Christ kaa wanishkaat nipuwinihch uhchi
15
Ekw maak waa chischisuumitakuch,
niichishaanitikw,
an miywaachimuwin kaa aayimuutamaan kaa kacheschimitakuch,
chichii taapwehtenaawaau kaye maak chichii utinenaawaau taan kaa ishi wiihtamaan.
Eukuu miywaachimuwin yaaichikaapuuhiikuyekw.
2 Eukuu miywaachimuwin Jesus kaa aayimuumaakanuut kaa aayimuutamaan kaa kacheschimitakuch.
Eukuu che pimaachihiikuyekw suuhk mamechiminamekwe.
Ekaa maak uu ihtiyekwe ekw kiipaa sheshkwaaht e chii taapwehtamekw che ishinaakuhch ekaa pimaachihiikuyekwe.
3 Wesh chichii aashuu wiihtamaatinaawaau an kaa miikuyaan chechii chischeyihtamaan.
Naashch taapwe chihchiwe iteyihtaakun uu kaa waawiihtamaatakuch.
Maau e ishi wiihtamaachemakahch.
Christ chichii nipistamaakunuu chechii wepeyihtamaakuuhkw chimachihtwaawinuuh mwehch e ishi aayimuuteyich anite Chishemanituu utayimuwinihch che ihtuutamaatahkupane.
4 Wiihtamaachemakan uu miywaachimuwin e chii chiskashtaakanuyich Christ wiiyuu.
Iskutak maak kaa nishtuchiishikaayich ekw kaa wanishkaanaakanuut kaau chechii pimaatisiit.
Eukw uu e ishi aayimuutech Chishemanituu utayimuwinihch.
5 Aayimuuteu kaye e chii nuukushiishtawaat Peter.
Chek miin aniyuuh kaa niishushaapuyich kaa nuukushiishtawaat aniyuuh wiya wechiihch kaa wiyaapamaat chechii nuushuushkaakut.
6 Chek maamuu kaa nuukushiishtawaat uste niyaayinwaau mitaahtumitanuu e tashiyich aniyuuh kaa taapweyimikut.
Eshkw mihchetu pimaatisiyuuh uyuuh kaa nuukushiishtawaat.
Pasch shaash chii puunipimaatisiyuuh.
7 James miin chii nuukushiishtaweu.
Misiwe kaye aniyuu apastal kaa itaapatisiyich chii nuukushiishtaweu.
8 Yaapach nichii nuukushiishtaakw kaye niya aat niya maauch nuuhtaash e chii iteyihtaakusiyaan.
Niya maahchishtai nichii nuukushiishtaakw.
9 Wesh niya maauch namui chekwaan nititeyihtaakusin e tashitwaau misiwe anichii kaa wiyaapamaakanuutwaau apastal chechii itaapachihaakanuutwaau.
Namui waawaach nitepicheyihtaakusin apastal chechii ishinihkaatikuyaan wesh nichii nanehkaachihaayuuh Chishemanituu utiiniimh.
10 Mikw maak Chishemanituu sehchei e miyutuutamuwaat aweyuuh ekut wehchi ishinaakusiyaan taan e ishinaakusiyaan anuhchiish.
Namui maak sheshkwaaht aniyuu kaa ishi sehchei miyutuutamuut.
Niya maak wii,
etituu suuhk nichii aapatisin ishpishaat misiwe e tashitwaau anichii kutakach apastalach.
Namayeu maak niya tipiiwe kaa ihtiyaan.
Chishemanituu wiya sehchei e chii miyutuutamut wehchi ihtuutamaan uu kaa ishi aayimuutamaan.
11 Eukw uu miywaachimuwin misiwe e tashiyaahch e ishi kacheschimuweyaahch,
niya ekw maak anichii kutakach apastalach.
Eukw maak uu tiyaapwehtamekw.
Che wanishkaanikuyihkw nipuwinihch uhchi
12 Uu maak e ishi kacheskweyaahch e aayimuutamaahch Christ e chii wanishkaanaakanuut kaa nipit,
taanite pasch anit e tashiyekw wehchi itweyekw ekaa kaau che uhchi wanishkaanaakanuutwaau anichii kaa nipitwaau.
13 Wesh taapwe an e ishinaakunikwe ekw kiipaa namui uhchi wanishkaanaakanuyiche Christ kaa nipit.
14 Ekw maak ekaa kaau uhchi wanishkaanaakanuukwe Christ kaa nipit ekw kiipaa namui wiyesh itaapatan an kaa ishi kacheskweyaahch.
Kaye maak namui wiyesh itaapatan taan e ishi taapwehtamekw.
15 Waawaach chipaa nuukun e nanatayaachimachiht Chishemanituu wesh nichii itaachimaanaan kaau e chii wanishkaanaat Christ kaa nipiyich.
Tiyaapwemakanikwe maak ekaa kaau wanishkaanaakanuutwaau kaa nipitwaau ekw kiipaa namui uhchi wanishkaaneche Chishemanituu Christ.
16 Wesh taapwe ekaa kaau weniskaanaakanuuwaakwenich kaa nipitwaau ekw kiipaa kaye wiya Christ namui kaau uhchi wanishkaanaakanuwiyiche.
17 Ekaa maak uhchi wanishkaanaakanuukwe Christ kiipaa sheshkwaaht kaa taapweyimekw.
Kaye maak eshkw chiwanishinaawaau chimachihtwaawiniwaahch.
18 Tiyaapwemakanikwe ekaa kaau wanishkaanaakanuutwaau anichii kaa nipitwaau kiipaa anichii shaash kaa nipitwaau e chii taapweucheyimaatwaau Christ wenisihkwaau.
19 Chiishpin yaakwaamaach mikw utah aschiihch e pimaatisiihkw waahchihiikuwaauhkwe e taapweucheyimahkw Christ chiyaanuu maauch chichistimaacheyihtaakusinaanuu e tashit awen utah aschiihch e pimaatisiit.
20 Mikw maak taapwemakan Christ kaau e chii wanishkaanaakanuut kaa nipit.
Ekut maak wehchi cheshtinaateyihtaakuhch kaye wiyawaau che wanishkaanaakanuutwaau anichii kaa nipitwaau e chii taapweyimaatwaau Christ.
21 Wesh chii ihtakuniyuu peyakw naapeu chekwaayuu e chii ihtit wehchi ihtakuhch nipuwin,
kaye maak ihtaau kutak naapeu aniyuu taan kaa ihtit ekut wehchi ihtakuniyich kaau chechii wanishkaanaakanuutwaau kaa nipitwaau.
22 Nipiwiniyuu chichii petwaakunuu Adam,
wiya maak Christ pimaatisiiwiniyuu chichii petwaakunuu.
23 Misiwe maak awen ihtakuniyuu taaishpish che wanishkaanaakanuut.
Christ niishtam kata waanishkaanaakanuu.
Ekw maak che wanishkaanaakanuyich aniyuuh aweyuuh kaa tipiyeusiit iskutak miin takushihke.
24 Ekw maak Christ che wanaachihtaat misiwe uchimaawiniyuu,
misiwe tipeyihchichewiniyuu kaye suuhkaatisiiwiniyuu.
Ekw maak che iskwaapayihch aschii.
Iskutak maak uu chii ispayihche ekw Christ che miyaat Chishemanituuh Uhtaawiimaauh chisheuchimaawiniyuu.
25 Wesh wiya kata uchimaau Christ paatish Chishemanituuh chii ashpashihaayichenh misiwe aniyuuh kaa uhkaateyimikut Christ nesht chii miikute tekash chechii tipeyimaat.
26 An maahchishtai chekwaan che wanaachihtaakanuuch eukw nipuwin.
27 Wesh itashteu Chishemanituu utayimuwinihch,
“Chishemanituu misiwe chekwaayuu chii miyeu chechii tipeyihtamiyich.”
Uu maak kaa itashtech misiwe chekwaayuu chii miyaakanuu wiya chechii tipeyihtahk nisituhtaakun ekaa asitichimaakanuut Chishemanituu anit aniyuu kaa itashteyich.
Wesh Chishemanituu Christ miyeu misiwe chekwaayuu chechii tipeyihtamiyich.
28 Iskutak misiwe chekwaayuu chii miyaakanuute Christ chechii tipeyihtahk ekw wiya Christ che pachishteyimitisuustawaat Chishemanituu,
aniyuuh kaa miikut misiwe chekwaayuu chechii tipeyihtahk.
Ekw maak Chishemanituu tekash misiwe chekwaayuu kaye misiwe aweyuuh che tipeyimaat.
29 Ihtaauch anichii e chii siikahaahtaakusiitwaau aniyuu uhchi aweyuuh shaash e chii nipiyich.
Taan maak waa ihtitwaau aniyuu kaa ihtitwaau.
Wesh taapwe ekaa miin weniskaanaakanuuwaakwenich anichii shaash kaa nipitwaau chekwaayuu wehchi siikahaahtaakusiitwaau aniyuu uhchi aweyuuh shaash e chii nipiyich.
30 Ekw maak niya,
chekwaan eshikum tipahiikanh wehchi pachishtinisuyaan taanit kwestaatikuhch ekaa e ihtakunikwe wanishkaanuwin.
31 Niichishaanitikw,
eshikum chiishikaauh nipeshuwaapahten nipuwin.
An e ishi maamihchihiyekw taapishkun e wiicheuhkw Utipeyihchikeu Jesus ekut wehchipayihch uu chechii itweyaan.
32 Chiishpin maak muhch kaa maasihaauchenich naapeuch mwehch awesiisach kaa kushtaatikusiitwaau kaa iteyihtaakusitwaau Ephesus kaa ihtaatwaau chekwaan kaa wiihkuchihtamaasuyaan.
Chiishpin taapwe ekaa weniskaanaakanuuwaakwenich anichii shaash kaa nipitwaau ekush kiipaa chipaa ihtuutenaanuu an kaa iinaanuuhch che ihtuutaakanuuhch,
“Miichisutaau kaye minihkwetaau,
mishuwaach waapahche chika nipinaanuu.”
33 Ekaawii chika uhchi wiyeshimikunaawaau.
Taapwemakan an kaa iinaanuuhch,
“Anichii kaa machaatisiitwaau awenich e papaawiichewaakanuutwaau ekut wehchipayihch nitamukw e ihtinaanuuhch.”
34 Wii waashkameyihtamukw maa.
Ekun ekw ishpish machituutamukw.
Chipaa pimaamishiinaawaau e ititakuch pasch anit e tashiyekw ekaa chischeyimekw Chishemanituu.
Taan che ishinaakusitwaau anichii che wanishkaanaakanuutwaau nipuwinihch uhchi
35 Maak chika chii kakwechihcheyimuu awen,
“Taan e iteyihtaakuniyich awen e wanishkaanaakanuut e chii nipit.
Taan che ishinaakuniyich wiiyuu wanishkaanaakanuute.”
36 Nuwach namui chititeyihtenaawaau an kaa ishi kakwechihcheyimuyekw.
Maamituneyihtamukw maa chekwaan e nihtaauchihtaakanuuhch.
Niishtam anite nitaamihch aschiihch ashtaakanuu shuumin ati wehchi chihchi nihtaauchihch chekwaan.
An maak kaa ashtaakanuuhch anite pitamaa chika nipiimakan.
Ekw maak yaakw che pimaatisiimakahch,
ekw yaakw che nihtaauchihch.
37 An maak shuumin kaa ahaakanuut anite aschiihch namui mitun chischeyihtaakun taan nihaau che ishinaakuhch iskutak chiishi nihtaauchihche.
38 Chishemanituu maak wiya wiyeyihtam taan che ishi nihtaauchihcheyich misiwe nanaahkuu e ishinaakusiyich shuuminh.
39 Maak maamituneyimekuch iinuuch,
awesiisach,
piyeshiishach ekw maak namesach.
Misiwe aahchiiuh ishinaakuniyuu wiiyuwaauh.
40 Ihtakunh kihchikiishikw miiyuuh kaye ihtakunh aschiiyuu miiyuuh.
Aahchiiuh maak ishi chisteyihtaakunh kihchikiishikw miiyuuh taan e ishi chisteyihtaakuhkwaau aschiiyuu miiyuuh.
41 Ihtakuniyuu e ishi miywaashtawet piisim.
Tipischipiisim kaye ihtakuniyuu e ishi miywaashtawet.
Kaye achahkushach ihtakuniyuu e ishi miywaashtawetwaau.
Anichii achahkushach nanaahkuu ishinaakuniyuu e ishi miywaashtawetwaau.
42 Ekun mwehch e ishinaakuhch miiyuu,
iskutak kaa nahiihkaakanuuhch ati wiinipayuu an miiyuu.
Iskutak maak wanishkaanaakanuute nipuwinihch uhchi,
aniyuu wiiyuu kaachiche chika pimaatisiimakaniyuu.
43 An kaa nahiihkaakanuuhch miiyuu namui pimaatisiimakan kaye wiinaakun.
Iskutak maak wanishkaanikanuuhche nipuwinihch uhchi nuwach chika suuhchisiimakan kaye chika miywaashuu.
44 Awen e nahiihkuwaakanuut,
aniyuu wiiyuu iin miiyuu ishinaakuniyuu.
Iskutak wanishkaanaakanuute an kaa nahiihkuwaakanuut,
aniyuu wiiyuu ahchaahkw miiyuu chika ishinaakuniyuu.
Ihtakun iin miiyuu.
Ihtakun kaye Ahchaahkw miiyuu.
45 Masinaateu anite Chishemanituu utayimuwinihch e itashtech,
“An niishtam naapeu,
Adam,
chii ishihaakanuu chechii pimaatisiit.”
An maak maahchishtai Adam eukuu Christ,
Ahchaahkuu wiya,
wiya miiweu pimaatisiiwiniyuu.
46 Niishtam miiyuu chimiikunaanuu utah aschiihch.
Ekw maak paatimaa che miikuyihkw ahchaahkw miiyuu.
47 An niishtam naapeu Adam,
iskutak kaa usihiikut Chishemanituuh sischuuhch chii uhchi usihiikuu.
Christ maak kihchikiishikuhch chii uhtuhteu wiya.
48 Misiwe awenich utah aschiihch kaa pimaatisiitwaau mwehch Adam kaa ishinaakusiyich ishinaakusuuch.
Ekw maak anichii awenich anite kihchikiishikuhch che ihtaatwaau mwehch Christ kaa ishinaakuniyich chika ishinaakusuuch.
49 Mwehch maak e ishi nispituuhkw an sischuuhch kaa uhchi ushihaakanuut cheshtinaash kaye chika nispituwaanuu an kihchikiishikuhch kaa uhtuhtet.
50 Maau waa ishi wiihtamaatakuch niichishaanitikw.
Uyuuh chiiyuunuuh kaa wiyaasuuhkwaau kaye kaa mihkuuhkwaah namui kata chii ihtakunh anite Chishemanituu uchisheuchimaawinihch,
kaye maak an chekwaan che nipiimakahch kaa ishihtaakanuuhch namui kaachiche kata chii pimaatisiimakan.
51 Chiwiihtamaatinaawaau chekwaan ekaa chischeyihtaakunuuhch.
Namui misiwe chika uhchi nipinaanuu.
Mikw maak misiwe e tashiihkw sischikuuch chika kweschinaakuhiikunaanuu.
52 Iskutak pehtaakuhche puutaachikan peyakwaau e piskaapit awen ekun che ishpish chishipayihch e kweschinaakuhiikuyihkw.
Ekw maak anichii kaa nipitwaau che wanishkaanaakanuutwaau nipuwinihch uhchi kaachiche chechii pimaatisiitwaau.
Ekw maak misiwe che kweschinaakuhiikuyihkw.
53 Wesh miiyuu kaa wiinipayihch chika kweschinaakuhtaakanuu ekaa chechii wiinipayihch.
Kaye chika kweschinaakuhtaakanuu ekaa nihtaa miin che nipiimakahch.
54 Iskutak maak anichii awenich kaa nipitwaau e wiinipayikwaauh wiiyuuwaauh wanishkaanaakanuutwaawenich kaachiche pimaatisiiwinihch ishi ekw che ispayihch an kaa itashtech Chishemanituu umasinahiikanihch,
Shaash namui ihtakun nipuwin,
shaash tekash chii shaakuuchihtaakanuu.
55 Shaash mitun tekash chii tepihtaakanuu nipuwin.
Namui mechim chika chii aahkuhiikunaanuu ekw.
56 wesh machaatisiiwin eukw e ituhtahiiwemakahch nipuwinihch.
Wiishuwewiniyuu maak shaakuuchipitikuu awen chechii machituutahk.
57 Chika nanaaskumaanuu maak Chishemanituu chitipeyihchikeminuu Jesus Christ uhchi.
Chichii ihtuutamaakunaanuu ekaa chechii shaakuuchihiikuyihkw nipuwin,
teyakuch kaachiche chechii pimaatisiihkw.
58 Eukw maak uu wehchi siihchimitakuch niichishaanitikw kaa saachihiitakuch,
yaaichikaapukw e pimaatisiistuwekw Utipeyihchikeu.
Ekaawii nuuhtapuuniikw.
Suuhk muush aapatisiishtuwaahk Utipeyihchikeu.
Wesh chichischeyihtenaawaau cheshtinaash ekaa sheshkwaaht aapatisiishtawekw Utipeyihchikeu.