Paul kaa masinahamuwaat kaa taapwehtamiitwaauh Philippihch kaa ihtaayitwaauh. Mekwaach chipahutuukamikuhch chii ihtaau Paul uyuu kaa itasinahiichet, anite Romehch ekute kaa ihtaat. Anichii iinuuch anite Philippihch kaa ihtaatwaau chii itishahwewaakupanenich aniyuu naapeu Epaphroditus kaa ishinihkaasuyich anite Paul e ihtaayich chechii ituhtatawaayich miiwewiniyuu. Mekwaach maak anite Romehch kaa ihtaat Epaphroditus chii aahkusuu, ekw naashch kaa aayimeyihtamihiikutwaau anichii kaa taapwehtahkwaau anite Philippihch kaa ihtaatwaau. Iskutak maak kaa miinuwaaspineyich, Paul miin kaau chii chiiwetishahuweu anite Philippihch chechii ituhtatawaayich umasinahamaachewin aniyuu iinuuh. Aat maak chipahutuukamikuhch e chii ihtaat Paul mekwaach kaa masinahamuwaat uyuuh iinuuh, yaapach chii nisituhtaakuniyuu muuchicheyihtamuwiniyuu e ayaat. Kaye maak chii nanaaskumeu Paul uyuuh iinuuh e saachihiikut kaye misiwe taan kaa ishi wiichihiikut.