Sonda - 08 Desemba, Adven 2 (Pepol)
Yesaia 11:1-10
08-14 Desemba 2019
Isaiac fingecsaheunac sera mong kpeude;nga yeac godeaunac fawango fora anude.
2 KEBUAC Asungo mama yearu kpekataheude-
nga imoc negen negentegec nga negen negeng irecireckeaac Asu,
amma dederecge nga kucac Asu,
nga edekpou nga KEBUAC kengecgoc kekecac Asu_
3 anu ye KEBUAC kengecac dzimbong manau kecma,
kiwango hemma mi desiude;
me kedzahango negemma mi deseriude;
4 ye dindingac fakaya modacma wiaac kpedadanggeandae yeni meficyunuude.
Nga ye bangecac witiu makpekpea kecdae yeni yoacnginaac siricfu modacma desiude.
Ye enarango mangana meme ngicngac gbarucngo bangecfu kpeandae isoc yunuude;
nga bibihango asu fifiu manganameme kpebucyunude.
5 Amma dindingac kekecngo fadenga anu
negen negengsing seriaac kporc hereango kebangau dzegeude.
6 Kate kasi yeneng rama medaha yenigoc kecgecde,
nga wasai pusitoa yeneng noning medaha yenigoc fegecde.
Anu burumaka medaha nga yangtoa laiong amma yang sasawa sebingina mi mamea yeni yenanghafoc kecgec;
nambarac bisic bisic yeneng gareyunugecde.
7 Burumaka ngagerango beagoc yaka neecde,
nga yereac gboricfocngira yeni yenahafoc feyac anggecde.
Anu laiongo ine burumaka ngiwango kpindzing neande isoc neude.
8 Anu sabac yeneng kpate boidzocac kurungngau ariac anggecde,
nga nambarac bisic bisic yeneng maringina faigec kpateac faechau naric keude.
9 Neac kpetiac tikiu kecgecde,
yeni yenaocngoc mi ingiemegecde me memangane emegecde,
nocac bangec yomohai ngicngac KEBU negemmidae, yeni
dokungo kongdung sokoma fede isoc wakema kecgecde.
10 Anu naso imohai Isaiac gaodearunac yeng fingecma ngicngac yeneac ma amma nanude; nanu bangeha bangeha yeneng kpeturanggema eweheimigec, yeac tacnegeng tatahango kibikperagiagoc anude.
Roma 15:4-13
4 Mitikibiu warac wiac sasawa ohodacgec, imoc nenang edekpou anemmegecdeac oho ohoya fede. Yoac negenni imocngo meserinunuma nanggenunuu wiac Anutungo deu fingecnemmebesande, imoc negenseridimbe. 5 Amma Anutungo modzotitia kpac nga nangge nangge minginango meficngunumanu ngeni Yesu Kristoac negen negeng modacgec negen negengngina mocgu ambeso. 6 Ifi amma ngeni ngenahafoc enacurecfu Kebunina Yesu Kristoac Anutu nga Manggac dengeregecde. 7 Nga Anutuac kpac kuneng fingerudeac negemma Kristongo hoangngunuec, ifi isocngoc ngeni hoangemebisia.
8 Ni yofi edengunuduae, Anutungo warac bangecfocnina yenigoc yoac dedzege anec. Nga Kristongo Anutuac yoac fora meseriudeac sebi tosangina herec herecgea yeneac kingang kpekpe anec.
9 Ifi anu bangec monnunac ngicngac, yeneng ifingoc Anutu wosoefahaac amma dengeregec. Imocac yofi oho ohoya fede,
“Imocac ni bangeha bangeha ngicngacareng tosea, yeneac botucfu dengereguma yegecfu kpacga afehebade.” (2Sm 22:50; Myeg 18:49)
10 Amma monggoc yofi dede,
“Bangec monnunac ngicngac, ngeneng yeac ngicngac arengforagoc kpeturanggema ngenahafoc sogaibisia.” (Dser 32:43)
11 Amma mong yofi,
“Bangec monnunac ngicngac, ngeni Kebu fendzonggema dengerebisia. Ngiha ngiha sasawa ngeni Kebu afehebisia.” (Myeg 117:1)
12 Nga Yesaiango torokpema yofi dede,
“Isaiac godeaarunac sera mongngo fingecma bangec monnunac ngicngac, yeneac ngictaungina amma garengyunuu yeneng ye negensinggema kecbesandae.” (Yes 11:10)
13 Anutungo kekecseri deserima faiec, ye negensinggegec yeac sogac sogai nga ruaengo hafoangoc mewakengunubeso. Imoc mewakengunumanu Tiri Asungo nanggengunuu kekecseriac yoacngo ubanegen negengnginau sokongunubeso.
Mataio 3:1-12
1 Naso imohai Yohane dokunadzicngo Yudaia bangec kisiu hama ngicngac mitiyoac edekpou ayemmema 2 yofi deec, “Kurumenggac eucererengngo bic mewegenengunudeac ngeni ubangina merenggec.” 3 Nga profete Yesaiango Yohaneac yofi ohoec,
“Bangec kisiu kpakpac mong yofi fingecde, ‘Ngeni Kebuac sing wisima singa heitumeigec.’ ” (Yes 40:3)
4 Nga ye wamba kamele dzoeango memea, imoc heima fadenga mong yangseberango memea, imocngo kebangau dzegeec. Amma ye ipua nga kateac kukundzau nekefec.
5 Anu Yerusaleng ngicngac nga Yudaia provinsiunac amma Yodang doku wegenacfu bangec tackenec, imohacnac yeni amanene yearu kenggec. 6 Kemma kopocsicngina deficgemagec Yodannu doku nadzicyemmeec. 7 Farisaio nga sadukaio homacngo doku nadzicgecdeac hagec Yohanengo yenemma yofi edeyunuec, “Boidzocac gboricfora, ngeni Anutuarunac turunga haudeac ande, imohacnac woragecdeac merang goroyoac edengunuec? 8 Imocac ngeni doku nadzicma ubamerenggac siricfu fora meficgebisia. 9 Nga ge geanggaac yofi mi negengemebesena, ‘Abrahang ye bangecna.’ Anutungo hoc yomoc naric deu Abrahanggac bangecfora fingecgecdenoc, imoc edengunuduae.
10 Naka ic haniau bic faigec fede. Nga ic goa fora gombunga mi angandae, imoc sasawa heiu kpeu gerecfu ukugecde. 11 Ni uba dzigec dzigeneac doku nadzicngemmebade. Nga ngic ngadenau hama kecde, yeng ine Tiri Asu nga gerec nadzicngemmeude. Nga yeac kucngo neac kuc ferahade. Ni ifiango yeac hanitabe hesimiba naric mi ngereeude. 12 Ye meic meicke saraha mariau mehama wit seuhagoc meic meicke sobennu feu imoc fima seuha meickeude. Meickema fora mekpedzuc amma ameau faima seuha wanggema gerec pisic pisickea kpac, imohai ukuu dzeude nga dzebesande.”
Mitiyegec 72:1-7, 18, 19
1 O Anutu, ngictau ye geac desi desifakaga dindingacgoc kefudeac derecgemina. Ge ni, ngictauac medac, fakaga dindingacgoc ambadeac derecgenenna. 2 Ge ifi anna yeng faka dindingacfu ngicngacfocga yoacngina desibeso nga sing dindingac modacma makpekpea yoacngina desibeso. 3 Tiki yeneng ngicngac ruae meficgeyemmebisia nga fagang yeneng dindingac kekecac fora meficgeyemmebisia.
4 Ngictauac ngicngacfora tosea makpekpea kecdae, yeni yoacfu nanggeyunuma yoacngina deu firang ambisia. Nga ngicngac iwaiac obohoma eng kecdae, yeni meficyunuma wiac yemmebeso. Ngic mongngo ngicngac ogofora ebicfu faiyunuu ubaebicgoc kecgec ngictaungo hemma kpedzameu kuha kpac ambeso. 5 Wenacngo feengkefude, ye ifi isoc kekec herea kecbeso. Nga afo fekefude, ye ifi isoc fekecma ngicngac fingecsahengina fekefudesoc kecbeso.
6 Neni semeng uanina mengereni kiango imohai heiande, ye semeng ua ifia isoc amma kiango bangecfu heiu dokuyagoc angkecde, ye bangec ifia isoc ambeso. 7 Afo imoc nasosoc fekefude, ifi isocngoc ngictauac nasou faka dindingacngo sabayagoc amma ruae kunengtoa fefeseri fekecbeso.