Aakaa chaa chii aspaayimututimihkw chiiyaaniu chikuiskutaatisiiwininiu
3
1 Aakw maak niichishaanitikw, aashkw aahaakaa chiishihtaayaan uu kaa misinihaamaatikuch chiwiih iititinaawaau chaa chii miywaayihtimaakw tipaayihchichaasiu aa tipaayimitaakw. Nimui wiyaash nitiiitaayihtaan miin chaa chii aayimuutimaatikuch taan kaa iitisinihamaatikuch utih utaahch, waash chiki tikun taan chaa iishi wiichihiikuyaakw uu.
2 Yaakwaamiishtuwaahkuch anichii kaa kaachiishihiiwaach, nitiwii mikw kaah aaihyitich, anichii kaah iyich paatish chischinuwaachishumaakiniwiyichaa awaayiuh aniyaayiu Jew iiyiyiu aashihtwaayich iyaakw chaa chii utiiyiyimitaakuyich Chishaaminituu.
3 Chiiyaaniu aaukw taapwaah waatiyiyimitaatihkw Chishaaminituu, chiiyaaniu utihchaahkw kaa wiichihiitiyitihkw aa ayimihaashtuhkw kiyaah chii chistaayihtaakuhaaniu Christ Jesus wiiyi aa chiih tutaatihkw chaa chii utiiyiyimitaatiyitihkw Chishaaminituu. Nimui wii wishch chiyaanaach taan aayihtutaasuyihkw chiki chii uhchi aspaayimuunaaniu.
4 Niiyi aaukw taapwaah chipih chiih tikun taanitaah chaa chii uhchi aspaayimuuyaan. Mishuu aa taakwaa awaan aa iitaayihtihk chaa chii aspaayimuututihk ushch aa iishi naanaakichihtaakiniwiyich chaakwaayiu niiyi austaa tikun an chaa chii uhchi iitaayihtimaan.
5 Waash nichii chischinuwaachishukiwin niyaanaanaau tihtu chiishikaauh kaa ishpish pimaatisiiyaan. Anitaah Israel iiyiyiuch aah taach nuuhchiin. Aniyaa pinchimin aah taat nichii uhchi aanischaa pimaatisiin. Chihchiwaa taapi Jew iiyiyiu niiyi. Mitun nichii kiniwaayihtaan wiishuwaawin maakwaach Pharisee kaa iitaapitisiiyaan.
6 Kaa ishpish aashihchaayihtimaan aa wiih niihiiwaahiik Chishaaminituu taan aa iishi wiyishtaach wiishuwaawinihch, nichii ninaahkaachihaauch umaamuuayimihaauch. Mitun nichii ninihiihtin wiishuwaawin. Nimui awaan nipih uhchii iitikw aahaakaa misiwaa uhchi niniihtimaan wiishuwaawin.
7 Anihii chaakwaanihii aa chii mimihchihiikuyaan aa chii iitaayihtimaan shaash nimi nipischaayihtaan, nichiiwaapinaan atitiu chaa chii chischaayimik Christ.
8 Nimui maak mikw anihii chaakwaanihii kaah aayimuutimaan nuuhchi waapinaan. Misiwaa kutich chaakwaan nimui mitun nitiyaapitaayihtimihiikun aa ishpish atitiu iitaayihtaakuhch taapwaah aa chischaayimik Christ Jesus nitipaayihchichaam. Wiiyi uhchi aaukw waahchi pichishtaayihtimihiikuyaan misiwaa uhii chaakwaanihii, waapinaasun niti iitaayihtimihiikun uhii chaakwaanihii, wiiyi chaa chii wiichaauk,
9 Kiyaah maak taapwaah wiiyi aah taat chaa chii iishi tipaayihtaakusiyaan. Nimui shaash nitiiitaayihtaan aa kuiskutaatisiyaan mikw an aa niniihtimaan wiishuwaawin, waash aa taapwaayaayimik Christ. Aaukw uu Chishaaminituu aah taat kaa uhchipiyihch. Mikw taapwaayaayihtimuwinihch uhchi iyaau awaan uyaayiu kuiskutaatisiiwiniyiu.
10 Nitiwaayihtin mitun chaa chii chischaayimik Christ, chaa chii chischaayihtimuch nipimaatisiiwinihch aniyaayiu suuhkaatisiiwiniyiu kaa winishkaanikut nipiwinihch uhchi, chaa chii ninaahkaataayimuyaan kiyaah niiyi taan kaa iishi ninaahkaataayimut wiiyi. Kiyaah chaa chii pichishtaayimiisuyaan kiyaah niiyi chaa chii nipiyaan muyaam wiiyi kaa iishi pichishtaayimiisut.
11 Aa pikusaayihtimaan kiyaah niiyi chaa chii winishkaanikiwiyaan nipiwinihch uhchi.
Paul suuhk kaa kuchihtaat chaa chii pikuhtimaasut aniyaayiu kischihuwiniyiu Chishaaminituu chaa miyikuukupinaa
12 Nimui kiyipwaa wii nishin shaash mitun aa iitaayihtaakusiyaan uu kaa iishi pikusaayimuyaan kiyaah maak mitun chaa chii iitaayihtaakusiwich aniyaayiu kaa iishi nitiwaayimit Chishaaminituu chaa chii iitaayihtaakusiwich. Mikw maak suuhk nikikuchihtaan an chaa chii iitaayihtaakusiyaan, waash shaash nitipaayimikw Christ Jesus.
13 Uu maak kaa iyaan niichishaanitikw, nichischaayihtaan aashkw aahaakaa chihchiwaa uu iitaayihtaakusiyaan mikw maak paayikw chaakwaan nituhtin, nimui nitiyaapitaayihtaan taan kaa iitaayihtaakusiyaan anitaah utaahch mikw niikaanihch suuhk niwii iishi aahchiin.
14 Mikw aashpishiyaan suuhk niwiih chiishihtaan chaa chii pikuhtimaasuyaan an kischihuwin aniyaayiu kaa iishi iyaaskuushtimuut Chishaaminituu chaa iyaauch Christ Jesus uhchi, aaukw kaachich pimaatisiiwin.
15 Misiwaa maak chiiyaaniu kaa nistuhtimukw taan aa iishi taapwaahtimihkw, aaukw chipih iitaayihtinaaniu an taan kaa iishi aayimuutimaan. Mishuu aakaa iitaayihtimihkwaau taapishkun taan kaa iishi aayimuutimaan, Chishaaminituu chiki piyaakisch waapihtiyikuwaau.
16 Mikw maak misiwaa naanaakitiwaayihtitaau taan shaash kaa iishi chiskutimaakiwiyihkw.
17 Niichishaanitikw, suuhk wiih chischinuwaapimukw aa iishi pimaatisiiyaan kiyaah suuhk maak kiniwaapimaahkuch anichii kaa chischinuwaapimiyimihch aa iishi pimaatisiiwichiht.
18 Aat shaash mihchaatwaau aa chii wiihtimaatikuch uu, miin chiwiihtimaatinaawaau. Nuuhchikiwaapin maak aa wiihtimaatikuch. Mihchaatu iishi pimaatisiiwich aa nishkuushtihch aniyaayiu miywaachimuwiniyiu anitih iyaayimumaakiniwiyich Christ aashitaayaahtikuhch aa chii nipihiimaakiniwiiyich.
19 Aashkw kiti nichishkimuch nishiwinaachihiiwaawiniyiu aahaakaa tutihch aniyaayiu Chishaaminituu naatiwaayimikuuhch chaa tich, taan aa iishi mimuustaanaayaayihtimumikiniiyich wiyaawaau aayuwikw naashch niyaakitiwaayihtimihiikuch. Maamihchihiikuch taan ash michistuutihch. Chipih pipimaamaayimuhiikuch maak aniyaayiuh aayihtiwinh. Mikw taan aah iitaatisiinaaniwiyich utih aschiihch aayuwikw aniyaayiu mikw miyaamitunaayihtimihiikuch.
20 Chiiyaaniu maak wii, chihchichiishikuhch chihchiwaa chiti iishi tipaayihtaakusinaaniu. Aakutaah waahchi nituumuushihiihkw chaa chii uhtuhtaat pimaachihiiwaasiu, aaukw uu tipaayihchichaasiu Jesus Christ.
21 Iyihch aa iitaayihtaakiniiyich miyuu chiki miyikuniu. Anuuhch nimui saapisiimikin uhii chiiyaanuuh kiyaah chiki nipiimikin. Jesus maak aniyaayiuh suuhkaatisiiwiniyiuh kaa iyaat misiwaa chaakwaayiu chaa chii tipaayihtihk aayuwikw uyaayiu chaa aapichihtaat chaa chii kwaaschinaakuhtaat chiiyaanuuh. Muyaam wiiyi uyiuh kaa ishpish miyunaakuniiyich iishpih kaa winishkaat nipiwinihch uhchi aayuwikw chaa isinaakuhtaat uyaayiu chiiyaanuuh.