Oro moldechi cale telenhisa tinunca
3
Junni miya Nabucodonosóriri óroca tsachi molde manca quisa mantanue peman chunca metro uwan, peman metro ayancan. Junsi Dura tinun layu ton postote chutesa carinue Babilonia tobi. 2 Junni miyari Babilonia to probinsia tala cobernadorilaca jera jalaisa tisa erenue. Junsi mantá tan soldadolacanan, yachi tobi mantá tanlacanan, payiminlaca, cala layaminlaca, juelaca, jefe politico tsanlaca, jun tobi jera mantá tanlacanan jalaisa tisa erenue. Junni miyari jeralelaca jalaisa tisa tinue ya molde quica tenchi fiesta quino joyoe tito. 3 Junni jerale mantá tanlari layailainue moldeca se tito fiesta quichun. Junni moldechi cale wiruraminlanue. 4 Junni fiestabi anunsio fiqui polariminni sonba pato itsantinue:—Jeralela meralaquede! tinue. Ti tsachila jototiya, nunchi nechi jaca jototiya, ti fiqui paminla jototiya, meralaquede! tinue. 5 Moorari musica meralaquichunae tinue. Tutu, folota, banbutu, arpa, salterio, sanponiya, meralaquichunae. Junsi uyan músicalacanan mera jochunae tinue. Junni nulari jun musicalaca meránan tenchi, miya Nabucodonosor óroca molde quisa carica junchi cale telenhito se tilatina! tinue. 6 Junni mo ya moldeca se tito telenhituminlacari we canan tenchi nin lunanunbi quepono jochunae tinue.
7 Junni jun musica meránan tenchi jeralela jun oro moldechi cale yaca se tito telenhilainue. 8 Junni israelítalaca pa jun caldéolari junte pejominlanue. Junni yalari miya Nabucodonosórichi cale israelítalaca seiton curalaquinue moldechi cale telenhituminla joeque. 9 Miyabe itsanlatinue:
—Nu duque sen jonan, nuca duque numari fecári sonnasa tenjalaquee. 10 Nu mantaca joe jeralela musica merasí ya oro moldechi cale telenhito se tilatisa. 11 Mo yaca telenhituminlacari duque chiban ninbi quepono jochunaeque mantaca joe latinue. 12 Junni Miya, pemanca israelítalari inte peralarae latinue Sadrac, Mesac, junsi Abednego. Nuri yalaca Babilonia tobi mantá tan suwaca joe latinue. Junni yalari nuca merátuto, nuchi diosilachi cale telenhituminla joe latinue. Junsi nu óroca molde quisa caricachi calenan telenhilaitunue latinue.
13 Junni miya Nabucodonosóriri junca meráto duque pa tenhinue. Junni Sadraca, Mesaca, junsi Abednégoca yachica tanjadeque mantanue. Junni yalaca we tanjalainunsi, 14 yalabe itsanque panhanue:
—Sadrac, Mesac, Abednego, ¿nulari lachi diosilachi cale tsanan telenhituminla joyun? tinue. ¿Junsi la óroca molde quisa caricachi calenan telenhilaitiyun? tinue. 15 ¿Junni nulari telenhilaichinayun? tinue. Musica meránan tenchi la molde quisa caricachi cale telenhito se tilatina! tinue. Junni nulari moldechi cale telenhitulajonari, amananan nin lunanunbi queposa cariyanae tinue. Jun tsannari, ti diosinantiya se larino podeituchunae tinue.
16 Junni pemanca israelítalari itsanque beco manpalaquinue:
—Junni in cosaca tenpano itolajoyoe latinue. 17 Chiquilari tsa Diosicasiri se timinlayoe latinue. Junni yari ninbi pominlaca, junsi nu miyari ti quino munaranuncatiya se larino podeichunae latinue. Junsi ninbi nechinan manse larichunae latinue. 18 Junni Diosi chiquilaca se larino itosatiya, nuca tsarasica mirasa tenjalaquee. Nuchi diosi tinunlachi cale, junsi oro moldechi cale, natiya telenhilaituanae latinue.
Ninbi nechi se larica jonunca
19 Junni Nabucodonosóriri junca merasi, yala pemanca israelítalaca pachi duque pa caforo inue. Junsi yachi peyunlaca duque fe chiban nin quisa mantanue. 20 Junsi fe sonban soldadolaca wenteto erenue yape Sadraca, Mesaca, junsi Abednégoca cato, cabo silichi teleto, ninbi quepolaquisa. 21 Junni yalaca tsanpaca punlacanan, sapato, sonperero, titiya punlacanan teleto, chiban ninbi quepolaquinue. 22 Junni miyari wewe ninbi queposa mantaca jominue; junni ninni duque lunato duque nuwiri sulonaminue soldadolachi fecári. Junni soldadolari ninbi cayaito puyanilainue. 23 Junni pemanca israelítalari tela junla ninbi quepoilainue.
24 Junnunsi miya Nabucodonosóriri we wiruinue. Wepanato quirato, yabe pemantaminlabe itsanque panue:
—¿Pemanca tsachilaca tela junlaca ninbi walalaquitun? tinue.
—Junni niyaitoto lari junpaluca tsachilaca quiranayoe tinue. Junsi tela itonla joe tinue. Junni yalari nin quitsabi nenalarae. Niyanantiya ica itonla joe tinue. Junni yala pemancalari ninbi quepoca junla joe tinue. Junni ya mancari diosilachi naonan quiran joe tinue.
26 Junni tsantisiri, Nabucodonosóriri nin quelo féto itsanque otinue:
—Sadrac, Mesac, Abednego, jamochi chumin Diosibe mantaiminla, ninbi nechi manlalaide! tinue.
Junni ninbi nechi pemancari manlanilainue. 27 Junni mantaminlari ya pemanca tsachilaca quelo falainue quirachun. Junni yalaca niyanantiya ica itonca quiralaquinue. Yalachi a man silinantiya niyaca itominue. Tsanpanantiya niyaca itominue. Junsi niyan pubantiya itominlanue.
28 Junni jun pemanca tsachilaca quirasi, miya Nabucodonosóriri duque sonba otito, itsanque panue:
—Sadrac, Mesac, Abednégochi Diosicasiri se tilatisa! tinue. Yari yachi anjelica erenue tinue yape inlaca se larisa. Junsi yalari Diosica seque meráminla joe tinue. Junsi yalari la miya joto mantaca junca meralaquitue tinue. Junsi diosi tinun moldechi cale telenhin, nin se tin, tituchique puyano tenca caya jominlanue. 29 Jun tenchi molatiya in tsachilachi Diosica seitonque paminlaca toteto, pitito jera quepontsan jochunae. Junsi yalachi yacanan araleto quepontsan jochunae tinue. Ti bolonbi nechi, uyan tobi nechi, ti fiqui paminlacatiya, in tsachilachi Diosica seitonque paminlaca tsanque casticaquino jochunae tinue. Junni uyan diosi tinunlari yalachi Diosi cuwenta tsachilaca se larimin itoe tinue.
30 Junni miyari ya pemanca israelítalaca Babilonia probinsiabi fe mantá tan suwanue yape yabe pemantalaquisa.