La, miya Nabucodonosóriri, jerale pueblobi chumin tsachilabe, junsi jera tobi chuminlabe, junsi jera fiqui paminlabenan, jerale tote chuminlabe saludainayoe tinue. Nulaca titiya quinasanan, se losa tenjae. Junsi seque chularasa tenjae tinue. 2 Lachiri nulaca mirasa tenjae jamochi chumin Diosi laca wepanantsancari queeque. 3 Diosiri duque wepanato quirantsancari quimin joe tinue. Junni yari numatotiya mantato polechunae. Numatotiya cuidaimin joto cuidaichunae tinue.

4 Junni la, Nabucodonosor, lachi mantato chunun wa yabi duque seque, son chumanyoe tinue. 5 Junni quepen lowabi catson tsosa, quipi quee. Yari laca duque wepanasa carie tinue. Junsi quirajasa carie. Yanan laca duque jele tenhisa carie. Lari jun quepen tenca canasanan, duque jele quee tinue. 6 Junni jerale Babilonia tobi chumin minlaca jasa payoe tinue yape yalari lachi quipica ti niyaque manpánanunca pano podeilaisa. 7 Junni Babilonia to ponelalari, junsi minlari, jera lachica jalaie. Junni lari yalabe quipica junca payoe. Junni yalari niyaque manpánanunca pano podeilaitue tinue. 8 Junni jun benete lari Daniélibe payoe. (Lari yaca Beltsasar tensaato mumun poca jomanyoe la se tinun diosica tenca cato.) Junni Daniéliri numasitiya diosilachi sen tencabe nenamin joe tinue. Junni lachi quipica junca yabe itsanque payoe tinue:

9 Beltsasar, nuri minlaca mantamin joe tiyoe. Lari mirayoe sen diosilachi tencari nuchibi ponunca. Junsi nuri tenfe cosalaca miino podeimin joe tiyoe. Meraniquede! tiyoe lari quipi quiraca jonunca. Junsi ya quipiri niyaque manpánanunca pade! tiyoe tinue. 10 Junni la lowabi tsosa, itsanque quirajae tinue: To quitsale duque uwan chide pele chumannue tinue. 11 Junni ya chide peleri duque uwaito, poloden ie. Fe puntabi japisu chuminlari yo quidobi tiliilainamannue tinue. Junsi nisi nuwiri nechitiya ya chide peleca ura quirano podeintsan jomannue tinue. 12 Junsi japisunan duque moso jomannue; jeralela fintsancari puca imin jomannue tinue. Junni jerale animalila jun chide pele tenpe wimin jolajomannue tinue pata isanhibi. Junsi chide alibiri pichula tasen quimin jolajomannue tinue. Junni ya chide pele jonan, tote jera chuminlari pansi chularamannue tinue.

13 Junni pansile nechiri cuidaimin anjeli manca patanaminca quirayoe. 14 Junni yari duque sonba pato, itsanque pae tinue:

Ya chide peleca tolede! Alica porede! Japisucanan balede! Pucalacanan baleto quepolaquede! tie tinue. Junsi ti animalica chide pele tenpe isanhito wiruraminlaca, chide alibi pichu chuminlacanan, jera suerelaquede! tie tinue. 15 Junsi butube telenlebecari puralaquede! tie tinue. Junsi fierobe bronsebeca quica cadenachi telelaquede! tie yape manjitusa. Junsi potrero tapebi puralaquede! tie tinue. Junsi junte puralaquina! tie yape junbi suwa patasa. Potrerobi animali cuwenta tape fito chusa tie tinue. 16 Junsi yari tsachi tenca canaminnan, animali cuwenta tennamin ichunae. Siete wata fecári tsanque quiyanpun jochunae tie tinue. 17 Junni cuidaimin anjelilari Diosi tsanque pacaca palaquee yape jerale tsachilari miralarasa jamochi chumin Diosi tsachilachi miyalaca mantano poden joeque. Junni mo tsachicatiya miya suwano munaratori, yaca miya suwamin joe. Junsi fécari epe tsachilaca miya suwamin joe tinue.

18 Junni miya Nabucodonosor jun cuenta quetobi, Daniélibe itsantinue:

—La miya Nabucodonosor in quipica quiraca joyoe tinue. Junni Beltsasar, nuri lachi quipi niyaque pánanunca pade! tinue. Lachi tobi minlari monantiya entendeino podeituminla joe tinue. Juntonan nuri seque manpano podeichunae; sen diosilachi tencari nuchibi pun joe tinue.

19 Junni Daniel, Beltsasar tinunni, case man óra fecári duque tenca cato chudinue. Daniélichi misubi ya quipica merasi, duque wepanantsan cosa janue. Junca jele tito tenca cato, cuenta quituchi tito chuminue. Tsan rasanan miya Nabucodonosor Daniélica pato, paniquede! tinue. Natiya tennatuto, lachi quipiri ti jonunca labe paniquede! tinue. Junni Daniel itsanque panue:

—Ay, miya tinue. In quipica junni nuca tsanhitusa tenjae. Nube pa jominlaca tsanhisa tenjae tinue. 20 ¿Junni nuri chide peleca quiraca joco? Junsi ya chide peleri duque ayanden joto, uwan chide pele jominue tinue. Junni ya chide pelecari duque nuwiri nechi quirano podeintsan jominue wa chide pele jonun tenchi. 21 Duque japisu chun, pucanan jeralelachi fino michi intsansi imin, jominue. Junni jun chide pele tenpenan animalilari isanle wirurabi wimin jominlanue; junsi pichulari chide alibiri tasen quimin jominlanue.

22 Miya, ya chide peleri nu joe tinue. Junni nuri duque mantano poden joe. Junsi nunan yoquidobi feintsancari mantano poden joe tinue. Junsi nunan jerale tote mantano poden joe tinue.

23 Miya, ¿nuri cuidaimin anjeli manca patanaminca quiranuco? tinue. ¿Jamochi nechi patanato itsanque panuco? tinue: Chide peleca toleto yucapiyarilaquede! tie tinue. Junsi butube telenlebecari tobi puchulaquede! tie tinue. Junsi fierobe bronsebeca cadena quica junchi telelaquede! tie tinue. Junsi potrero tapebi pepuralaquede! tie tinue. Junni siete wata fecári suwa ataito potrerobi animalila cuwenta tape fito chuchunae tie tinue.

24 Junni miya, jamochi chumin Diosiri nuca tsanque pato, casticaquechinayoe tica joe tinue. 25 Junni nuri tsachilachile nechi chican larinan, animalilabe pechuchunae tinue. Junsi nuri wala cuwenta tape fito, suwa ataichunae tinue. Junni nuri siete wata fecári tsanque chuchunae. Tsa Diosi tsachilachi miyalaca fe mantamin joeque tenhino fecári tsanque chuchunae tinue. Junni Diosiri moca munarato yaca miya suwamin joequenan tenhino joe.

26 ¿Juntonan quipinan itsanque paco? ¿Butube telenlebecari tobi purasa tinuco? tinue. Junni yari itsanque pánae: Nuri nuchi tobi manaman mantachunae tinue. Junni Diosica jera mantamin joeque tenhitosiri nuri manan manmantano podeichunae tinue. 27 Junnan miya, lari nuca payichinayoe tinue. La itsanque pánacaca seque meraná! tinue: Jutsa quituto, seque nenade! tinue. Nuchi jutsaca purato, poperelaca ayudaide! tinue. Pansile tsanquinari, Diosi tsanque casticaquituchunae tinue.

28 Junni Daniel paca, jun tsanquenan patinue. 29 Itsanque jominue: Quipi quiraca jun man wata polenasa, miyari Babilonia tobi yachi wa yabi 30 itsanque pade nenaminue: In Babilonia pueblori duque jelelen joe tinue. Quiralaquede! tinue. Lachi sonbachi quiyoe tinue lachi tobi capital, yape jeralela laca duque jelequira quimin joe tilatisa. 31 Junto miyari tsanque capánasanan, jamochi nechi fiqui panue: Miya Nabucodonosor, nuri inca meráde! Nu mantananunni amanari nuchi itoe tinue. 32 Nuri tsachilachile nechi chican larinan, animalilabe pechuchunae tinue. Siete wata fecári wala cuwenta tape fito chuchunae tinue jerale tote miyalaca Diosi mantamin joeque tenhino fecári. Junni Diosiri moca munarato yaca mantasa carimin joequenan tenhino joe tinue.

33 Daniel jun tsanque paca josa, jun tsanquenan patinue. Junni Nabucodonosórica tsachilachile nechi chicanle larilaquinue. Wala cuwenta tape fito, suwanan atainue. Junsi yachi a parinqui fu cuwenta uwainue; junsi yachi tewewenan pichu newewe cuwenta inue.

34 Junni Nabucodonosor loco jominnan manseitobi, itsanque pila chutesa carinue:

Siete wata inunbi, la, Nabucodonosor, jamochi quirato, loco jomin manseica jun tenjae tinue. Junsi aman jamochi chumin Diosica se tiyoe. Junto itsanque pato, numatotiya sonnato polemin Diosica se tiyoe tinue: Diosi numatotiya sonban jochunae; yachi mantári numatotiya jeraituchunae tiyoe tinue. 35 Jerale tsachilari yachi cale duque cumana jolajoyoe tiyoe. Junni yari niyaque munaratotiya tsanque quimin joe. Jamochinan, junsi totenan ti munaranuncatiya quiniquimin joe. Junni yari titiya quino munaraminca tsantude! timin tsachi monantiya itoe. Junsi monantiya itoe tiyoe ti quichun tsannaminca panhamin tsachi.

36 Junni lari jun óratenan manaman seque tenca cano podeiyoe tinue. Junni lari manaman mantano podeiyoe tinue. Laca jeralela manrespetaimin manhilainue tinue. Junni manaman duque sonban miya iyoe tinue. Junni payiminlari lachica jalainue; junsi lari lachi tobi manaman mantamin iyoe tinue. Junni lari matu mantananunca fe sonban mantá tan iyoe tinue. 37 Junsi amanale nechi la Nabucodonosor jamochi mantamin Miya Diosica duque se tito, yaca respetainayoe tinue. Junto yaca duque seque quimin joe tinayoe tinue. Junto ya duque sencasiri quimin joe tinayoe tinue. Junsi yanan fe joyoeque tenca caminlaca pele suwamin joe tinayoe tinue.