Ayimiheshtamuunaan
3
Euk uu maahchishtai waa ititakuch, niichishaanitikw, pechi ayimiheshtamuunaan ekaa chechii chipihchitaakanuyich Utipeyihchikeu umiywaachimuwin. Ayimihaakw chechii mishihtepayiyich muyaam chiyawaau anite e ihtaayekw kaa ishi mishihtepayiyich. 2 Pechi ayimiheshtamuunaan kaye chechii kanuweyimukuyaahch Chishemanituu ekaa chechii wanaachihiyiamihtwaau anichii kaa machaatisiitwaau. Wesh namui misiwe awen taapwehtam miywaachimuwiniyuu. 3 Tepicheyihtaakusuu maak Utipeyihchikeu chechii taapweucheyimaakanuut. Chika ihtuutaakuwaau chechii suuhchikaapuwekw neshta chika miyu kanuweyimukuwaau ekaa chechii wanaachihiitaakw machimanituu. 4 Utipeyihchikeu maak nitihtuutaakunaan chechii taapweucheyimitaahch. Nicheshtinaahuunaan e ihtuutamekw an kaa ishi wiihtamaataahch kaye maak muush che ihtuutamekw. 5 Nitutamuwaanaan Utipeyihchikeu chechii wiichihiitaakw etituu chechii chischeyihtamuwekw Chishemanituuh usaachihiiwewin. Kaye maak chechii siipiiwesiiwekw e nachishkamekw e aayimihch muyaam Christ kaa ishi siipiiwesiit.Aapatisikw, ekaawii chihtimikw
6 Niichishaanitikw, chititashumitinaan Utipeyihchikeu Jesus Christ utishinihkaasuwin uhchi, ekaawii piskaataahkuch anichii awenichii ekaa mitun wiyesh kaa itaapatisitwaau kaye ekaa kaa aapateyihtahkwaau taan kaa ishi chiskutamaataahch. 7 Chimiyuchischeyihtenaawaau kaye chiyawaau chechii ihtiyekw taan kaa ihtiyaahch anite e ihtaayekw kaa chii ihtaayaahch. Namui nuuhchi chihtiminaan. 8 Namui nuuhchi pachishtinaanaanich awenichii chechii ashamikuyaahch ekaa mechim chiishiihkuwachihtwaau. Teyakuch nichii mista aapatisinaan e chiishikaach kaye e tipiskaach ekaa chechii aayimihiitaahch. 9 Eukuu kaa ihtiyaahch. Aat e ishinaakuhch chechii nitutamaataahch chechii pimipayihiyiaahch namui kuuhchi nituweyihtamaatinaan chekwaan. Wesh chichii wii waapahtiitinaan taan chipaa itaatisiinaawaau kaye chiyawaau. 10 Anite e ihtaayekw kaa chii ihtaayaahch ekun kaa chii ititaahch maan, “Awen ekaa kaa wii aapatisit namui chipaa uhchi miyaakanuu chechii miichisut.”
11 Ekun uu wehchi ititaahch wesh nipehtenaan e ihtaatwaau anit e ihtaayekw pasch ekaa mitun wiyesh itaapatisitwaau mikw e ayimitutawaatwaau aweyuu. 12 Nisiihchimaanaanich uchii awenich kaye nitayaakwaamimaanaanich Utipeyihchikeu Jesus e ihtaayich ishi e itachihtwaau, Chiyaam ishi pimaatisiikw kaye aapatisikw ati chechii uhchi pimipayihiisuyekw.
13 Misiwe niichishaanitikw chititinaawaau, ekaawii saskachiikw e miyutuutamekw. 14 Awen e ihtaakwe anit e ihtaawekw ekaa wii nanihiihtahk taan kaa itasinahamaataahch chischisiitutawaahkw. Ekaawii piskaataahkw ekw maak che pimaameyimut. 15 Mikw ekaawii ihtuutawaahkw muyaam e uhkaatekw, teyakuch chipaa yaakwaamimaawaau e wiichishaanituwekw.
Paul maahchishtai kaa ishi wiihtamuwaat
16 Nitayimihaanaan Utipeyihchikeu wiya e ihtaat wehchipayiyich chiyaameyihtamuwiniyuu, muush chiyaameyihtamuwiniyuu chechii miitaakw mikw taan e ispayiwekw. Utipeyihchikeu muush chika wii wiicheukuwaau.
17 Niya Paul chimasinahamaatinaawaau. Ekun e ishinaakuhch niya e masinahusuyaan.
18 Chitayimiheshtamaatinaawaau misiwe chechii miyutuutaataakw Chitipeyihchikeminuu Jesus Christ.