Asuac namu
2
aNgeni ngaba hania hania nga ikocfaka amma keracmanganggac faka wama ngicngac mi demanganeyunubisia.
2-3 Kebu ye gombunga,
ngeni imoc bic tobanggegec.
Imocac ngeni sabac gboriango namuac ammiande,
ifi isoc Asuac arennu namu kongaha imocac angemmebeso. Ngeni imoc nehemma yadimagec yeng ebicfunac mesingunuu komoc kpegecde.
Womonggareng kpetiac
4 Kebu ye hoctoa kekehagoc,
ngeni yearu habisia.
Ngic yeneng hoc imocac hoc mangana dema meickegec.
Nga Anutungo imocac negenu siriha engena anu imocnoc meisinggeec.
5 bNga ngeni ifingoc hoc kekehagoc yeac siric andae.
Nga Anutungo asu ama mengunuande.
Mengunuu ngeni yengena womonggareng kpetiac amma Asuac sinnu sese faigecde,
imoc Yesuac amma Anutungo henu ngereeude.
6 cImocac mitikibiu yoac yofi oho ohoya fede,
“Negenggec,
ni hocwotung mong siriha engena imoc meisinggema Sionnu gununggebade.
Ngic mongngo ye negensinggeude,
ye gamekpekpeu naric mi enude nga embesande.” (Yes 28:16)
7 Ngicngac ye negensinggema kecdae,
ngenearu hoc imocngo siriha engena ande.
Nga mi negensinggedae,
yenearu yofi fingerude,
“Amameme ngic yeneng hoc mong mangana dema ukugec.
Nga hoc imocngo amaac hoc wotung amma seria nanude nga nambesande.” (Myeg 118:22)
8 “Nga yeni hoc imohai kpondzong heigecde nga peperandziu tifainggema negemmangang meficgegecde.”
(Yes 8:14)
Yeni Anutuac yoac kpeandaeac ifi anggecde, yoac imoc yeneac bic dedea.
9 dAnu ngeni Anutuac faka kuhagoc dekperagigecdeac Anutungo ngeneac areng meisingngunuec.
Meisingngunuma ngeni yengena areng ngicngac kpetiac anggecdeac mengunuma ngictauac arennu faingunuu womonggarengua mekecgecde.
Yennoc kundunnunac hagecdeac kpacngunuma kperagiau heitaingunuma yengena kperagi engena nga songea, imohai faingunuec.
10 eNgeni warac ngicngacareng mocgu mi kecgec,
kpac.
Nga yaguc Anutuac ngicngacfora amma yeac areng kecdae.
Ngeni warac Anutuac wosoefac mong mi hengkecgec.
Nga yofinenggac yeac wosoefac hemma kecdae.
Ngicngac goa negen negensingngina kpac
11 fSongo tosofocna,
ngeni bangec yomohai kuric kecdae,
imocac ngeni uba eseaac negensongo hania haniango ubaonganginagoc dzikac kpeande nga ngeni imoc wama kecgecdeac gorongina kpema deduae.
12 gNgeni bangec monnunac ngicngac,
yeneac botucfu faka nga angammeme gombunga angkecbisia.
Ifi anggec yeni ngeneac dedeseriyoac kpekpeareng dema enacfu faifai angemmema angammemengina gombunga henggecde.
Ifi hemmagec Anutungo yeni yugucyunuu naso imohai dengeregecde.
Enara yeneac eweheihei
13 hNgeni Kebuac amma kia gawamang,
yeneac enac tofohobisia.
Imoc ngictaungo kuc sasawa mekecde nga
14 yeac bageau gawana sasawa.
Yeng uayoac yemmeu yeneng ngicngac angammemengina mangana angkecdae,
yeneac turung kpouyemmegecde.
Nga faka gombunga angkecdae,
yeni dengereyunugecde.
15 iNgic yeni negen isingngina kpac wiac mong mi negentegecdae,
imoc ngeni angammemengina gombungango enacngina midomebisia,
imocngo Anutuac songo ande.
16 Ngeni witicfu mi kecdae nga witiha kpac kekec,
imocngo angammemengina mangana mi kperahebeso,
kpac.
Ngeni Anutuac wanacareng kecbisia.
17 jAmma ngeni ngicngac sasawa ewengina heima negen negensinggoc tosofocngina heresongogoc hoangyunubisia nga Anutuac damungunubeso amma ngictau eweheimibisia.
Kpendzeng
18 kWanacngic kecdae,
ngeni mingingfocngina yeneac enac hafoangoc modacma ewengina heima kecbisia.
Ngeni mingingfocngina yumea nga gombunga amma gori goria momoc ifingoc ayemmekecbisia.
19 Ngic mong ye Anutuac yoac ubahereau feu imoc modaru goango kopocsiha kpac hemmaguc sifu ebicfu faigec kpendzeng kpeudeu faka imocngo danggunuhagoc anude.
20 lNga ngic yeneng kopocsicnginaac amma ngunugec ngeni kpendzennu emma imocac bageu seria kecgecdeu imocngo dedengerecac wiac mong mi ande,
kpac.
Ngeni ine angammemengina gombunga ammagec kpendzennu faingunugec imocac bageu seria kecgecde,
imocngo Anutuaru danggunuhagoc anude.
Kristoac hanititi
21 mNgeni ifi anggecdeac Anutungo kpacngunuec.
Anu ngeni Kristoac hanititi modacgecdeac yeng ngeneac amma kpendzeng kpema sing imoc edzacngunuec.
23 nNga yeni defagoc ammigec yeng turunga sowecyoac mong mi merenec.
Nga kpendzeng kpema dekengec mong mi ayemmeec,
kpac.
Ye ebiha Anutungo yoac dindingac desikecde,
yeac mariu faiemeec.
24 oYe yengena sebiango nenang kopocsic atickema icfu nanec.
Nanu nenang kopocsicfunac homema sing dindingac modacnideac ifi anec.
Nga yeac kubecngo ngeni hafeidzoicfunac ngerec ngeree meficgengemmeec.
25 pNgeni warac rama isoc sing segema kecgec.
Nga yofinenggac ramagarenggaru bic dzigenegec yennoc ubaongangina henggareng angemmeude.