Kaa pisihkwaach chiipiikimikuhkaan
Matthew 28:1-8; Mark 16:1-8; Luke 24:1-12
20
1 An kaa ayimihaauchiishikaach wiipich maak miin aah aati waapihch, aashkw aa aukaayich anitaah chiipiikimikuuhkaanihch chii iituhtaau Mary Magdalene kaa waapimaat aniyaayiu asiniih aa chii iichaahtihiimaakiniwiyikupinaanihii anitih aa uhchi piihchaaniwiyich.
2 Aakw chaaschipihtaat kaa nitiwaapimaat Simon Peter kiyaah aniyaayiu kutik chischinihamuwaakinh Jesus kaa saachihaayich aakw aataat, “chii utinimwaahtaawaakupin tipaayihchichaasiu wiiyaayiu nimui maak nichischaayihtimwaan taanitaah kaa nihaaustaawaach.”
3 Aakw Peter kaa wiyiwiit iishpih kaa iiyiyich uyaayiu aa wiichaaukut aniyaayiu kutik chischinihamuwaakinh. Anitaah chiipiikimikuuhkaanihch aakutaah kaa iishi chistuhtaach.
4 Taapishkun chii chihchipihtaauch mikw maak chii nikitikuu Peter aniyaayiu kutik chischinihamuwaakinh aakw wiiyi niishtim kaa paapihtaayich anitih.
5 Iishpih maak piyaapihtaat anitaah an kutik chischinihamuwaakinh chii niwaakaapu anitaah aa piihtisiwaayaapihtihk aniyaayiu chiipiikimikuhkaaniyiu. Mikw pichiwiyaanaachiniyiu chii waapitim aa ashtaayich anitaah. Nimui uhchi piihchaau.
6 Chaak kaa paapihtaat Simon Peter aakw kaa piihchaat wiiyi anitaah. Chii waapihtim aniyaayiu pichiwiyaanaachiniyiu anitih aa ashtaayich.
7 Aakw aniyaayiu kutichiyiu pichiwiyaanaachiniyiu kaah aapitiniiyich Jesus kaa wiskwaayaachinikiniwiyich ushtikwaan tipaan anitaah chii ashtaayiu aa chii nihaawaachinikinuwiyikupinaa.
8 Aakw piyaachipiihchaat an chischinihamuwaakin an niishtim kaa paapihtaat, wiiyi kiyaah chii waapihtim aakw tiiyaapwaahtaak.
9 Uyaayiu maak maakwaach aashkw nimui uhchi nistuhtimuch anitih aniyaayiu chihchimisinihiikinihch kaah iitishtaayich miin chaa winishkaayich.
10 Aakw kaau kaa chiiwaach wiichiwaahch uchii chischinihamuwaakinich.
Jesus kaa nuukusiishtiwaat Mary Magdalene
Matthew 28:9, 10; Mark 16:9-11
11 Mikw Mary wiiyi chii niipuu anitih wiyiwiitimihch aniyaayiu chiipiikimikuhkaaniyiu aa maatuut. Aniyaayiu maak aa maatuut chii niwaakaapu aa piihtisiwaayaapihtihk aniyaayiu chiipiikimikuhkaaniyiu.
12 Aakutaah kaa waapimaat niishu aanchin aa waapaaspisuyich aa apiyich anitih Jesus kaa nihiikaakiniwiyich wiiyaayiu. Paayikw anitaah aa chii iishi ushtikwaaniiyich chii apiu aakw an kutik anitaah iitaahchaa aa chii iishi usitiyich aakutaah kaa apit.
13 Aakw aatikut aniyaayiu aanchin, “Iskwaau, chaakwaan waahchi maatuuyin?” Aakw Mary aataat, “chii utinaauch nitipaayihchichaasiim nimui maak nichischaayimaauch taanitaah kaa pichistinaach.”
14 Uyaayiu maak kaah iyit chii chiiwaakaapu aakw wiyaapimaat Jesus aa niipuuwiyich, mikw nimui uhchi nistuniwaau aahaawiyich Jesus.
15 Aakw Jesus aatikut, “iskwaau, chaakwaan waahchi maatuuyin? Awaan kaa ninituwaapimit?” Kaa kiniwaapimaat Mary aniyaayiu nihtaauchihchikin kaa naanaakichihtaayich aah aawaayimaat, aakw aataat, “paachi wiihtimuu maah ayihch kaa iituhtaawaauutaa aniyaayiu uyiu, taanitaah kaa ahiit aakw maak chaa chii nitiwaapihtimuuch mikw chaa chii utinimuch.”
16 Aakw Jesus aatikut, “Mary.” Chii kwaaschikaapu Mary aakw kaah iitaat aniyaayiu Jesus Hebrew aa iishi ayimit, aakw aataat, “Rabboni.” Uu maak Rabboni kaa iinaanuuch aah iitwaashtimuwaataakiniwich chiskutimaachaasiu iinaaniu.
17 Aakw Jesus aatikut, “akaawii paachi mimaahchikun waash aashkw nimui uhtaawiimaau aah taat nuuhchii iituhtaan. Mikw maak nitiwaapimich niichishaanich chaa wiihtimuuwitwaau chaa nitiwaapimich nuuhtaawii kiyaah chiiyiwaau kuuhtaawiiwaau, nichishaaminituum kiyaah chiiyiwaau chichishaaminituumuwaau.”
18 Aakw Mary Magdalene kaa chistuhtaat aa naanitiwaapimaat aniyaayiuh chischinihamuwaakinh aakw aataat, “Tipaayihchichaasiu nichiiwaapimaau.” Chii wiihtimuwaau kiyaah aniyaayiu kaah iitikut chaa iitaat.
Jesus kaa nuukusiishtiwaat uchischinihamuwaakinh
Matthew 28:16-20; Mark 16:14-18; Luke 24:36-49
19 Aniyaayiu maak aah aati utaakushiyich an niishtim aa chiishikaayich an taaustaach chii nishtuwich anichii chischinihamuwaakinich. Chii aataapishchiniisuuwich maakwaach aniyaayiu aa nistuuwiich waash chii kushtaauch aniyaayiu Jew uchimaauh. Shishchikuch maak chii uhchi niipuuwiyiu Jesus anitih aah taach. Aakw aatikuch, “chiyaamaayihtimukw.”
20 Iishpih maak kaa chiish waachiyaamaat aniyaayiuh uchischinihamuwaakinh aakw kaa waapihtiiyaat utihchii kiyaah uhpimaayiu. Nuwich maak chii sichiyaayihtimuch aa chii waapimaach tipaayihchichaasiu.
21 Aakw Jesus miin aataat, “chiyaamaayihtimukw. Muyaam uhtaawiimaau kaa paachi iitishuhut kiyaah niiyi chitiiitishihutinaawaau.”
22 Aakw anitaah aah taayich kaa iishi yaayaahaat kaah iitaat, “utinaahkw kaa piyaahchisiit ahchaahkw.
23 Waapaayihtimuwaakwaa awaan umichihtwaawin chiki waapaayihtimuwaakiniu, aakaa waapaayihtimuwaakwaa umaachihtwaawin nimui chiki uhchi waapaayihtimuwaamuwaakiniu.”
Jesus kiyaah Thomas
24 An maak paayikw anichii kaa niisuusaapuuch, chischinihamuwaakinh Thomas aa ishinihkaataakinuut paayikw an kaa niishich, nimui uhchi taau wiiyi Jesus kaa nuukushistaakuyich.
25 Aakw anichii chischinihamuwaakinich aataach, “nichiwaapimaanaan tipaayihchichaasiu.” Aakw aatikuch, “paatish chii taahchinimuchaa utihchii anitih kaa chiistaaskuhwaakinuut kiyaah paatish chii taahchinikaa anitih uspikaahch, iyaakw chaa taapwaahtimaan.”
26 Paayikw tiwishtaau maak ishpish aakw miin kaa nishtuwiich anichii chischinihamuwaakinich. Thomas maak chiih taayiu anitih aah taach. Chii aataapishchinaakiniwich chishtuhkinihch ayaapich maak Jesus chii paachi piihchaau kaa paachi witiskiwikaapushtiwaat aakw aataat, “chiyaamaayihtimukw.”
27 Aakw aataat Thomas, “taahchin nitihchii kiyaah utaah uhpimaayiu paachi taahchin, aakun aakw ishpish aanwaahtih, taapwaahtih aakw.”
28 Aakw Thomas aatikut, “nitipaayihchichaam kiyaah nichishaaminituum.”
29 Jesus aataat, “chii taapwaahtaan aa mikw aa paachi waapimiin? Shiwaayihtaakusiwich anichii kaa taapwaahtihch aah aat aakaa uhchi waapimich.”
Taan aataapitihch uu misinihiikin
30 Jesus uchischinihamuwaakinh mihchaatu chii waapimikuu maamishkaach chaakwaayiu aah tutihk aahaakaa uhchi misinihiikiniwiyich utih chihchimisinihiikinihch.
31 Aayuwikunh uhii maak kaa misinihiikiniwich chaa chii taapwaahtimaakw Jesus aahaawit Christ Chishaaminituu ukusish aakw maak taapwaayaayimaakwaa chaa iyaayaakw kaachich pimaatisiiwin utishinihkaasuwinihch uhchi.