareng meisinggeba
yeng wenacfu me tofonacfu yoara kpac mi tarude.
KEBU negennsinggema kecanneac amma
tacnegengnga kpac ye kpacsambic ammibesena,
7 nga ge engngoc kpacsambic ammima kecmana
Yerusareng ye kuc gboria mebeso nga bangecfu kpackunengngagoc ambeso.
8 Anu KEBUNGO mari foiya sinema yofi deserima deec,
“ni ngabafocga waing me yakaga monggoc mi yemmeba negecde,
nga uaesa mema waingga homecma dokuya tidzohonec,
imoc ngic hereaunac yeneng negecdeac mi negengyemmebade,
9 ammanu damocngo kpememe angngandae
yeneng imoc nema KEBU dengerebisia,
nga waing gbomea mekpedzuc angandaeac dokuya
ine neac kpetiac womonnu nebisia.”
10 Oda naguyau ferecgema kemegec:
Kemema sing wisigecdeac efaigec.
Singtoa wisigec bic; wisima hoc meikegec,
nga firac miagec habuya habuya yeneng imoc hendacbisia.
11 Negendae, KEBUNGO yoac faiu bangec tegia wisickedeu yofi kenec.
“Tsion naroanna ge henna,”
komoc kpeguec ye hade.
Henna ye firang aneac wiac gombung gombung imohagoc hade.”
12 Anu yofi kpacgecde, “Ngicngac Kpetiac” imoc KEBUNGO komockpeyunuyunuya
nga geac kpac ine yofi kpacbeso
“Geac kpacsambic anganna”
amma taon imoc mi ngadehema wanec.
Tito 3:4-7
4 Anu Anutu memengerecnina, yeac danggunuc nga ubaefacngo didiu fingectegeru 5 yeng dzuacnunuu Tiri Asungo ua meu fingec fingec gboria fingering. Ye ua gombunga meinggac amma mi mengerenunuec. Ye nenanggac ubamangang negemma mengerenunuu komoc kpeing. 6 Anu yeng memengerecnina Yesu Kristo yeac amma Tiri Asu ebiriangoc kpakenemmeec. 7 Kpakenemmema wosoefahaac amma dindingac denemmeu kecdimbe. Amma eucererengau emma kekec wisic wisickea kpac, imoc mebesandimbeac negensima tomai kecdimbe.
Ruka 2:8-20
8 Anu toforecfu ramagareng goa yeni Betereheng ama wegenacfu ramafocngina garengyunuma kecgec. 9 Kecmagec Kebuac angero mongngo fingecyemmeu Kebuac kibikperagitoayango mekperagiyunuu yeni kengec ebiria anggec. 10-11 Ifi anggec yeng edeyunuec, “Ngeni kengec mi anggec. Imoc yofiac, yaguc yombong ngeneac amma Dawidiac taonnu Messia Kebungina fingecdac, ye ebicnginaunac mesingunuude. Nga ngicngac sasawa yeac amma ebiriangoc sogaigecde, ni siduc gombung imoc dekperagingemmeduae. 12 Sabac ye merac imoc negenggecdeac ma yomoc ngemmebade, ngeni kemma ramaburumaka otou sabac mong kporucngo birac biranggea feu meficgegecde.” 13 Ye ifi demanu imohaingoc kurumenggac angerohabu kuneng, yeneng fingecma yegoc namma Anutu dengerema yofi degec, 14 “Anutu ohec, wi kurumennu febeso nga bangecfu ruae fingecbeso. Anutungo ngicngac wosoefac ayemmede.”
15 Ifi dema angero yeni kurumennu dzigenema enggec ramagareng yeni yenaocngoc denegeng amma degec, “Betereheng taonnu faka fingeru Kebungo edenunudac, imoc bic kemma henni.” 16 Ifi dema yeni bic kemma Maria nga Yosefe amma sabac oto manau feec, yeni meficyunuma yenenggec. 17 Yenemma angerongo sabac yeac yoac deecmoc, imoc edeyunugec negendacgec. 18 Nga ramagareng yeneng siduc anggec nga ngicngac imoc negenggec, yeni kerectegec andacgec. 19 Mariango ine faka fingechaec, imoc hereau faima negensima kefec. 20 Nga angerongo yoac ramagareng edeyunuec, yeni imoc sasawa fora hemma negemma dzigenema Anutu afec afehe kenggec.
Mitiyegec 97
1 Kebu ye ngictauac kuc minginango bangectoa bangec garenggema kecde. Imocac bangecngo sogaibeso nga kondung tegiau bangec fekendae, yeni ubangerecgoc kecbisia.
2 Hoeng nga kundung kunengngo ye oronggema fedape. Faka dindingac nga sing dindingac, imocngo yeac ngictautatahaac sering seria. 3 Gerecngo waraimiu ngabafora noboc noboc ye oronggeandae, yeni yonohodarude. 4 Yeac piratacngo bangectoa bangec mekperagiu bangec ye imoc hemma dendeng kpeude. 5 Bangec sasawaac Kebu hau tiki yeni Kebuac kicfu pereckema kendo kereha sisingaiande, ifi isoc sisingaigecde. 6 Kurumenga kurumenga yeni yeac faka dindingac dekperagigec ngiha ngiha yeneng yeac kuc nga kibikperagia henggecde.
7 Ngic yeni nemuongaac kicfu ngonducnema numuyemmeandae nga imocac negenggec wiac engena yombong anu yoac homac osoandae. Nga nemuongangina yeni wiac fora mi meficgeyemmegecde, kpac. Yeni game kpekpeu faiyunugec eng nanggecde. Nga anutu hania hania yeni Kebuac kicfu ngonducnemigecde.
8 Ge anutu hania hania isingyunuma yoacngina desinadeac Tsion ye imoc negemma ubangerec meficgeu Yehudaac ngacnaroang yeni sogaigecde. 9 O Kebu, ge Anutu engenatoa yombong nga bangec sasawaac ngic kunenga. Ge anutu hania hania feracyunudacnecac afeguyombonggeni.
10 Kebungo kpetiac ngicngacfora kekecngina onggonggeude. Ngic yeni yarefaka henggec imocac modzongina tiande, Kebungo yeni songogoc hoangyunuude. Ngic goa Anutu ngadehema mangana megecdeac ayemmeande, yeng ngicfora yeneac mariunac mesiyunuude. 11 Ngicngac dindingac kecandae, yenearu ama wereckenude. Nga ngicngac uba kongahagoc kecdae amma herenginau ikoc nga hamangec mong mi fede, yeni sogac sogai meficgegecde. 12 Ngicngac dindingac ngeni Kebuac sogac sogaigoc kecma yeac kpara kpetiac yaiyo kpemibisia.
Seikponoc - 26 Desemba, Krismas 2 (Kongac)
Yesaia 52:7-10
7 Ngic tikiu siduc gombung mehagec
yeneac haniudumengngo
ruae meficgeu
ebicfunac mesimesi fingerec.
Imocac yeng yofi dede,
O Tsion, geac Anutungo firang amma garengnunudeac ge sogaina.
8 Negenggec, KEBUNGO Tsionnu dzigeneude naso imohai baruc ngic
yeneng kicnginango hemma
sogaima uba udumeng kpeturanggema
kunengngoc arohogecde.
9 Yerusareng manganeecac setahau,
KEBUNGO ngicngacfora
meefaiyunuma Yerusareng ebicfunac mesiu komoc kpeec.
Imocac ngeni sasawango arohoma sogacsogai yegec heibisia.
10 KEBUNGO kpetiac maria sineu, bangeha bangeha nga
bangec tegiaunac ngicngac
sasawa yeni
Anutungo komoc kpeyunude imoc kicnginango hendacbesandae.
Hebiraio 1:1-4
1 Anutungo bicngoc naso homac singa hania hania imohai yoara profete yeneac enacfu faiu, yeneng bangecfocnina yoac edeyunukecgec. 2 Nga yofinenggac naso wisic wisickeau ye yoara Medahaac enacfu faiu yeng yoac edenunuec. Bangecfu nga sawau amma kurumennu wiac sasawa fekende, imoc Anutu medahaarusing yegoc meficgeoc nga wiac imoc sasawa medahango meudeac desimiec. 3 Anu Medac ye yengenaoc Anutuac kperagia amma yeri siricngira mocgu andape. Nga Medac ye yoara kucgoc amma imocngo wiac sasawa bangecfu nga sawau amma kurumennu fekendacde, imoc nanggedaru fede. Amma ye ngicngac sasawa nenanggac kopocsic heidzuac ua mesima kurumennu Ngictau kuhagoc yeac foiau enec tacde.
4 Medac ye angero sasawa yeneac kunengngina. Amma yeng kpac kuneng manggahango desimiu meec, kpara imocngo angero yeneac kpac sasawa feracyunuude.
Yohane 1:1-14
1 Hanac hanaheaunacngoc enacyoacngo kefec nga enacyoac ye Anutugoc kefec amma enacyoac ye Anutu. 2 Amma yennoc hanac hanaheau Anutugoc kefec. 3 Nga Anutungo enacyoacfu deu wiac sasawa fingecdarec, wiac sasawa fingecma fekende imoc yea kpac mong mi fingerec. 4 Yearunoc kekec feec nga kekec imocngo ngicngac yeneac kperagi anec. 5 Nga kperagingo kundung mekperagiu kundungngo kperagi imoc semeudeac ambibiema waec.
6 Anutungo ngic mong sueu haec, yeac kpara Yohane. 7 Yeng kperagi imocac hepucngic amma dedekperagi imoc ngicngac mekperagiyemmeudeac haec. Yeng ifi hau ngicngac sasawango yeac amma kperagia imoc negensinggegecdeac negenec. 8 Ye yengenaoc kperagi imoc mi kefec, kpac. Ye ine kperagi imoc mekperagiudeac haec.
9 Anu kperagi fora yombong, yeng bangecfu ngicngac sasawa mekperagiyemmebeso haudeac anec. 10 Anutu ye kperagiango bangec nga wiac sasawa meficgedaru kperagia imocngo bangecfu kefu ngicngac yeneng ine ye mi hensigec. 11 Ye bangehau dzigenemanu arengfora yeneng ama mi heimigec. 12 Nga ngicngac ama heimima kpara negensinggegec, yeni Anutuac nambaracfora anggecdeac deyemmeec. 13 Deyemmeu ngicngac imoc yeni ngic sacfusiunac me sebiac songounac me ngic monggac songounac mong mi fingecgec, kpac. Yeni Anutu yengenaarunac fingecgec.
14 Anu enacyoacngo sebifusiagoc amma botucninau kefec. Kefu medac mocgungo fingecma Manggacarunac kuc nga kibikperagia mekefec, kuc nga kibikperagia imocnoc hening. Henni yearu danggunuc nga yoac fora wake wakea fede.