Daniélichi quirajanunca to jeraino ma queloinasa niyan ino jonunca
10
Miya Ciro peman wata Persia tobi mantanasa, Daniélichi quirajanue. (Daniel “Beltsasar” mumunnan jominue.) Diosi Daniélichi quirajasa carito, yaca tsarasi fiquica miisa carinue. Duque wepanantsan fiqui josanan, Daniel entendeinue. Quirajacaca jera miino podeinue.2 Junca Daniel itsanque pila chutenue: Jun malate la Daniel peman tominco fecári duque wepananamanyoe. 3 Sen anoca fitun, tsachicaca fitun, binoca cuchitun, puban pi ilipotun, jomanyoe peman tominco fecári.
4 Junni wata wicale nechi caque pete, palu chunca junpalu mate, Hidekel tinun wa pi fiquile wiruramanyoe. 5 Junni jamochi quiranari, tsachi tsan wiruranue. Yachi baren camisa lino cuwa tsanca quica jun joe. Duque sen oro corea quica jun joe. 6 Yachi pucari berilo tinun sunan quiran joe. Yachi caforo cunta pinda cuenta tsen joe. Cacari nin lunaca tsanni quiran joe. Yachi tede, nede casica jun bronsenan quiran joe. Ya pánasa, duque tsachila pánanun cuwenta mera jae.
7 La Daniel yaca quirayoe; lachisiri quirajae. Labe peramin tsachilari natiya quiratusanan, yalachi duque jelelaquinan, sujito tsailaie. 8 Junni la mancasiri wirurasanan, duque quirajae. Yaca quirato, duque cumana ito, natiya sonba iton iyoe. 9 Junni ya tsachi tsan cuenta quinaminca meráyoe. Yaca meráto, tobi palo tala queereito tenjatucari catsoyoe.
To jeraino ma quelo inasa niyan ino jonunca
Junni ya tsachi tsan Daniélibe cuenta quinue to jeraino ma queloinasa niyanhino jonunca. Duque bolonlanan quera quino jonunca panue. Aman Daniéliri junca pato itsanque pila quinue: