PETOROAC KIBI 1
Kibi hanac hanahe yoac
1
Ni Petoro,
Yesu Kristoac aposorongo meisingfora Ponto nga Garatia amma Kapadokia nga Asia amma Bitinia bangectoau israengicngac singsararang kpema kuric kecdae,
ngeneac kibi yomoc ohoduae.
2 aAnutu Manggacngo bic negenu feecac yeng meisingngunuma yofi desiec,
Tiri Asungo ngenearu ua meu yadiseri amma kpetiac anggecde.
Ifi amma ngeni yeac enac tofohogec Yesu Kristoac sacngo kpegiu nadzicngemmeec kecdae.
Yeac danggunuc nga ruaengo ngenearu sahema febeso.
Wiac ngade habesande
3 Nenang Kebunina Yesu Kristo,
yeac Anutu Manggac kenehebisina.
Yeng wosoefactoa kpenemmema Yesu homecfunac megboriec.
Sing imohai nenang kekec meficgenemmeu fingec fingec gboria fingering.
Ifi fingecma yeac wiac kekehagoc fingecnemmebesande,
imoc negensinggema kecdimbe.
4 bYe ifi amma kurumenga kurumenga fekende,
imohai bangecnina tini enudeac bic faiec fede.
Nga wiac imoc mi kpac anude amma imoc naric mi dzameude,
imoc kongaha feengkefude.
5 cNgeni negen negensinggoc kecmagec Anutu ye kuhagocngo garengngunuu naso wisic wisickeau komoc kpebesandae.
Imoc fingerudeac efaima fede.
6 dAnu naso kapianec yomohai ebic nga faitobang hania hania fingecngemmeu ongangina dzokonemanu ngeni sifu wiac ngade haude nga habesande,
imocac negemma mamangkima sogaima kecbisia.
7 eGol siriha negendimbe.
Ngic yeneng imoc tobanggema siriha henggecdeac gerecfu faigec dzeu isinggeandae.
Gol fora ye fingectegerude nga imoc sifu ngade kpac ambesande.
Nga negen negensingngina fora,
imoc gol ferahema wiac engena anude.
Yesungo fingectegecbesande,
naso imohai negen negensingngina imocngo dedengerec nga kuc kibikperagiagoc amma eweheihei meficgeude.
8-9 fNgeni ye kicnginango mi henggec amma sifu yeac songo negendae.
Nga yofinenggac ye mi hengandae amma ngeni sifu ye negensinggegecde.
Amma ngeni ye negensinggegec,
yeng ubaongangina kopocsicac ebicfunac mesingemmeu ngeni komoc kpebesandae.
Ngeni imoc negensima sogac sogai ebiriangoc amma kecdae.
Anutungo areng faiec
10 gProfete yeni ngeneng Anutuac wosoefac megecdeac kpefing degec amma yeni komoc kpekpea sing negengireckegecdeac uatoa mekecgec.
11 hIfi anggec Kristoac Asungo yenearu kecmanu Kristongo kpendzeng kpema ngade kuc kibikperagiagoc mebesande,
imoc Kristoac Asungo herenginau kefecac kpefinnu bic edzacyunuu dekperagingemmegec.
Amma imoc meracac yoac nga noc nasou fingeru henggecdeac kicfifi anggec.
12 Kicfifi amma yenang meficemegecdeac kpac,
imoc ngeni meficngunugecdeac yoara dekperagingemmegec,
Anutungo imoc edzacyunuu yeni ireckegec.
Kecma Anutungo Tiri Asu kurumennunac bangecfu sueu mama siduc gombung dedengic kuc yemmeu,
yeni yoac imoc mema dekperagingemmegec ngeni imoc negenggec.
Nga Angero yeni imoc ifingoc henggecdeac ayemmeande.
Kekec gboria
13 Imocac meheng kpeheng amma ubanegen negengga isinggema geanggaoc garengememana Yesu Kristoac hahanasoya fingectegeru imohai wosoefaha mehabesande,
ge negen negengga yeac wosoefacfu hafoangoc seria faina febeso.
14 iNgeni warac siduc gombunggac yoac mi negentegecma sebiac songo modacgec.
Amma ngeni enac tofoc tofoho nambarac isoc kecdaeac sebiac songongo monggoc mi garengngunubeso.
15 Anutungo kpacngunuec,
ye kpetiac nga ngeni ifi isoc faka nga angammemengina hafoangoc kpetiac ambeso.
16 jImocac yofi oho ohoya fede,
“Ni kpetiac,
imocac amma ngeni kpetiacngoc kecbisia.” (Sese 11:44-45; 19:2; 20:7)
Kristoac sacngo bummenunuec
17 kAnutu ye monde mondea mi femide nga yeng ngicngac tembuc tembuc angammemenginaac sirihau yoacngina desiude.
Nga ngeni ye “Manggac” kpacandaeu,
ngeni yei kurickekecac nasonginau eweheimima kecbisia.
18 Ngeni warac bangecfocngina yeneac sicsauc fakau kecmagec Anutungo bungngina mema meisingunuec,
imoc silwa me golngo kpac nocac silwa nga gol imoc kpac anecde.
19 lYe Kristoac sacngo bummengunuec.
Nga Kristoac sac imoc wiac engena yombong,
imoc rama medaha mong puringa kpac nga ebiha kpac,
yeac sac isoc.
(Mke 12:5; 29:1;
Sese 22:17-25)
20 mBangec nga kurumeng mi fingecmaec Anutungo Kristo bic meisinggeec.
Meisinggeu yeng yaguc naso wisic wisickeau nenanggac amma fingectegerec.
21 nFingectegecma sing meficgenemmeu yofinenggac Anutu negensinggema kecdimbe.
Ye medaha homecfunac megborima kuc nga kibikperagi miu nenang Anutu negensinggema yearu negen negennina naric fainide.
Anutuac yoac fekengkefude
22 oNgeni yoac foraac enac tofohogec,
imocngo ubaongangina dzuaru ubaherenginaunac songotoa ereu ngeni tosofocngina heresongogoc hoangyunugecde.
23 Anutuac yoac imoc kekehagoc amma seria nande.
Yoac imocngo megboringunuu fingec fingec gboria fingecgec.
Kpea imoc dzonggo dzonggoa kpac imocngo nemonggema kekecserigoc anude.
24 Imocac yoac yofi oho ohoya fede,
“Ngicngac sasawa bangecfu kecdae,
yeni kpindzing isoc amma kibikperagingina imoc dzaring dzuria isoc.
Yeni kpindzing dzanggeande nga dzaring dzuria moronggeande,
ifi isoc dzanggegecde.” (Yes 40:6-8)
25 Anutuac yoacngo ine fefeseri febesande.
Imocngo siduc gombung ande nga ngic yeneng imoc edekpou angemmegec negenggec.