ᐊᓂᑌ ᐁᕕᓴᔅ ᑳ ᐃᔑᓂᐦᑳᑌᔨᒡ ᐃᐦᑖᐎᓂᔫ ᐁᑯᑦ ᑳ ᐃᐦᑖᑦ ᑆᓪ ᑳ ᒪᓯᓇᐦᐊᐦᒃ ᐅᔫ ᐅᒪᓯᓇᐦᐊᒫᒉᐎᓐ᙮ ᓇᒧᐃ ᓈᔥᒡ ᐅᐦᒋ ᒥᔫᐦᑖᑯᓂᔫ ᑖᓐ ᑳ ᐃᔑ ᐯᐦᑕᐦᒃ ᐁ ᐃᑖᒋᒫᑲᓄᔨᒡ ᐊᓂᔫ ᑳ ᑖᐺᐦᑕᒦᑣᐤᐦ ᒥᔻᒋᒧᐎᓂᔫ ᐊᓂᑌ ᒀᕆᓐᑦ ᑳ ᐃᐦᑖᔨᒡ᙮ ᒌ ᐃᐦᑕᑯᓂᔫ ᑖᓐ ᑳ ᐃᔑ ᒪᒪᒋᐸᔨᐦᑲᐦᑖᑐᑣᐤ ᐊᓂᒌ ᐅᒫᒨᐊᔨᒥᐦᐋᐅᒡ ᐊᓂᑦ ᑳ ᐃᐦᑖᑣᐤ᙮ ᒌ ᑲᑲᑌᐹᓂᐸᔨᐦᐆᒡ ᐊᓂᑌ ᐃᔑ ᐁ ᐃᐦᑖᔨᒡ ᓇᓈᐦᑰ ᐊᐌᔫᐦ ᐁ ᐃᑌᑣᐤ ᐁᐅᑯᓐᐦ ᐊᓂᔫ ᐁ ᓅᔔᔥᑯᐙᑣᐤ᙮ ᐁᒄ ᐸᔅᒡ ᒪᒑᑎᓰᐎᓂᐦᒡ ᑳ ᐃᔑ ᐱᒫᑎᓰᑣᐤ᙮ ᒌ ᐋᓄᐌᔨᒣᐤ ᒫᒃ ᑆᓪ ᐅᔫᐦ ᐅᒫᒨᐊᔨᒥᐦᐋᐤᐦ᙮ ᐁᒄ ᑳ ᒋᔅᑯᑕᒧᐙᑦ ᑖᓐ ᒋᐹ ᐃᔑ ᐱᒫᑎᓯᔫᐦ ᐊᐌᔫᐦ ᑳ ᑖᐺᐦᑕᒥᔨᒡ ᒥᔻᒋᒧᐎᓂᔫ᙮ ᓈᔥᒡ ᑖᐺ ᒌ ᐌᔫᑕᓐ ᐁ ᒪᒑᑎᓰᓈᓅᐦᒡ ᐊᓐ ᐃᐦᑖᐎᓐ ᒀᕆᓐᑦ ᑳ ᐃᔑᓂᐦᑳᑌᒡ᙮ ᒌ ᐋᔨᒥᐦᐄᑰᒡ ᐊᓐᒌ ᑳ ᑴᔅᑳᑎᓰᑣᐤ ᐁᑳ ᒉᒌ ᐃᐦᑎᑣᐤ ᑖᓐ ᐁ ᐃᐦᑎᔨᒡ ᐊᓂᔫᐦ ᐊᐌᔫᐦ ᐙᔅᑳ ᐁ ᐃᐦᑖᑣᐤ ᑳ ᐐᒋᔨᒡ᙮ ᐅᔫ ᒫᒃ ᑳ ᐃᔑ ᒪᓯᓇᐦᐊᒧᐙᑦ ᑆᓪ ᒌ ᐐ ᒋᔅᑯᑕᒧᐌᐤ ᑖᓐ ᒋᐹ ᐃᔑ ᐱᒫᑎᓯᔫᐦ ᐁ ᑖᐺᔨᒫᔨᒡ ᒌᓴᔅ᙮ ᐁᒄ ᒫᒃ ᒋᐹ ᒋᔅᒉᔨᐦᑕᒥᔫ ᑖᓂᔫ ᐊᓂᔫ ᒣᔻᔑᔨᒡ ᒉᒌ ᐃᐦᑎᓈᓄᔨᑯᐸᓀ ᑲᔦ ᑖᓂᔫ ᐁ ᒫᔮᑕᓂᔨᒡ᙮