Eukw uyuu nishtwaau kaa masinahiichet Paul anite uhchi chipahutuukamikuhch anite Romehch kaa ihtaat. Epaphras chii ishinihkaasuu naapeu e chii nituwaapamaakupane Paul e nituu wiihtamuwaat e ihtaayitwaauh aweyuu nitawiin e ishi chiskutamaacheyitwaauh anite Colossae kaa ishinihkaateyich ihtaawiniyuu e itaatwaau aniyuu iinuu ekaa nihaau tekash ishinaakuniyich utaapwehtamuwiniyuu. Chii iteuch e chiskutamuwaatwaau aniyuu iinuu anite Colossaehch kaa ihtaayitwaauh chechii nuuchiishtuwaayich enchilh kaye yaakwaau chechii ishi naanaakachihtaayich wiishuwewinh nesht chekwaayuuh taan e ishi ihtakuniyikwaauh e ihtinaanuyich. Paul maak chii masinahamuweu aniyuu iinuu anite Colossae kaa ihtaayich chechii nishkuushtuwaayich aniyuu nitawiin kaa ishi chiskutamaacheyitwaauh. Chii ishi chischisuumeu wii Jesus misiwe chekwaayuu e uchimaahkahtahk, kaye maak aniyuu e chii nipit ekun aniyuu mikw chechii pimaachihiikuuhkw chimachihtwaawinuuh uhchi, wiya maak e ihtaat uhchi ekut wehchi wiihkuchihiikuyihkw taan kaa ishi ushihtaayich naapeu wiishuwewinh.