Anite Ephesus kaa ishinihkaateyich ihtaawiniyuu ekut kaa ihtaat Paul kaa masinahahk uyuu umasinahamaachewin. Namui naashch uhchi miyuuhtaakuniyuu taan kaa ishi pehtahk e itaachimaakanuyich aniyuu kaa taapwehtamiitwaauh miywaachimuwiniyuu anite Corinth kaa ihtaayich. Chii ihtakuniyuu taan kaa ishi mamachipayihkahtaatutwaau anichii umaamuuayimihaauch anit kaa ihtaatwaau. Chii kakatepaanipayihuuch anite ishi e ihtaayich nanaahkuu aweyuuh e itetwaau eukunh aniyuu e nuushuushkuwaatwaau. Ekw pasch machaatisiiwinihch kaa ishi pimaatisiitwaau. Chii aanuweyimeu maak Paul uyuuh umaamuuayimihaauh. Ekw kaa chiskutamuwaat taan chipaa ishi pimaatisiyuuh aweyuuh kaa taapwehtamiyich miywaachimuwiniyuu. Naashch taapwe chii weyuutan e machaatisiinaanuuhch an ihtaawin Corinth kaa ishinihkaatech. Chii aayimihiikuuch anchii kaa kweskaatisiitwaau ekaa chechii ihtitwaau taan e ihtiyich aniyuuh aweyuuh waaskaa e ihtaatwaau kaa wiichiyich. Uyuu maak kaa ishi masinahamuwaat Paul chii wii chiskutamuweu taan chipaa ishi pimaatisiyuuh e taapweyimaayich Jesus. Ekw maak chipaa chischeyihtamiyuu taaniyuu aniyuu meywaashiyich chechii ihtinaanuyikupane kaye taaniyuu e maayaataniyich.