53
Anu ngicngac yeneng yofi degec,
“Merang yoac yomoc negemma negensinggede?
Nga merang KEBUNGO faka kuhagoc meu henec?
2 KEBUNGO uangiha wau bangec
dokuya kpacfu icngo nangande isoc nanec,
ye siriha gombunga kpacac amma heitaiyunuu yearu mong mi kenggec.
Nga ngicngac yeneng siric dafi ye hennsongo ammibau.
3 Ngicngac yeneng ye desopec ammima modzongina tiu ngadehegec.
Amma yeac songo mong mi negenggec.
Ye ubahodung nga kpendzenggoc kefec,
nga ngicngac yeneng ye hembeso
wayombonggema ngic mong mamea isoc kicngina yearunac sufuma ngadehegec.”
4 Fora yombong ye nenang
kucmamanina nga hafeinina atickeec,
ammanu nenang negenni Anutungo ye yengena kopocsicac
amma kpedzongaac kpema memeting mide isoc anec.
5 Nenang kopocsicnina nga mangananinaac
ammanoc ye kpendzeng kpeec.
Nga sebia kperecgegec kpendzeng kuneng negenec.
Amma yeac kubecngo hafeidzoicfunac ngerec ngerec meficgenemmeec.
6 Nenang sasawango rama sufusufuya
isoc songoninaac areng kecma
angamemeninaac turunga mebinggacsoc.
Ammanu KEBUNGO imoc sasawa uangihaac witiu faidarec.
7 Nga mangana ammigec yeng imocac turunga yoac mong mi deec.
Amma ye memaemema
ebicfu emma enac mong mi anggeec.
Ye rama medaha kpebucgebeso mekengandae nga rama sebi dzoeya merecgebeso angandae isoc mekenggec yoac mong mi deec.
8 Yeni witicngic witicamau faiyunuandae isoc yoacfu eng mekemma faima homeudeac yoara desigec.
Nga yeac arennunac merang ye kaso ammibac?
Imocac ye gbori kekec bangecfunac meickegec,
nga nenanggac manganaac amma donina meec.
9 Anu manganameme ngic bic homegec,
yeneac botucfu tonggobeso mekemma
ngic mong dzofinactoayagoc yeac hockedzebeu tonggogec.
Ye nunaguba me kibakpeba ngic kpac amma yeac enacfunac ikoc yoac mong mi negenggec.
10 KEBU yengenaoc uangiha tidzameu kpendzeng kuneng kpeec.
Nga KEBUNGO yeac kekeha wau kopocsic meicmeikeac sese anudeu,
ye kekeha mehereeu kecma esangabofora yenenude.
Amma yeac ua imocngo KEBUAC songo mekperagiude.
11 Kpendzenggac ngadeau
ye kperagi hemma songo negenude.
Dindingac nga negen negentegegec uangicna,
yeng ngicngac homac yeneac kopocsic dzuaru kpetiac anggecdeac ebic mema
yeneac kopocsic atickeec.
12 Imocac amma KEBUNGO kpac kuneng miu,
dzikacac enara dzikacfunac wiac megec imoc yeng mederema yemmeec.
Nocac ye henggec manganameme yenearunac mong isoc anu kpegec homeec.
Nga
kopocsicmeme ngicngac homac yeneac amma numuec.