Aayuwikw uyaayiu misinihiikiniyiu paayikw aniyaayiuh kaa niishushaapuyich Jesus uchischinihamuwaakinh kaa misinihaamiyich. Aayuwikunh uyaayiuh John kaa ishinihkaasuyich. Aniyaayiuh chischinihamuwaakin Jesus kaa saachihaat chii ishinihkaataakiniu uu John. Chii misinihaam John uyaayiu miywaachimuwiniyiu chaa chii uhchi taapwaahtimiyich awaayiuh Jesus aaukw Christ Chishaaminituu ukusish aakw maak taapwaahtimiyichaa chaa chii iyaayich pimaatisiiwiniyiu. Chiwiih waapihtiiyiwaau John aniyaayiuh misiwaa taan kaa iiyiyich Jesus kiyaah aniyaayiu misiwaa taan kaa iishi tutimiyich ninaahkiu maamishkaach chaakwaayiu aakutaah kaa uhchi chischaayihtaakuniiyich taapwaah aa chishaaminituut. Chiwiih waapihtiiyiwaau taan kaa ishpish suuhkaatisiiyich Jesus. Aayiuh maak mwaahch aa chii naapaawiyich muyaam chiiyaaniu. Chii wiihtim niyaanikutunh aa chii iyaaskusiiyich kiyaah niyaanikutunh aa chii siiutaayich kiyaah maak aa chii michaayihtimiyich muyaam chiiyaaniu aa tiyihkw maan.