Jesus kaa nuukusiishtiwaat niishwaashch uchischinihamuwaakinh
21
1 Paatimaa maak aakw miin Jesus kaa nuukusiishtiwaat uchischinihamuwaakinh anitaah aniyaayiu saakihiikiniyiu Tiberias kaa ishinihkaataayich. Maautaa maak kaa iishi nuukusiishtiwaat.
2 Maamuu chiih taauch uchii misiwaa, Simon Peter, Thomas, an kaa niishich kaa ishinihkaataakinuut, Nathanael an Cana kaa uhchiit anitaah Galilee aschiihch kaah tikuniiyich, kiyaah aniyaayiu niishu Zebedee ukusish kiyaah niishu kutikich chischinihamuwaakinich.
3 Aakw Simon Peter aataat aniyaayiu chischinihamuwaakinh, “niki nituunuutimaasaan.” Aakw aataach, “chiki wiichaautinaan.” Kaa puusich. Iskin tipiskaau maak chiih taauch aahaakaa uhchi pitihuyaahch.
4 Iishpih maak wiipich aati paataapiniiyich, Jesus chii niipuu anitaah shishuch, mikw nimui uhchi chischaayimaauch anichii chischinihamuwaakinich iyaawiyich Jesus.
5 Aakw aatikuch, “aawaashishiitukw, aashkw aa nimui chipitihuyaanaawaau?” Aakw aataach, “nimaa.”
6 Aakw aatikuch, “chiki pitihuyaanaawaau anitaah chii nihiiwiniwaahch iitaahchaa iishi pikishtiwaahwaakwaa an chitihiipiiwaau.” Kiyipwaa kaa pikishtiwaahwaach aniyaayiu utihiipiiwaau. Nimui uhchi shiwipitaauch aniyaayiu utihiipiiwaauh iishpih waahchipitaach aa ishpish mihchaatiyich unimaasimuwaau.
7 An maak chischinihamuwaakin Jesus kaa saachihaat aataat Simon Peter, “Tipaayihchichaasiu an.” Iishpih maak Simon Peter piyaahtihk aah aawiyich tipaayihchichaasiu chii pushchishkim utikuhp aniyaayiu kaa minihk chaa aapitisiit, aakw kaa pikishtiwaakwaashkuhtik.
8 Aakw anichii kutikich chischinihamuwaakinich kaa paachi naatikaamaahahch, aa utaapaach utihiipiiwaau aa saakischinaayich nimaas. Nimui maak naashch waahyiu uhchi taauch, wiyaash mitaahtumitiniu tihtutipaaskunikin chii ishpishinaakusiichaanichii anitih uhchi shishuch.
9 Iishpih maak kaa kipaach chii waapihtimuch ishkutaayiu nimaas aa tikishwaakiniwiyich anitih kiyaah aaihkunaau.
10 Aakw Jesus aatikuch, “paashuwaahkuch anichii pisch nimaasich kaa pitihuyaayaakw.”
11 Aakw Simon Peter miin kaa puusit kaa akwaasipitaat aniyaayiu ihiipiih. Mitaahtumitiniu miin niyaayuumitiniu nishtushaap chii tishiyiu aa mimisiitistiiyich nimaas. Aat maak aniyaayiu aa chii ishpish saakischinaayich nimaas nimui ayaapich uhchi piikuupiiyiuh aniyaayiu utihiipiiwaau.
12 Aakw Jesus aataat, “aashtimukw, paachi miichisukw.” Nimui maak waachipaayaakw anichii chischinihamuwaakinich uhchi wiih iitaauch, “awaan chiiyi?” Waash chii chischaayimaauch aah aawiyich tipaayihchichaasiu.
13 Jesus maak chii naataau, kaa utinaat aniyaayiu aaihkunaau aakw kaa maatinimuwaat, kiyaah aniyaayiu nimaas aayuwikw kaah tutiwaat.
14 Aayuwikw maak uyaayiu nishtwaau kaa nuukusiishtiwaat Jesus aniyaayiuh uchischinihamuwaakinh kaa ishpish winishkaat nipiwinihch uhchi.
Jesus kiyaah Simon Peter
15 Iishpih maak kaa chiish miichisuch, Jesus aataat Simon Peter, “Simon Peter, chiiyi kaa ukusiitutaask John, austaa aa niiyi chisaachihiin ishpish wiiyih uchii?” Aakw Simon Peter aatikut, “aahaa, Tipaayihchichaasiu, chichischaayihtaan aa saachihiitaan.” Jesus aakw aataat, “ashimich nimaanishchaanishishimich.”
16 Aakw miin aataat aayuwikw aakw niishwaau aataat, “Simon Peter, John kaa ukusiitutaask, chisaachihiin aa?” Aakw aatikut, “aahaa, tipaayihchichaasiu, chichischaayihtaan aa saachihiitaan.” Aakw Jesus aataat, “naanaakichihiich nimaanishchaanishimich.”
17 Aakw aataat aayuwikw aakw nishtwaau aataat, “Simon Peter, John kaa ukusiitutaask, chii saachihiin aa?” Aakw Simon Peter naashch kaa michaayihtihk waash aayuwikw nishtwaau kaa kukwaachimikut Jesus aah iitikut, “chisaachihiin aa?” Aakw aataat, “Tipaayihchichaayin, misiwaa chaakwaan chichischaayihtaan, chii chischaayihtaan aa saachihiitaan.” Jesus aataat, “ashimich nimaanishchaanishimich.
18 Taapwaa chiwiihtimaatin, aashkw aa chii uschiniichiyin mikw taan waah ayihtiin chichiih tin kiyaah mikw taanitaah waah iituhtaayin aakutaah kaa iituhtaayin. Iishpih maak chishaaiiyiyinaa, shiwinischaayinaa maak chiki maahkupitaakiniu chitihchii aakw chaa iituhtihiikiwiyin anitaah aahaakaa wiih iituhtaayin.”
19 Uyaayiu maak Jesus waahchii iyit chii nitiwaayimaau chaa chii chischaayihtimiyich taanitaah chaa iishi puunipimaatisiiyich chaa chii uhchi chistaayitaakuhaayich Chishaaminituu. Aakw Jesus aataat, “paachi nuushuushkuh.”
Jesus kiyaah kutik chischinihamuwaakinh
20 Simon Peter chii kwaaschikaapuu kaa waapimaat aniyaayiu kutik chischinihamuwaakinh, aniyaayiu Jesus kaa saachihaayich. Aayiukun aniyaayiu kaah aaspichisimuyich Jesus aah taat maakwaach kaautaakusiiu miichisuch kiyaah kaa iishi kukwaachimaat, “Tipaayihchichaayin, awaan chaa maamishimisk?”
21 Iishpih wiyaapimaat Simon Peter uyaayiu naapaau aakw aataat, “Tipaayihchichaayin, uu maak wii naapaau?”
22 Jesus aatikut, “nitiwaayimikaa chaa chii pimaatisiit paatish miin tikushinuuchaa, taan maak chaa chiih tiyin chiiyi? Paachi nuushuushkuh chiiyi.”
23 Aakw kaa mishihtaapiyihch tipaachimuwin anitih taawaayish chischinihamuwaakinich wiichishaanimaauch aah taach aniyaayiu aakaa chaa uhchi puunipimaatisiit uu chischinihamuwaakin. Mikw maak nimui uhchi iyitaakupin Jesus aakaa chaa uhchi puunipimaatisiiyich. Chiih iitaau, “naatuwaayimaauchaa aashkw chaa chii pimaatisiit tikushinuuchaa, taan maak chaa chiih tiyin chiiyi?”
24 Aaukw uu chischinihamuwaakin kaa tipaatutihk uyaayiuh chaakwaayiuh, kiyaah kaa misinihaahk uyaayiuh chaakwaayiuh. Chii chischaayimaaniu maak aa taapwaamikiniiyich misiwaa taan kaa iishi wiihtihk.
Aah aati chiishipiyihch uu miywaachimuwin
25 Mihchaaniyiu maak kutik chaakwaayiu Jesus aa chiih tutihk. Misiwaa paahpaayikw waawiihtaakiniwiyich chaakwaayiu kaah tutihk, kwaaswaan aatuch taapishtaayiuh utih aschiihch ushihtaakiniwich misinihiikin.