09-15 Yune 2019
Sonda—09 Yune, Tiri Asu maec (Sacsac)
Fingec fingec 11:1-9
1 Bangectoa bangecfu ngicngac sasawa yeni yoacsingngina mocgu nga yoaac ubangina mocgu feec. 2 Yeni wenac ere ereaubigeng kengkecma Sinecar bangecfu tumiatoa mong meficgema imohai kemma kecgec.
3 Imohai kecma yofi denegeng anggec, “Hagec, nenang brik menideac gbaki mema gerecfu ohoni seribeso.” Anu yeni gbaki seria megec brik isoc anec nga bangecac sopo megec imocngo simeng isoc anec. 4 Anu yofi degec, “Nenang taongtoa mong mema tauatoa mong meni engkecma bubuyango kurumeng kpeserebeso. Ifi anu kpac kunenninagoc annide. Nenang singsararang kpema bangectoa bangecfu kembinggac ifi ambisina.”
5 Ifi dema bangecngicngac yeni taongtoa nga tauatoa megec nga Kebu ye imoc henudeac maec. 6 Mama yofi deec, “Negenggec, yeni ngicngacareng mocgu nga yoacngina mocgu nga ua imoc bic hanahema megec tacde. Amma yaguc kemma naso wisickeude yeni ua mong megecdeac deareng anggecde imoc sasawa anggecde. Nga yeni ua imoc mebesonga mi obohogecde nga obohobesandae. 7 Imocac nenang kemema yoacngina mendzicma mesufuni ngic me ngac mongngo ogea wegenac kecde yeac yoac mi negentegecbeso.”
8 Kebu ye ifi dema mendzicyunuu yeni bangectoa bangecfu singsararang kpema kendacma taongtoa mebeso degec imoc wagec. 9 Anu ye amabangec imohai bangecngic yoacngina medzicma mesufuu yeni singsararang kpema bangectoa bangecfu kendacgecac bangec imocac kpara Babel kpacgec.
Aposoro 2:1-21
1 Pentekos tacyacac naso wegenemanu yenahafoc ama mocguu kpedzucnema engensicfu tacgec. 2 Tacmagec kurumennunac udumengtoa mong firang kucgoc kpeande, imocac udumeng isoc ioha yombong fingecma maec. Mama ama tacgec, ihai emma wakeu 3 yeni siriha yofi henggec: Nedzarang gerecborang isoc fingecma ngicngac orucnginasoc tohoma tackenec. 4 Anu Tiri Asungo ubanginau kemema wakeec. Wakeu yoac siriha mong mong degec. Asungo minginasoc meficgeyemmeu yoac dekenggec.
5 Anu yudangic homac bangec noboc nobocnac hahayango Yerusaleng taonnu tacgec, yeni Anutuac yoac modacma kecgec. 6 Nga udumengtoa fingeru habu homacngo imoc negemma hama kpedzucnema kerectegec anggec. Imoc yofiac, Tiri Asugoc yeneng ngicngac yeneac yoacnginausing tembuc tembuc degec negenggec. 7 Negemma kerectegec amma warecyunuma degec, “Ngic yomoc yoac andae, yeni sasawango gariraiangic. 8 Nga yeni dafiu nenang yoacninausing yombong tembuc tembuc degec negendimbe?
9 Neni yoc patangic nga medengic amma erangngic, me Mesopotamia bangecfunac nga Yudaia bangecfunac amma Kapadokia bangecfunac, neni Ponto bangecfunac nga Asia bangecfunac, 10 amma monggoc Firigia bangecfunac, neni Pamfiria bangecfunac nga Aigita bangecfunac amma Ribia bangecfu Kirene ama tegia tegia, imohacnac amma Roma taongtoaunac hading. 11 Amma yudangic nga bangec monnunac ngic yudangic yenigoc torokpegec, kretangic amma arabiangic. Nenang ifingoc kecma yoacninasoc Anutu fakatoayaac yoacsiduc degec negendimbe.” 12 Ifi dema kerectegec amma obohoma denegeng amma degec, “Faka fingecde, imoc wiac siriha mong yombong, imoc mi negentegecdimbe.”
13 Goango ine yeneac deendema amma yofi degec, “Yeni waingdoku homac nedauac ubangina sufude.”
14 Ifi degec Petoro ye tosofora 11 yenigoc namma ubea meyadima yofi edeyunuec, “Yudangicngac amma ngicngac sasawa Yerusalennu kecdae, ni faka yomocac hania dekperagingemmeba negenggec. 15 Ngeni ngic yomoc yenemma yofi negensidae, ‘Waingdoku nema ubangina sufude.’ ifi kpac. Yaguc asoac 9 kirocsac andeac waingdoku mi nedau, kpac. 16 Nga faka yomocacnoc, profete Yoelengo yoac yofi deec,
17 ‘Anutungo yofi dede, “Naso wisickebeso ammanu ni Asuna kpakeba mau ngicngac sasawango medacbesandae. Amma naroang medacfocngina yeni profeteyoac degecde nga sebigborifocngina onga henggecde amma yadafocngina gaukpefing henggecde. 18 Amma naso imohainoc ni enac tofoc tofoho ngicngacfocna, yenearu Asuna kpakeba mau yeni profeteyoac degecde. 19 Amma deba wi sawau soi fingerude. Nga emu bangecfu faka bibiagoc siria hania hania fingerude. Naso imohai sac nga gerec amma hosuctoa fingerude. 20 Kebuac nasotoaac kuc kibikperagiagoc mi fingecmanu wenackiwa meremma kundung kpeude nga afokiwa sac isoc anude. 21 Anu Ngicngac yeneng Kebuac kpac kpacgec Anutungo yeni sasawa kopocsicnginaac ebicfunac mesiyunuu komoc kpebesandae.” ‘ (Yle 2:28-32)
Yohane 14:8-17
8 Ifi deu Firipongo deec, “Kebu, ge Manggac edzacnununa henni socnunuude.” 9 Ifi deu Yesungo yofi edeec, “Firipo, ni naso herea ngeneac botucfu kecbare ge mi negennunec. Ngic mong ye nenec, yeng Manna henec. Nga dafiac Manggac edzacngunuba henggecdeac denec? 10 Ni Manggacac hereu kecduae nga Manggacngo neac hereu kecde. Ge imoc mi negensinggenec me? Yoac edengunuanduae, imoc neanna ubaac mi debade, kpac. Manggacngo neac hereu kecma ua imoc mekecde. 11 Ngeni yoacna yomoc negensinggegec, ni Manggacac hereu kecduae nga Manggacngo neac hereu kecde. Ifi deba obohogecdeu uana meanduae, imoc negensinggebisia.
12 Foracngoc, mong ye ni negensinnude, ye ni ua meanduae, imocngoc meude, imoc edengunuduae. Amma ua mekefai, yeng imoc ferahema monggoc meude, nocac ni Manggacaru kembade. 13 Medacngo Manggacac kuc nga kibikperagi heficgeudeac amma ngeni wiac sasawa neac kpacfu kpesigec, imoc ambade. 14 Amma wiac monggac neac kpacfu kpesinenggecdeu ni imoc ambade. 15 Ngeni heregoc neac songo negenkecdaeu singyoacna modacgecde.
16 Anu neng Manggac kpesimiba yeng memeseringina mong ni isoc ngemmeu yeng ngenigoc nasosoc kefude. 17 Amma ye yoac foraac Asu. Nga bangecfunac ngicngac yeni ye naric mi megecde. Yeni ye mi hengandae nga ye mi negemmigecde. Nga ngeneng ye negemmidae, ye ngeneac botucfu amma herenginaunoc kefude.
Mitiyegec 104:24-35
24 O Kebu, ge wiac hania hania medacnec, imocac kpetea engena yombong. Ge negen negentegecgango imoc sasawa mena wiac sasawa kekecnginagoc yeneng geac marikibiga amma bangec mewakedae. 25 Kondung ye kuneng kpererema edi feu kondungyang nga yang kuneng kapia hania hania homac yombong imocac manau fedae, yeneac kpete naric mi osodacnide. 26 Wage yeni imohai kengha angkecdae. Nga geng kondunggac kondungyang kuneng ifingoc meficyununa yeneng kondunnu yuengyuma anggecde.
27 Wiac imoc sasawa yeni kicngina gearu figec geng nasoya hau yaka yemmenadeac negeung kecgec 28 geng wiac yemmena imoc mekecgecde. Geng mariga mederena yeni wiac gombunga homac negebec angkecdae.
29 Ge kicga yenearu sufuna yeni kpidohoma kengecyunuude. Ge asungina wangecyununa yeni homema bangecnginau monggoc dzigenegecde. 30 Geng meficyunuma Asuga monggoc fifina yeneng monggoc gborigecde. Ge bangecac siriha heigborikecna monggoc gboria fingerude.
31 Kebuac kuc nga kibikperagi imoc nasoya nasoya feengkecbeso. Kebungo marikibia hemma ubangerec negembeso. 32 Yeng kiwa bangecfu fiu bangecngo dendeng kpeu mariango tiki kpesereyunuu tikingo hosuc kpegecde.
33 Ni kekecna kecbadesoc Kebu yegec heimibade. Ni kekecna kecma Anutu dengerekecbadengoc. 34 Ni kebuaru sogac sogai meficgekecma yeac wiac hennegeng angkecba yeng imocac negenu ngereebeso. 35 Ngic kopocsicgoc bangecfunac meicyunubesonga nga ngic Anutu ngadehema mangana megecdeac ayemmeande, yeni kpac ambisia.
O ubaongana, ge Kebu kenehena. Kebu eriendzong memini, hallelu Yac.