YESUAC
MEKPERAC KPERAGI
YOHANENGO OHOEC
Yohanengo kpefing deec
1
aYoac yomoc Yesu Kristoac memekperagi.
Yeac wanacngicngacfora yeni wiac bic fingerudeac edzacyunubeso imoc Anutungo Yesu miec.
Amma angeroya mong sueu yearusing yoara dekperagima wanacngiha ni Yohane,
yoac imoc edenuec.
2 Edenuu neng Anutuac yoac nga Yesu Kristoac dedekperagi amma wiac neannaoc hennegeng anai,
imoc sasawa mekperagingemmeduae.
3 bNaso wegenedeac mongngo profeteyoac yomoc osonegeng anude,
ye kenehagoc.
Nga ngicngac yeni yoac yomohai oho ohoya fede,
imoc negemma hoanggegecde,
yeni ifingoc kenecnginagoc.
Kpebung yeneac kibi
4 cNi Yohanengo Asia provins manau kpebung 7 kecdae,
ngeneac kibi yomoc ohoduae.
Anutu kefec nga kecde amma kecma habesande.
Ye nga asu 7 yeac ngictau tatacac hoangau kecdae,
yenearunac ruae nga danggunuc imocngo ngenigoc febeso.
5 dNga Yesu Kristoarunac ifingoc.
Yeng yoac modac modac seria amma ye siducdedengic fora.
Ye fingecma,
homegec yeneac waracmedac anec.
Amma bangecac ngictau yeneac kunengngina kecde.
Amma ye nenang songo negemma sawango kopocsicninaunac mesinunuec.
6 eMesinunuma eucererenggac habu menunuma yegoc arennunuu nenang yeac Anutu nga Mamaac kurumenggac womonggareng amma kecnide,
imocac ifi anec.
Yearu kibikperagi nga kuc imoc wisic wisickea kpac fekengkecbeso,
imoc fora.
7 fHenggec,
ye hoenggoc hau ngicngac sasawa yeneng kicnginango hendacbesandae nga sebiau nenesari ammigec,
yeni kicnginango ye ifingoc henggecde.
Nga bangeha bangehaac areng sasawa yeni ye hemma fagung madzacgoc kiacbesandae.
O,
imoc fora.
8 hKebu Anutu ye kefec nga kecdenoc amma kecma habesande,
ye Kucseri minginango yofi dede,
“Ni neannaoc A nga Y,
hanac hanahea nga wisic wisickea.”g
Kristo henec
9 Ni Yohanengo Anutuac yoacac nga Yesuac dedekperagiac amma Patmos nucfu kefai.
Ngeneac dacngina,
ngeni nga ni nenahafoc Yesugoc kpeketahema kpendzeng nga eucerereng mekecma modzotitia kpac seria kecdimbe.
10 Kebuac naso kereng monnu Asungo nearu ua meu ngadenau enacudumeng kunengtoa mong trampet udumeng isoc negembare yeng yofi deec,
11 “Ge wiac hennecmoc,
imoc kibiu ohona.
Ohoma kpebung 7 Efeso nga Simirna amma Peagamong nga Tiatira amma Sarde nga Firadefia amma Raodikea,
ge kibi imoc yenearu faina kenu.”
12 Ifi deu udumeng imoc hembadeac dzigeneai.
Dzigenema hemba kifa nanangagoc 7 golngo memea nanggec yenenai.
13 iYenembare yeneac botucfu mongngo Ngicac Medacac siric isoc nanec.
Ye ngakpia herea hani susia kpesec kpeserea nga mokuhau fadeng golngo dzege dzegea feec.
14 kYe orucsira nga orucdzoeya kongac kongac imoc ramadzoeya nga hoeng isocj amma kiwa imoc gerec borang isoc.
15 Nga aieng sacsac gerecfu ohogec wewengaima feande,
ye hania imoc isoc anec.
Nga enacudumenga,
imoc doku homac yeneac udumeng isoc anec.
16 lYe marifoiau asomeng 7 menanec nga enaraunac wasai beang mana ngadea enaragocngo ereec.
Kicmesuya imoc wenackiwa kuhagoc neraranggeande,
ifi isoc anec.
17 mNga ye hemma haniau manuu homemea isoc febare yeng marifoiango witinau faima deec,
“Ge mi kengecguu,
ni hanac hanahea nga wisic wisickea amma kekecnagoc.
18 Henna,
ni homeai nga monggoc gbori kecduae.
Nga negenna,
ni wisic wisickea kpac kecengkecma homec nga homecama yereac ki mekecduae.
19 Imocac ge wiac hendang imoc ohona.
Ge wiac yaguc fede nga ngade fingerude,
imoc momoc ohona.
20 Asomeng 7 marifoinau menandua nga kifa nanangagoc 7 golngo memea hendang,
imocac negen negeng sufu sufuya yofi ande,
asomeng 7 yeni kpebung 7,
yeneac angero.
Nga kifa nanangagoc 7 yeni kpebung 7 andae.”