Paul kaa nachishkawaat Jesus uchischinuhamuwaakaniyuuh
2
Neushaap pipunh paatimaa ekw miin Jerusalemihch kaa ituhteyaan. Barnabas ekw maak Titus nichii wiicheukuch. 2 Chishemanituu nichii waapahtiikw e nitaweyimit anite chechii ituhteuch. Kaa takushiniyaan maak anite niya ekw maak anichii kaa niikaanihaakanuutwaau kaa taapwehtahkwaau tipaan nichii nishtuwiinaan. Nichii wiihtamuwaauch taan nihaau kaa itweuch kaa waawiihtamaamach miywaachimuwiniyuu aniyuuh ekaa kaa taapwehtamiitwaauh. Nichii wii chischeyimaauch taan e iteyihtamihiikuwaakwenich aniyuu kaa ishi waawiihtamuch. Wesh chii ihtakuniyikupane chekwaayuu ekaa uhchi naheyihtamihiikutwaau sheshkwaaht chipaa ishinaakun taan kaa ishi pechi waawiihtamaan anite utaahch. Namui maak nuuhchi nitaweyihten sheshkwaaht chechii ishinaakuhch. 3 Titus maak, an kaa pechi wiicheut anite Achaia kaa ishinihkaateyich aschiiyuu ekute wehchiit. Namui Jewa itiskaanesuu. Aat maak ekaa Jewa e itiskaanesit namui uhchi aayihkamihiikuu aniyuuh kaa niikaanihaakanuyich chechii chischinuwaachishwaakanuut. 4 Mikw maak chii ihtaauch naapeuch chiimuut e chii pechi piihtepayihutwaau anit e ihtaawachiht muyaam e taapweyimaatwaau kaye wiyawaau Jesus e ihtitwaau. Nichii wii naanituu chischeyimikunaanich taan e ishi tipeyimachiht Jesus Christ e wiicheumachiht, an kaa aapihkuniyimiht. Eukw uyuu kaa ihtitwaau e chii wii ihtuutuuyimihtwaau kaau chechii maahchikwaapihkaatikuyaahch wiishuwewin. 5 Namui maak mitun nuuhchi niskumuwaanaan chechii ihtuuchiht aniyuu kaa ishi nituweyimiyamihtwaau chechii ihtuuchiht wesh niwii miyu kanuweyihtenaan taan e ishi taapwemakahch miywaachimuwin chiyawaau chechii chischeyihtamekw.6 Anichii kaa niikaanishkaachetwaau, chisteyihtaakusuuch chii iteyimaakanuuch. Namui maak chekwaan taan e iteyimaakanuutwaau nititeyihten niya wii. Wesh misiwe aweyuuh peyakunihch iteyimeu wii Chishemanituuh. Chii naheyihtamuch e waawiihtamuch miywaachimuwiniyuu, namui uhchi ihtakuniyuu etituu chechii ishi pechi wiihtamuutwaau. 7 Kaye chii nisituhtamuch Chishemanituuh e chii miiyich chechii aapatisiihkahtamuch miywaachimuwiniyuu e waawiihtamaamach aniyuuh ekaa Jewa kaa itiskaanesiitwaauh, mwehch taan kaa ishi miyaayich Peter aapatisuwiniyuu aniyuuh Jewa kaa itiskaanesiitwaauh chechii waawiihtamuwaayich miywaachimuwiniyuu. 8 Chishemanituu chii miyeu Peter kaschihuwiniyuu aniyuuh Jewa kaa itiskaanesiitwaauh chechii waawiihtamuwaayich miywaachimuwiniyuu mwehch kaa ishi miiyit kaschihuwiniyuu aniyuuh ekaa Jewa kaa itiskaanesiitwaauh chechii waawiihtamaamach miywaachimuwiniyuu. 9 James, Peter ekw maak John, anichii kaa niikaanihaakanuutwaau kaye maauch kaa chisteyimaakanuutwaau chii chischeyihtamuch Chishemanituu e chii miiyich uyuu chechii itaapatisuuch. Ekw maak Barnabas e niishiyaahch kaa utinischeniyamihtwaau uchii e nishtitwaau. E nuukuhtaayaahch peyakunihch e ishikaapuuyaahch. Maau maak kaa ishi niskumuyaahch. Barnabas e niishiyaahch anichii ekaa Jewa kaa itiskaanesitwaau che waawiihtamuwachihtwaau miywaachimuwiniyuu ekw maak wiyawaau aniyuuh Jewa kaa itiskaanesiyich che waawiihtamuwaatwaau. 10 Mikw peyakw chekwaayuu nichii pukuseyimikunaanich. Nichii nituweyimikunaanich chechii waawiichihiimachiht aniyuuh kaa taapwehtamiyich anit Jerusalemihch kaa ihtaayich kaa chistimaatisiyich. Eukw maak uu naashch kaa iteyihtamihiikuyaan chechii ihtiyaan.
Paul kaa aanuweyimaat Peter anite Antiochihch
11 Antiochihch maak kaa takushinit Peter chii ihtakuniyuu kaa ishi aanuweyimak. Wesh chii ihtakuniyuu taapwe taan kaa ishi wanipayit. 12 Maau kaa ihtit. Kaa takushihk anit Antiochihch namui wiyesh uhchi iteyihtam e wiich miichisuumaat maanh aniyuuh ekaa Jewa kaa itiskaanesiitwaauh kaa taapwehtamiitwaauh. Chek James chii pechi itishahweu pasch Jewa iinuuh kaa taapwehtamiitwaau. Naashch yaakwaau chii iteyihtamihiikuuch Jewa ayimiheu wiishuwewinh uchii. Misiwe aweyuuh kaa taapwehtamiyich chii iteuch chechii chischinuwaachishwaakanuyich. Peter maak chii kushteu uyuuh Jewa ekw namui miin uhchi wiich miichisuumeu aniyuuh ekaa Jewa kaa itiskaanesiitwaauh. 13 Ekw maak anichii kutakach iinuuch Jewa kaa itiskaanesitwaau anit kaa ihtaatwaau ekun mwehch kaa ihtitwaau, e chischinuwaapamaatwaau Peter taan e ihtiyich. Chii chischeyihtamuch maak ekaa uyuu chipaa uhchi ihtuuch. Waawaach Barnabas chii ati asichipitaakanuu kaye wiya uyuu chechii ihtit. 14 Wiyaapamakwaau maak ekaa kuiskw ihtitwaau taan e itashteyich Chishemanituuh umiywaachimuwiniyuu kaa taapwemakaniyich nichii aanuweyimaau Peter misiwe aniyuuh kaa taapwehtamiitwaauh e nituhtamiyich. Nichii itaau, “Jewa chititiskaanesin. Mikw maak namui misiwe chinanihiihten Jewa ayimiheu wiishuwewinh. Chekwaan maak wehchi siihchimatwaau anichii ekaa Jewa kaa itiskaanesitwaau Jewa ayimiheu wiishuwewinh chechii nanihiihtahkwaau.”
Taapishkun Jewa iinuuch kaye anichii ekaa Jewa kaa itiskaanesitwaau pimaachihuuch e taapweucheyimaatwaau Jesus Christ
15 Jewa nititiskaanesinaan, namayeuch niyaan aahchiiuh kaa itiskaanesitwaau awenichii kaa machaatisiitwaau. 16 Yaapach maak nichischeyihtenaan e taapweyimaat awen Jesus Christ ekut wehchi ukuiskutaatisiiu ishi kanawaapamikut Chishemanituuh, namui wii aniyuu uhchi e nanihiihtahk wiishuwewinh. Ekw maak kaye niyaan tiyaapweyimachiht Jesus Christ, e taapweyimachiht maak Christ ekut wehchi ukuiskutaatisiiuch ishi kanawaapamiyimiht Chishemanituu. Namui wii an e nanihiihtamaahch Jewa ayimiheu wiishuwewinh wehchi ishi kanawaapamayimiht. Taapaa awen ukuiskutaatisiiu chika uhchi ishi kanawaapamikuu Chishemanituuh mikw aniyuu e nanihiihtahk Jewa ayimiheu wiishuwewinh. 17 Mekwaach kaa naanituweyihtamaahch taanite chechii uhchi naniheyihtamihiichiht Chishemanituu, iskutak tiyaapweyimachiht Christ, ekut kaa uhchi chischeyihtamaahch kaye niyaan e machaatisiyaahch muyaam taan e ishi machaatisiitwaau anichii ekaa Jewa kaa itiskaanesitwaau. Christ aa maak ihtuutuweu aweyuu chechii machaatisiyich. Namui kiipaa. 18 Wesh wawestuutamaane chekwaan e chii piikupitamaan ekut che uhchi chischeyihtaakusiyaan e chii wanihpisuyaan. 19 Mekwaach suuhk kaa wii nanihiihtamaan Jewa ayimiheu wiishuwewinh chek nichii nisituhten ekaa an Jewa ayimiheu wiishuwewin e nanihiihtamaan che uhchi ukuiskutaatisiiu pechi ishi kanawaapamit Chishemanituu. Ekw maak anuhchiish mwehch e nipiyaan kaye ekaa ekw maahtakushkaakuyaan aniyuuh wiishuwewinh nitishinaakusin. Ekw maak taapwe chechii pimaatisiistuuk Chishemanituu. 20 Wesh mwehch taapwe e chii wiich nipiimak Jesus kaa chiistaaskuhwaakanuut ishinaakun. Anuhchiish maak namui ekw niya nichischinupayihtaan nipimaatisiiwin. Wiya Jesus chischinupayihtaau nipimaatisiiwiniyuu wesh nipiihchishkaakw. Ekw maak uu anuhchiish e ishi pimaatisiyaan nipimaatisiin e taapweyimak an kaa saachihiit kaye kaa pachishtinisut chechii nipahaakanuut niya uhchi, eukw Chishemanituu Ukusisa. 21 Namui nitiichenamuwaan Chishemanituu ushaweyihchichewin. Wesh chiishpin awen ukuiskutaatisiiu ishi kanawaapamikut Chishemanituuh, mikw e nanihiihtahk Jewa ayimiheu wiishuwewinh ekw kiipaa mwehch sheshkwaaht e chii nipahaakanuut Jesus chipaa ishinaakun.