Uu mekwaach masinahamaachewin kaa masinahiikanuuhch, anichii kaa taapwehtahkwaau chii nanehkachihaakanuuch nesht chii nipahaakanuuch aniyuu uhchi e taapweyimaatwaau Jesus. Pasch anichii Jewa iinuuch kaa taapwehtahkwaau chii kakweteyihtamuch chechii puuniitwaau e taapweyimaatwaau Jesus nesht miin chechii chiiwenaatahkwaau aniyuu Jewa iinuu e ishi taapwehtamiitwaau. Uu masinahamaachewin Hebrew kaa ishinihkaatech chii masinahiikanuu chechii chiskutamuwaakanuutwaau anichii Jewa iinuuch kaa taapwehtahkwaau uste e iteyihtaakuniyich e taapweyimaakanuyich Jesus ishpish wii aniyuu Jewa iinuu kaa ishi taapwehtamiitwaau. Nuukuniyuu wiya Jesus tekash e chii chiishihtaat aniyuu Jewa taapwehtamuwiniyuu iskutak kaa pachishtinisut chechii nipahaakanuut machihtwaawinihch uhchi. Iskutak maak kaa nipit, namui uhchi nituweyihtaakun shaash aniyuu weskach testamintihch kaa ishi aayimuutekwaau machishtawehamaachewinh. Peyakushaap piskitisinahiikan utah uu masinahiikan ekut e aayimuumaakanuutwaau anichii awenchii kaa ayaatwaa taapwehtamuwiniyuu anite weskach testimintihch. Ekut maak chechii uhchi chiskutamuwaakanuutwaau kaa taapwehtahkwaau taan chipaa ishi taapwehtamuch nesht tekash chechii taapweyimaatwaau Chishemanituu.