Aniyuu niishwaau kaa chistuhtet Paul e papaamuhtataat miywaachimuwiniyuu ekut kaa chihchipayihtaat aniyuu ayimiheukamikuyuu anite Thessalonica kaa ishinihkaateyich ihtaawiniyuu. Nishtu tuushteu wiyesh chii ishpish chiskutamaacheu anit ihtaawinihch mikw maak chii chistuhteu anit uhchi wesh naashch chii suuhcheyimutaakuu aniyuu Jewa iinuu anit kaa ihtaayich. Eukw uyuu kaa itasinahiichet Paul anite uhchi Corinthihch chechii kaachiichimaat aniyuu iinuu anite Thessalonicahch kaa ihtaayich nesht etituu chechii uhchi chiskutamuwaat taan che ishi pimaatisiyich e kweskaatisiyich. Chii maamihchihiikuu aniyuu e ishpish suuhchiteheyich nesht ekaa nuuhtipuuniyich aniyuu taan e ishi taapweyihtamiyich aat taan e ishpish nanehkaateyimuhaakanuyich. Chii chiskutamuweu taan che ishi pimaatisiyich chechii nanaheyihtamihaayich Chishemanituu. Nesht chii chiskutamuweu taan che iteyihtaakuniyich miin takushiniyichen Jesus. Nesht yaakwaau chii ishi wiihtamuweu ekaa chischeyihtaakuniyich taaishpish nihaau che takushiniyich Jesus kaye suuhk chechii atushcheyich che ishpish ekaa takushiniyich.