4 Junni cobernadorilabe tenientelabe junca meráto, tenca calaquinue Daniélica niyaque culpa tan suwantsan junhunque yape yalaca mantamin itosa. Daniel mantimini duque sen tsachi jonun tenchi, yaca niyaquenantiya culpa patarino podeilaitunue. 5 Juntonan Daniélica pa jominlari catenpanato, yala tala itsantilatinue: Daniélica niyaquenantiya culpa quino podeilaitiyoe seiton patarichun. Jun tenchi Daniélica manquiraque tenpalaquinue yari Diosibe penenamin joto in tote mantanunca merátuchunaeque. Junni miya Daríori Diosichi cosa contra mantanari, Daniel ya mantaca merátuto culpa patichunaeque tenpalaquinue.

6 Junni cobernadorilabe tenientelabe tsanque tenpatobi, miya Daríobe cuenta quebi jilainue. Miyachibi fetobi, itsanque palaquinue:

—O Miya, nu duque sen jonan, duque numari fecári sonnasa tenjalaquee latinue. 7 Jerale tote nechi mantaminla tala layaito cuenta quilaquiyoe latinue. Miya, nu casan mantá quinari, duque se jono jochunae latiyoe tilatinue. Darío, nu mantade! peman chunca ma fecári monantiya diosilabe rocailaitusa, nin uyan tsachilabetiya. Miya, nubesiri rocailaisa tina! tilatinue. Mo tsachilatiya ya mantaca merátulajonari, luquela forochi quepontsan jochunae latinue. 8 Jun tenchi Miya, nuri in pilaca firmaquede! latinue yape monantiya ya mantaca piyarin, ni canbiyaquin, quilaquitusa.

9 Junni jun mantaminla pacaca meráto, miya Daríori ya mantaca firmaquinue.

10 Junni jun wanbileri Daniel meránue miya Daríori ya casan mantaca numa firmaquinueque. Junni Daniéliri yachi yabi manfetobi, catsonun tamochi wito, numasitiya bentana lasimin jomin joto, jun matenan tsanquenan lasiniquinue. Ya bentanari Jerusalén nan tala jominue. Jun bentanale jito Daniéliri numasitiya Diosica se tito rocaimin jominue. Junni Daniéliri ma cura peman ne Diosica se tito rocaimin joto, jun matenan jun tsannan inue. 11 Junni Daniélica pa jominlari quelo féto quiranari, Daniel Diosica se tito rocainaminue. 12 Junni Diosibe rocainaminca quirasi, mantaminlari we jilainue miya Daríobe pabi. Daríobe itsanque palaquinue:

—Miya, in peman chunca ma fecári jeralela ti cosacatiya nubesiri panhano jominhe latinue. Nuri ya mantaca firmaquica joe latinue. Ya mantári itsanque mantanae: Nube panhatuto, diosilabe o pansile uyan tsachilabe panhanari, yaca luquela forobi quepono jochunaeque mantanue. ¿Tsan joco?

Junni miyari manpato, itsantinue:

—Tsan joe tinue. Junni chiquilari médolachi, junsi pérsalachi mi tatori, jun mite quintsan jochunae tinue. Nin mantaminlari yalachi mantaca canbiyaquin, nin piyarin, quituntsan joe tinue. Junni ya mantaca firmaquica joto, obedeseisa carintsan joe tinue.

13 Junni mantaminlari itsanque palaquinue:

—Daniéliri jun mantaca merátumin joe tilatinue. Yari israelita joe; Judá tobi nechi chiquilachi toca tanjaca jun joe. Yari nuca respetaituto, nuchi mantaca merátumin joe. Daniel ma cura peman ne yachi Diosibe rocaimin joe latinue.

14 Tsanque merasi, miyari duque laquiinue. Junto miya Daríori Daniélica niyaquetiya se larichique tenfenue. Yo pelechi wino fecári tenca canue yachi amicoca se larichique. Junni duque tenfenatonan, natiya podeitunue.

15 Junni seiton tsachilari miyachica jato, itsanlatinue:

—Miya, nuri mirae médolachi mite, junsi pérsalachi mite, miya firmaquica jun mantaca piyarituntsan jochunaeque.

16 Junni miya Daríori Daniélica tanjalaisa erenue yape luquela forochi quepolaquisa. Junni luquela forochi quepolaquechinasanan, miyari Daniélibe itsantinue:

—Nuri nuchi Diosibe duque seque mantaimin jonan, yari nuca se larisa tenjae tinue yape luquela fitusa.

17 Junsi Daniélica luquela forochi queposi, wa suca tanjato dolaquinue. Junsi wara poto, miyari jun warabi caoton josanan yachi aniyochinan seyo quinue. Junte nechi duque miyachi mantaminlanan jun tsanquenan warabi aniyochi seyo quilaquinue yape monantiya Daniélica manlarino podeilaitusa. 18 Junni miyari yachi yabi manfesi, ano fituminnan tsodinue. Junto miyari laquichi man quepen catsono podeitunue. Junsi musica merátunue.

19 Junni miyari tseinunsileri wepana wiruito jun luquela foroca quirabi sujinue. 20 Junni luquela forobi quelo fesi, Daniélica duque laqui tito otito itsantinue:

—Daniel, nuri tsa sonnamin Diosibe duque seque mantaimin jonan, ¿nuchi Diosi nuca isaino podein? tinue yape luquela fitusa.

21 Junni Daniel manpato, itsantinue:

—Miya, nuri tsancari sen jonan, numatotiya sonnato polesa tenjae tinue. 22 Lachi Diosiri yachi anjelica erenue. Ya anjeliri luquela fiquiforoca doquee yape laca fitusa, nin fuda suwatusa. La culpa itonunca, o nuchinan contra itonunca, Diosiri jera mirae tinue.

23 Junni miyari duque son tito yachi tsachilaca mantanue yape Daniélica luquela forobi nechi manlarilaquisa. Junni manlarisi quiranari, niyannantiya ica iton jominue; nin fuda suwaca iton jominue. Daniéliri Diosica duque tennamin jonan, luquelari yaca niyanantiya quitunue. 24 Junnan miyari Daniélica seitonque culpa quiminlaca jeralelaca casa erenue. Junni miyari jun seitonlaca luquela forochi queposa mantanue. Yalachi sonalaca, yalachi nalalacanan, jeralelaca luquela forochi queposa mantanue. Junni jun seitonlacari ya luquelalari tobi capatitumincanan casi casi jera piti cura erelaquinue yalachi chideca jera coleto.

25 Junni miya Daríori we pila quinue yachi tobi chuminlachi erechun. Itsanque pila erenue:

Lachiri jeralelaca pansi seque chularasa tenjae. 26 Junsi mantanayoe Daniélichi Diosicasiri duque jelerato respetailainaque. Yari son Diosi joe. Ya mantananun tsachi bolonlaca numatotiya cuidainanan, monantiya yalaca yucapiyarino podeilaituchunae. Yari numatotiya mantá tan joto polechunae. 27 Junni Diosiri se larimin joe; yari fe losa carimin joe. Diosiri wepanato quirantsancari seque quimin joe. Diosichi tobinan, in tótenan, tsannan quimin joe. Duque seque quimin joe yape yachi tsachilari son Diosi joeque tenhilaisa. Junni Diosinan Daniélica luquela fisa carituto se larinue. 28 Darío miya jono mate Daniéliri duque mantá tan jominue. Junsi Círori Persia tobi miya jono matenan Daniéliri jun tsanquenan mantá tan jominue.