Sonda - 15 Desemba, Adven 3 (Pepol)
Yesaia 35:1-10
15-21 Desemba 2019
Bangec kisi nga bangec gbangge gbanggea yereng dzaring kibia gombunga angngande isoc sogaiecde,amma kateac dzaringngo monggoc erema dzuria hefiranggeude. Hefiranggeu
2 bangec gbangge gbanggeango
sogaima kunengngoc arohoude.
Ye Rebanong
nga Kamere tiki amma
Sarong tumiatoa yeni isoc kibi kerengngagoc anu ngicngac yeneng KEBUAC kuc kibi kperagi imoc henggecde.
Imoc Anutuninaac kuc kibi kperagi.
3 Imocac ngeni maringina kucha kpac,
nga fafoc mangang kecdae, yeni meseriyunugec nambisia;
4 Amma ngeni ngic kucmamaya kecdae yeni yofi edeyunugec.
“Ngeni serima kengecha kpac nambisia,
Anutungina ye haude.
Nga ye hama ngabafocngina
yeneac turung
kpouma ngeni onggong ngunuude”.
5 Ifi anu ngicngac kic pisic yeni kic fifi anggecde
nga kedzacfong yeni kedzacngina sariu yoac negenggecde.
6 Amma hani mangang yeneng kate burumaka dia isoc nedzigecde
nga yoacngina mi dedea yeni
sogaima arohogecde.
Ammanu bangec kisiunac doku kiwango tohoma mama bangec gbangge gbanggeau sokoma kendacrude.
7 Anu bangec gbangge gbanggea imohai doku dzohong fingerude
nga bangec dokuya kpacfu doku kiwango kporoc kporoctima ereude.
Kate kasi yeneac tatacngo goteng anu
sopoc kpindzinggac turunga komba nga dzamac dzamac yereng ereede.
8 Anu imohai singtoa mong fingecrude,
sing imocac kpara “Sing Kpetiac” degecde,
imohai ngic wonongnginagoc,
nga godzu ngic amma kapa yeneng imohasing mi kengha anggecde, kpac yombong.
Ngic kpetiac yenengsac sing imohai kengha anggecde.
9 Nga raiong yangtoa amma kateac yang goa
yeni imohai mi yenenggecde,kpac.
Ngicngac kpendzennunac mesiyunuyunuya
yenengsac ihai kecgecde,
10 nga ngic KEBUNGO mesiyunuma onggongyunuec,yeni monggoc dzigenegecde.
Dzinema yegec heima songogoc Tsionnu enggecde,
enggec sogac sogai nasoya kpac imocngo irangina anu heigecde.
Nga sogac sogaingo yenearu fefeseri feu kiac songgong
amma asira monggoc mi negenggecde.
Yakobo 4:7-10
7 Imocac ngeni Anutuac bageau kecma mangana minginaac yoac kpema ngadehegec yeng wangunuude. 8 Anu ngeni Anutuac hoannu kenggec yeng ifingoc ngeneac wegenac haude. Manganameme ngic, ngeni maringina dzuacgec nga ngicngac ubayohocgoc kecdae, ngeni ubaherengina dzuacmengere anggec kpetiac anu. 9 Ngeni ubamangang nga ubahodung negemma homac kiacbisia amma dzomocgoc kecdae, ngeni meremma kiacgec nga sogac sogaigoc kecdae, ngeni meremma ubaebicgoc ambisia. 10 Ngeni Kebuac kicfu memaemegec yeng miacngunuude.
Mataio 3:1-12
1 Naso imohai Yohane dokunadzicngo Yudaia bangec kisiu hama ngicngac mitiyoac edekpou ayemmema 2 yofi deec, “Kurumenggac eucererengngo bic mewegenengunudeac ngeni ubangina merenggec.” 3 Nga profete Yesaiango Yohaneac yofi ohoec,
“Bangec kisiu kpakpac mong yofi fingecde, ‘Ngeni Kebuac sing wisima singa heitumeigec.’ ” (Yes 40:3)
4 Nga ye wamba kamele dzoeango memea, imoc heima fadenga mong yangseberango memea, imocngo kebangau dzegeec. Amma ye ipua nga kateac kukundzau nekefec.
5 Anu Yerusaleng ngicngac nga Yudaia provinsiunac amma Yodang doku wegenacfu bangec tackenec, imohacnac yeni amanene yearu kenggec. 6 Kemma kopocsicngina deficgemagec Yodannu doku nadzicyemmeec. 7 Farisaio nga sadukaio homacngo doku nadzicgecdeac hagec Yohanengo yenemma yofi edeyunuec, “Boidzocac gboricfora, ngeni Anutuarunac turunga haudeac ande, imohacnac woragecdeac merang goroyoac edengunuec? 8 Imocac ngeni doku nadzicma ubamerenggac siricfu fora meficgebisia. 9 Nga ge geanggaac yofi mi negengemebesena, ‘Abrahang ye bangecna.’ Anutungo hoc yomoc naric deu Abrahanggac bangecfora fingecgecdenoc, imoc edengunuduae.
10 Naka ic haniau bic faigec fede. Nga ic goa fora gombunga mi angandae, imoc sasawa heiu kpeu gerecfu ukugecde. 11 Ni uba dzigec dzigeneac doku nadzicngemmebade. Nga ngic ngadenau hama kecde, yeng ine Tiri Asu nga gerec nadzicngemmeude. Nga yeac kucngo neac kuc ferahade. Ni ifiango yeac hanitabe hesimiba naric mi ngereeude. 12 Ye meic meicke saraha mariau mehama wit seuhagoc meic meicke sobennu feu imoc fima seuha meickeude. Meickema fora mekpedzuc amma ameau faima seuha wanggema gerec pisic pisickea kpac, imohai ukuu dzeude nga dzebesande.”
Mitiyegec 146:5-10
5 Yacakowac Anutungo ngic monggac memeficngic anude, imohai ngic imocngo kenehagoc anude. Ngic mong ye Kebu Anutu negensima fora fingerudeac tomai kecande, ye kenehagoc. 6 Anutungo kurumeng nga bangec meficgema kondung nga kondung manau wiac sasawa fede, imoc meficgedarec. Ye yoac modac modac Kebu. Ye ifi kecde nga nasoya nasoya ifi kecengkefude nga kecbesande. 7 Ngic goa yeneng ngic ogofocngina ebicfu faiyunugec ubaebicgoc kecgec Kebungo sing dindingac modacma isingyunuma yoacngina desiude. Ngicngac herenginaac homegec yeng yaka gumecyunuude. Kebungo ngicngac witicamau tacandae, yeni witicngina yungerude. 8 Kebungo ngicngac kicpisic kicngina merecgeude nga ngadehokuc ngadengina mesorongaima miacyunuude. Kebungo ngicngac dindingac kecandae, yeni songogoc hoangyunuude. 9 Ngicngac kuric kecgec Kebungo yenenggareng ayemmema ngachotsec ewefocngina homemea nga beging nanggeyunuude. Ngic Anutu ngadehema mangana megecdeac ayemmeande, yeneac singngina ine memanganeude.
10 Kebu Tsionggac Anutu, ye nasoya nasoya geac ngictau anggengkefude. Ye fingecsahega fekefudesoc geac ngictau anggengkecbesande.
Kebu eriendzong memini, hallelu Yac.