Tamo pebi pila quinunca
5
Junni wanbile Belsasáriman Babilonia tobi miya inue. Junni yari yachi tobi mili mantaminlaca jasa tinue fiesta quichun tito. Junsi ano finato, miyari ya jasa tica junlabe duque bino cuchilaquinue. 2-3 Aman miyachi tata Nabucodonosor duque calaca, óroca quica jun tása tsanlaca Jerusalenbi nechi caya jominue. Diosichi yabi nechi tarinto Babilonia toca tanjaca jominue. Junni miya Belsasar winan ito, ya tása tsanlaca tanjasa carito, junbi binoca cuchilaquinue. Miyachi tsa sonala, junsi yachi uyan sonala, junsi jerale fiestabi raminlari jun tásabi bino cuchilaquinue. 4 Junni jeralela bino cuchinato, yalachi diosi tinunlaca se tilatinue. Oroca, calaca, bronseca, fieroca, chideca, junsi suca, quica jun diosilaca se tilatinue.5 Junni yala miyachi yabi fiesta quito chularasanan, tsachi tede tsan quirainue. Junni ya tederi fiban tamo pebi pila quinue lanparin chunun caquele. Junni tseno tsechi miyari ya tedeca pila quinaminca quirato, 6 wepanacachinan jera fiba lanue; junsi cumana ito pucalete jera jowinponue. 7 Junsi duque sonba atito otie Babilonia ponelalaca, junsi titiya minlaca. Junni yalabe itsantinue: Mo ja pilaca quica junca quiraminchi, junsi ti niyaque pánanunca paminchi, lari tsara sen tsanpa posa cariyanae tinue. Junsi oro cadenaca cuwanae yape cudanbi posa; junsi la mantananunbi duque mantá tan pesuwanae tinue. Labe lachi apabesiri yaca fe mantá tacaichunae tinue.
8 Junni miyachi jerale minlari tamochi wilainue. Junni monantiya tamopebi pila chuminca quirano podeituto, ti niyaque pánanunca pano podeilaitunue. 9 Junni miya Belsasáriri duque jelechi jera fiba lanue. Junsi miyabe mantaminlari niyantiya quino miitominlanue. 10 Junni miya Belsasárichi mamari yachi nieto atinaminca meráto, fiestaca jasa tica junlanan peatinaminlaca meránue. Junto fiesta quinanun tamochi wito, Miya, nuri duque sen joto numari fecári sonnasa tenjae tito itsanque panue:
—Ja pila tenchi tennatude! tinue. Fiba latude! tinue. 11 In tote sen diosilachi tenca pun tsachi manca joe tinue. Nuchi tata miya joto, yaca seque tenca cano min, tenca oco, jonunca miraminue. Junsi diosila cuwenta duque min joe tinue. Jun tenchi miya Nabucodonosóriri ya tsachica jerale minlaca, ponelalaca, mantamin suwaca jominue tinue. 12 Junni ya tsachiri Daniel mumun joe tinue. Aman miya Nabucodonosor Daniélica Beltsasar mumun poca jominue tinue. Yari duque min tenca oco joe tinue; junsi quipica junlaca niyaque pánanunca entendeino podeimin joe tinue. Junsi duque tenfe fiquilacanan niyaque pánanunca pano podeimin joe tinue. Junsi tenfe problemalacanan manse patarino poden joe tinue. Junni nuri Daniélica jasa tide! tinue. Junni yari tamopebi pila chuminca pano podeichunae tinue.
13 Junni Daniélica miyachica tanjalainue. Junni miyari itsanque panhanue:
—¿Nu Daniéliyun? tinue. ¿Lachi tata Nabucodonosor nuca inchi jasa carin? ¿Judea tobi nechi israelita joco? tinue.
14 Junni Daniel tsa joe tinue. Junni miyari itsantinue:
—Nuchi tencabi sen diosilachi tenca poe latie tinue. Seque tenca camin, junsi min, tenca oco joe latie tinue. 15 Junni meráde! Fe min tsachilari inte raminlae tinue ja pilaca quirato ti niyaque pánanunca pachun. Juntonan yalari tinantiya entendeino podeilaitue tinue. 16 Junni lari nuca tsarasica entendeimin joeque meraca joyoe tinue. Junsi duque tenfe problemacanan manse patarimin joeque meráyoe tinue. Junto nuri in pilaca quirato ti niyaque pánanunca pade! tinue. Lachi tenchi tsannari, lari duque sen tsanpaca posa cariyanae tinue; junsi cudanbi oro cadenaca posa cariyanae tinue; junsi la mantananunbi duque mantá tan pesuwanae tinue. Labe lachi apabesiri nuca fe mantá tacaichunae tinue.
17 Junni Daniéliri miya Belsasáribe itsanque panue:
—Miya, nube duque acradeseinayoe. Tsanno josanan, nu epe cuwano junca lari munaratiyoe; nin mantananunbi duque mantá tan pejono munaratiyoe tinue. Junni uyan tsachilachi ya mantaca cuwade! tinue. Juntonan lari tamopebi pila chuteca junca quiraniquechinayoe. Ti niyaque manpánatiya, lari nube manpánae tinue.
18 Junni jamochi chumin Diosiri nuchi tata Nabucodonosóricari duque mantá tan suwanue. Junni duque sonban miya suwanue tinue yape tsachilari yaca respetaito se tilatisa. 19 Jun tenchi jerale pueblobi chumin tsachilari, jera bolonlanan, jerale fiqui paminlanan, miya janasa respetaito jowinpomin jominlae tinue. Junsi yari moca toteno munaratotiya, toteniquimin jominhe; junsi moca sonnasa tenjanari, sonnasa carimin jominhe. Junni weyan tsachilacari duque mantá tan suwamin jominhe; junsi weyanlacari epe tsachi isa carimin jominhe tinue. 20 Junni miya Nabucodonosóriri duque fe joyoeque tenca cato, duque seiton inue. Jun tsanque seiton inan, Diosiri miyachi mantaca manjosolenue yape tsachilari yaca respetaitumin ilaisa. 21 Junni yari tsachilachile nechi chican larinan, animalila cuwenta ie. Jelen burolabe chuminhe wala cuwenta tape fito, junsi suwa atain ito. Junni jamochi chumin Diosi tsachi miyalaca fe mantá tan joe. Junni Diosiri moca miya josa munaratori, yaca miya suwamin joe. Aman junca tenhino fecári Nabucodonosor animalila cuwenta chuminue.
22 Junni aman miya Belsasar, nuri Nabucodonosórichi nieto joto, nuchi tata niyan jomin jonunca miraminue tinue. Juntonan nuri yaca miratonan, nunan jun tsanquenan fe joyoeque tenhinue. 23 Junsi nunan jamochi mantamin Diosichi contrainue nuchi mesabi Diosichi yabi nechi tanjaca jun copalaca, tásalaca tanjasa carito. Junsi nube mantaminla, nuchi tsa sonala, nuchi uyan sonala jeralela jun copalabi bino cuchilaquinue. Junsi oro moldeca se tilatinue calaca, bronseca, fieroca, chideca, junsi suca quica jun moldelaca. Quiratumin, merátumin, ticanantiya miiton diosilaca se tilatinue. Junto, miya, nuri tsa Diosicari se titunue. Yari nuca sonnasa carinan, nuri sonnae. Nu titiya quito, Diosi poden suwanan tsanquinae. Tsan josanan nuri yaca se titunue.
24 Jun tenchi tedeca in fiquica pila quisa carinue: 25 MENE, MENE, TEKEL, junsi UPARSIN. 26 Junni ya pilari itsanque pánae tinue: MENE, Diosiri miinue nu seque mantatununca; jun tenchi nu miya jono jeraino joeque paca joe tinue. 27 TEKEL, junsi nu mantanaca junca, balansabi mito quiranun cuwenta, nuri duque pele ica joe. 28 UPARSIN, miya, nu mantananun tori quitsaichunae. Junsi médolachi, pérsalachi cuwapochunae tinue.
29 Junni Daniel tsantinunsi, miya Belsasáriri Daniélica fe sen tsanpaca pocarin, cudanbinan oro cadenaca pocarin, quisa mantanue. Junsi jeralelabe panue junte nechi mantanunbi Daniélica duque mantá tan pesuwacayoeque. Labe lachi apabesiri Daniélica fe mantá talaranae tinue.