Sondaac areng nga hombang uameme goaac miti
Adven 2019-2020 (Kifa C)
Sonda - 01 Desemba, Adven 1 (Pepol)
Yesaia 2:1-5
01-07 Desemba 2019
Amosiac medac Yesaiango Yuda bangec nga Yerusareng taon yereac kpefing yofi kpeec.2 Kecma naso mong haude imohai
KEBUAC womonggac tikingo tiki sasawa yeneac botucfu engyombonggema nannu,
bangeha bangehaac ngicngac sasawa yeneng nedzima yearu hagecde.
3 Hama ngicngac homacngo yofi degecde,
“ Hagec KEBUAC tikiu enni, nenang Yakoboac Anutu yeac womonnu enni.
Emmina yeng faka gombunga kpounemmeu,
nenang yeac sing modackecnide.”
Modacni dedeseri yoacngo Tsion wama mau,
KEBUAC yoacngo
Yerusarengnunac kennude.
4 Yeng bangeha bangeha yeneac botucfu desidesingic
amma ngicngac homac yeneac ebicngina memaude.
Memau yeni wasaibeangngina kpegec heimeremma kinong anude,
nga kpandabungina kpegec heimeremma uaac beang anude.
Anu habu mongngo habu monggaru kemma dzikac monggoc mi kpeude,
amma dzikacac kpoukpou monggoc mi megecde,kpac.
5 O, Yakoboac esangabo,hagec
nenang KEBUAC kperagiu kenni.
Roma 13:11-14
11 Ngeni faka imoc mekecma naso yomocac negemma efaima kecbisia! Imoc yofiac, neni hanahema Kebu negensinggeing, imohai negenni naso herea isoc feec. Yofinenggac ine komoc kpenide, imocac naso wegenedeac ngeni gauunac gborima yacbisia. 12 Tofocnac bic kpac anudeac ande nga ama wereckenudeac ande, imocac nenang kundunggac angammeme wadacma kperagiaac tebemariku heima mekecbisina. 13 Amma wiac wenackperagiu angana ande, imoc modacbisina. Nenang doku seria nene nga kaisero amma sicsauc faka hania hania, imoc mi angkecbisina. Amma ewekpekpe nga keracmanganggoc kekec wadacbisina. 14 Uba eseaac songongo ngenearu yacbacac ngeni sebinginaac songo mi nanggebisia. Ngeni Kebunina Yesu Kristo ngakpi isoc heima kecbisia.
Mataio 24:36-44
36 Faka imoc noc uamemeu amma aua nofu fingerude, imoc mongngo mi negenbesande. Kurumenggac angero yeni imoc mi negendae nga Medacngo ifingoc mi negende. Manggacngosac naso imoc negende.
37 Noaac nasou faka fingerec, Ngicac Medacngo hau faka siriha imocngoc fingecbesande. 38 Kiatunggbaung mi hamanu ngicngac yeneng nenedoku nema ngic yeni ngacfu kenggec nga manggac yeneng yofi degec, ‘Ni naroanna ngic mibade.’ ifi angkecmagec Noango wageu enec. 39 Enu yeni mi negemma kecmagec kiatunggbaungtoango hama merucyunudarec. Ngicac Medacac hahanasou faka ifiangoc fingerude. 40 Naso imohai ngic yohockang semeng uau kecmaec yerearunac mong mema mong ine wagec uau kefude. 41 Ngac yohockang yeri flawa amau namma flawa hedzamema kecmaec yerearunac mong mema mong ine wagec nambesande.
42 Kebunginango noc uamemeac haude, ngeni imoc mi negendaeac amma ubagbori kecbisia. 43 Hamangecngic ye ama hetackema engande. Nga ama mingina mong ye hamangecngic noc nasou haude negendeu ye gaugbori kecma amea garenggekecma hamangecngic imoc kpae heimiude. 44 Imocac ngeni ifingoc efaima kecbisia. Ngicac Medacac aua ngeni mi negemmagec habesande.
Mitiyegec 122
1 “Nenang Kebuac amau enni.” Yeneng ifi edenugec ubangerec negenai.
2 O Yerusalaim, neni hanininango geac naguusing ekemma odaga manau tinandimbe. 3 Yerusalaim imoc taongtoa isoc megec nande. Imoc meserima mocgutoa megec ama nga ama wegenacfu ifi tackendae. 4 Nga ngicngac neni arenninasoc modacma imohai engandimbe. Imoc Isracel areng neneac dema yoac deserigec fede. Kebuac ngicngacareng neneng ihai emma Kebuac kpac kuneng heiwayong meminide.
5 Ihainoc fora dedeac ngictau tatac faigec homac tacdae, imoc Dawidac esangabo yeneac ngictau tatac sasawa.
6 Ngeni ruae Yerusalainnu feudeac numubisia. “Geac songo negengandae, yeni naric kecma wiac monggac mi obohobisia. 7 Geac odaga manau ruae febeso. Nga amaherec amaga onggonggekecdae, imocac manau mangang kpangang mong mi febeso.”
8 Sactosofocna nga ogofocna yeneng naric kecgecdeac amma yofi debade, “Geac ama manau ruaengo kecbeso.”
9 Kebu Anutuninaac ama, imocac gombunggac amma ngeneng naric kecgecdeac nunumu uatoa mekecbade.