Paul kaah aayimuutimwaat Christ utipihtaayimuwiniyiu kiyaah uchistaayihtaakusiwiniyiu
2
1 Christ chitihtutaakiniu chaa chii aayichikaapuhiituyihkw, chaa chii saachihiituyihkw kiyaah chaa chii miywaayimuhiituyihkw. Kaa piyaahchisiit ahchaahkw chitihtutaakiniu chaa chii miyu wiichaatuyihkw, chitihtutaakiniu chaa chii chishaawaatutaatuyihkw kiyaah chaa chii chistimaachaayimituyihkw.
2 Aakw maak taakish miywaayihtimihiikw paayikunihch aa iishi maamitunaayihtimaakw kiyaah paayikunihch aa iishi saachihiituyaakw. Paayikunihch aa iitaayihtimihiikuyaakw chaakwaan kiyaah paayikunihch aa iishi pikusaayimuyaakw.
3 Akaawii tutih chaakwaan mikw chiiyi aa maamitunaayimiisuyin kiyaah maak mikw chaa chii uhchi mimiywaachimikiwiyin. Tipihtaayimiisukw, austaa kutikich iiyiyiuch aah iitaayimaakuch.
4 Nimui mikw chiiyi chipih uhchi ninaakitiwaayimiisun, kutikich kiyaah iiyiyiuch chipih ninaakitiwaayimaauch.
5 Taan kaa iishi maamitunaayihtihk Jesus Christ aaukw kiyaah chiiyaaniu chipih iishi maamitunaayihtaanaaniu.
6 Aat Chishaaminituu aa iitaayihtaakusiiyich aa chii iitaayihtaakusit, iyaapich chii pichistinim aniyaayiu taapituu aa iishi iyaach.
7 Misiwaa chii pichistinim uyaayiu aakw aapichihaakin kaa iitihiisut. Aakw iiyiyiu aa iitaayihtaakusiiyich kaa iitaayihtaakusit.
8 Chii tipihtaayihtaakuhiisuu aa ninihiihtiwaat Chishaaminituu, kaa pichistinisuut chaa puunipimaatisiit, aat aashitaayaahtikuhch kaa chiistaaskuhwaakinuut.
9 Aayuwikw maak uyaayiu waahchi miyikut Chishaaminituu maauch aa niikaanaayihtaakuniiyich apiwiniyiu misiwaa awaayiuh chaa chii chistaayimikut. Kiyaah Chishaaminituu chii miyikuu ishinihkaasuwiniyiu aahaakaa tikuniiyich kutichiyiu ishinihkaasuwiniyiu aa ishpish chistaayihtaakuniiyich.
10 Aakw maak misiwaa awaan chaa maamihchimaat Jesus Christ kaa ishinihkaatimaakiniwiyich, misiwaa an chihchichiishikuhch kiyaah aschiihch kiyaah iitaamihch aschiihch kaah taat.
11 Misiwaa awaan chaastinaas kiti wiihtim aah iyit, Jesus aaukw tipaayihchichaasiu, aa maamihchimaat Chishaaminituu, uhtaawiimaau.
Taan chipih iishi waashtuwaauch aa pimaatisiiyich anichii kaa taapwaayaayihtihch
12 Aakw maak chiiyiwaau naashch kaa saachihiitikuch, muush chichii naanihiihtuunaawaau aashkw maakwaach kaah taayaan anitih aah taayaakw. Atitiu maak iitaayihtaakun anuuhch muush chaa chii ninihiihtimaakw taan kaa iishi wiihtimaatikuch maakwaach uu aahaakaa taayaan anitih aah taayaakw. Suuhk aapitisiitaau chaa chii chiishihtaauhkw aniyaayiu kaa iishi chihchipiyihtaat Chishaaminituuh chipimaatisiiwinaahch iishpih kaa pimaachihiitihkw. Tutihtaau uu aa chischisiiyihkw Chishaaminituu aaukw chipih naanihchiishtuwaaniu kiyaah wiiyi chipih chistaayimaakiniu.
13 Waash Chishaaminituu muush aapitishiishtim chipimaatisiiwininiu. Chitihtutaakiniu chaa chii ninihaayihtimihiihkw kiyaah chiwiichihiikuniu chaa chiih tutimukw aniyaayiu aa iishi nihaayihtihk.
14 Tutihtaau misiwaa chaakwaan aahaakaa mishtih aayimwaauhiikuyihkw kiyaah aahaakaa iyaastaamituyihkw.
15 Waash aaukw uu chipih iishi pimaatisiinaaniu aa utiwaashishiimitutaatihkw Chishaaminituu utih aschiihch taawaayish naashch kaa michaatisich aah taach aah taayihkw. Aakw maak nimui kiti uhchii tikuniyiu taan chaa chii iishi ataamaayimitihkw awaan kiyaah mitun chiki piyaahchinaakun chipimaatisiiwiniwaau. Muyaam achihkushich aa chihkaayaashtiwaach aa tipiskaayich aaukw chipih iishi waashtiwaanaaniu utaah aschiihch.
16 Aaukw uu chipih iishi pimaatisiinaanuu aa waawiihtimuuhkuch iiyiyiuch Chishaaminituu aa pimaachihiiwaayich. Aakw maak iishpih utihchipiyihchaa Christ chaa tikushihk, aakw chaa maamihchihiiyaakw. Aakutaah chaa nuukuhch aahaakaa chaaskaah uhchi aapitisiiyaan.
17 Kwaashwaan niki nipihiikiwin aa chiwiihtimaatikuhch Chishaaminituuh utiyimuwinh, anitih aa chii uhtinimaakw chitaapwaayaayihtimuwiniwaau. Anitih maak uhchi uhchikuuchaa nimihkw, muyaam niiyi aapichistinichaasuuuuyaan Chishaaminituu aah taat aakw chaa isinaakusiyaan. Uu maak nipihiikiwiyaanaa niki miiywaayihtaan aa chiih tutimaatikuch.
18 Kiyaah maak chiiyiwaau aaukw muyaam chipih iishi sichiyaasinaawaau kiyaah chipih wiichimuuchichaayihtimuuminaawaau.
Paul kaah aayimuumaat Timothy kiyaah Epaphroditus
19 Iitaayihtihkaa tipaayihchichaasiu Jesus, nipikusaayihtaan wiipich chaa chii iitishihuk Timothy anitaah aahtaawaakw. Aakw maak chaa miywaayihtimaan paahtimaanaa taan aah iitaachimikiwiyaakw.
20 Waash mikw Timothy aaukw aataayimitaakw muyaam niiyi aataayimitikuch chaa chii miyupiiyaahkw.
21 Misiwaa kutikich iiyiyiuch mikw wiiyiwaau ninaakituwaayimiisuuwich, nimui iyaapitaayihtimihiikuch Jesus Christ aash nitiwaayimikuuhch chaa tich.
22 Chichischaayimaawaau Timothy aa chii nuukuhtaat aa miywaapitisit. Nichii niishuuaapitisiinaan miywaachimuwin aa waawiihtimaahch muyaam naapaau kiyaah ukusish aa niishuuaapitisiiyich nichiih isinaakusinaan.
23 Nipikusaayihtaan wiipich chaa chii iitishihuk anitaah aahtaawaakw iishpih chischaayihtimaanaa taan chaa iispiyiwaanaa.
24 Nitaapwaauchaayimaau tipaayihchichaasiu chaa chii nihiipiyihtaat wiipich chaa chii nitiwaapimitikuch.
25 Nitiiitaayihtaan kaau chaa chipih chiiwaatishihuuk chiichishaaniu Epaphroditus anitaah aahtaawaakw. Waash suuhk nichii wiichihiikw aa waawiihtimuch miywaachimuwiniyiu aati naashch chii aayiminiyich. Chiiyiwaau chichii paachi iitishihwaawaau chaa chii paachi waawiichihiit.
26 Pikwaayihtim miin chaa chii waapimitaakw misiwaa. Chii mikushkaataayitim aa chii wiihtaamaakuwaakw aa chii aahkusit.
27 Naashtaapwaah chii aahkusiu kiyipwaa taapwaah, chaakaat chii nipiu. Mikw maak Chishaaminituu nichii chistimaachaayimikunaan taapishkun. Chiih tutiwaau aakaa chaa chii puunipimaatisiiyich chaah aakaa maak austaa chii misimaayihtimuch.
28 Aaukw maak waahchi atitiu sichiyaasiyaan chaa chii iitishihuk anitaah aahtaawaakw chaa chii miywaayihtimaakw miin waapimaakwaa. Aakw maak nimui niki uhchi ishpish aayimaayihtaan.
29 Waapihtiyaahkw aa sichiyaasiwaakw aa waapimaakw muyaam aah tich kaa taapwaauchaayimaach tipaayihchichaasiu wiyaapimitutwaau. Yaakwaah chipih iitaayimaawaauch misiwaa iiyiyiuch uyaayiu aa iitaayihtaakusich, mwaahch wiiyi aa iitaayihtaakusit.
30 Nimui uhchi puuniiu aah aapitishiishtiwaat Jesus aahaat chii kushpinaatiniiyich upimaatisiiwin, aa chii paashwaapihtihk nipiwiniyiu. Aayuwikw uyaayiu kaah tik aa paachi wiichihiit aahaakaa uhchii taayaakw chiiyiwaau chaa chii paachi wiichihiiyaakw.