—La quipi quirato, junca entendeichique wepananayoe tinue.

4 Junni minlari miyabe arameo fiquichi saludaito, numatotiya sonnato polena! latinue. Junsi itsanlatinue:

—Niyaque quipica jonunca paniquede! tilatinue. Junni chiquilari nube mantaiminla joto, ya quipica niyaque jonunca manpalaqueyanae tilatinue.

5 Junni miya manpato, itsantinue:

—Quipica jera pansica joyoe tinue. Junni nulari palaquede! tinue lachi niyaque quipica jonunca. Junsi niyaque jonunca micarilaquichunae tinue. Junni nulari jera pano podeilaitunari, lari soldadolaca ereyanae tinue yape nulachi yaca jera buleto cuwasa. Junsi nulacanan jera pitito queposa ereyanae. 6 Junni nulari lachi niyaque quipica junca jera pan, junsi niyaque jonuncanan pan, quilaquinari, lari nulachi ticatiya duque epe cuwanae tinue; junsi mantá tan suwanae tinue. Junni nulari la quipi quiraca jonunca palaquede! tinue.

7 Junni ponelalari miyabe itsanque manpalaquinue:

—Junni ti quipica jonunca paniquede! latinue. Junni chiquilari niyaque jonunca manpalaqueyanae latinue.

8 Junni miyari manpato itsantinue:

—Lari nula niyaque tenca calaquinanunca jera tenhica joyoe tinue. Lachi quipica junca jera pansica joyoe. Junni nulari junca tenhito epele palaquinae tinue. 9 Junni lachi quipica junca nulari manpalaquitunari, lari nula jeralelaca jun tsanquenan casticaqueyanae tinue. Lari itsanque manpánayoe tinue: Nulari lachi quipica junca, junsi niyaque jonunca, nene pachun cuenta jera quilaquinae tinue. Junni nulari nene palaquichunae lari ya quipica mantenhisa mérato. Junni wanhilaitude! La quipi quiracaca panilaquede! tinue. Nula jera pano podeilainari, lari miranae niyaque jonunca micarino podeinola jonuncanan.

10 Junni pone minlari miyabe itsanque palaquinue:

—Nuchi quipica pano podeiminni in toteri itoe latinue. Niyan miyalanantiya ponelalabe tsanque panhatuca jominla jonhoe latinue. 11 Junni nu panhanacari duque tenfe joe latinue. Ya quipica paminni in tote itochunae latinue. Diosilasiri podeilaichunae latinue. Juntonan yalari tsachilabe pechutuminla jochunae latinue.

12 Junni miyari ya fiquica merasí, duque paito yachi soldadolaca erenue yape Babilonia tobi min tsachilaca, ponelalaca, jera totelaquisa. 13 Junni jerale minlaca totesa mantá cuwanan, Daniélicanan, junsi yachi amicolacanan neyalaquinue yalacanan petotechun.

14 Junni Arioc miyaca cuidaimin soldadolaca mantamin jominue. Junni Ariori minlaca jera totelaquechinato, Daniélichibi fenue. Junni Daniéliri mirato pato, 15 itsantinue:

—¿Miyari niyaito jerale minlaca tsancari wewe totesa mantaquin? tinue.

Junni Ariori ti tenchi totesa mantá cuwaca jonunca jera panue Daniélibe. 16 Junni Daniéliri miyachica jinue rocaibi nasi camérasa, ya quipica entendeino podeichun. 17 Junni tsanque pasi, Daniéliri yaca manjinue yachi amicolabe pabi. Ananíabe, Misaélibe, junsi Azaríabenan panue. 18 Junni jamochi chumin Diosibe rocainaminlanue ya quipica entendeino podeilaichun. Tsanque rocailainue yape Babilóniabi chumin minlaca totelaquinatotiya, yalacari petotelaquitusa. 19 Junni Diosiri miyachi quipicaca quepentenan Daniélibe panue quirajasa carito. Junni Daniéliri ya quipica miitobi, jamochi chumin Diosica duque se tinue.

24 Junni jun tsanhinunbi, Daniéliri Arióchica jinue. Miyari Arioca mantaca jominue yape jerale Babilonia tobi minlaca jera totesa. Junnasa mantimini Daniéliri yabe itsantinue:

—Minlaca totelaquitude! tinue. Laca miyachica tanjide! Lari yachi quipicaca jera pánae tinue.

25 Junni Ariori Daniélica miya Nabucodonosórichica we tanjinue. Junto Ariori miyabe itsantinue:

—Quipicaca seque pano podeimin tsachica feyoe tinue. Yari israelita joe; yachi tobi nechi tanjaca jun joe tinue.

26 Junni miyari Daniélibe itsantinue: (Aman Daniel Beltsasar tinun jominue.)

—¿Nuri lachi quipica junca manpano podeino joyun? tinue. ¿Junsi lachi quipi ti jonuncanan manpano podeino joyun? tinue.

27 Junni Daniéliri miyabe itsantinue:

—Ya quipica pano podeimin tsachiri itoe tinue. Ti duque min jototiya, ti ponelalanantiya pano podeilaituchunae tinue. Junni nuri duque tenfe cosaca miino munarae tinue. 28 Junni tsa Diosi jamochi chue tinue. Yari duque tenfe cosalaca miisa carino poden joe tinue. Junni wanbile niyanhino jonuncanan mirasa, Diosinan ya quipica quirawoca joe tinue. Junni nuchi lowabi catson tsosa, quipicaca, junsi quirajacacanan, lachi nube jera pano muquee tinue.

29 Junni nuri nuchi lowabi tsominnan, wanbileri niyanhino jonunca tenca cato tsominue tinue. Junni Diosiri miratununca miisa carimin joto, nuca quipibi miisa carinue tinue. 30 Junni Diosiri labe jera pae tinue ya quipiri ti manpatino jonunca. Junni Diosiri la uyan tsachilaca fe min jonun tenchi patue tinue. Juntonan Diosiri miisa carie tinue yape la nube manpano podeisa ti pano jonuncatiya. Junni lari nuchi quipibi ti manpánanunca pano munarayoe tinue yape nuri nuchi tencabi tenca cananunca entendeino podeisa.

31 Junni miya, ¿nuchi quipibiri duque jelelen moldeca quipica joco? tinue. ¿Nuchi cale ya molde wiruraminca quiranuco? ¿Junni yari tsen, moso jominuco? tinue. ¿Duque jele tintsan jominuco? tinue. 32 ¿Junni ya moldechi misu mantimini orosiri jominuco? ¿Junni tencate, junsi tedelateri calaca quica jominuco? tinue. ¿Junsi pecolobe, boteberi bronseca quica jominuco? tinue. 33 ¿Junni nede iyucateri fieroca quica jominuco? tinue. ¿Junsi nederi tobe fierobeca quica jominuco? tinue. 34 ¿Junni nuri ya moldeca quiranaminuco? tinue. ¿Junnasa quiranari, suca manca darapatanuco? tinue. Ya sucari tenca mánta bale jato darapatanue poreereca cuwenta. ¿Junni nedebi icaisi, ya moldeca jera bule erenuco? tinue. 35 ¿Junni moorari ya fierori, tori, bronseri, calari, junsi oronan jera piti talulu inuco? tinue. Jana pata mabe trico tunlequinasa petseri jera jajimanhe; ¿jun cuwenta inuco? tinue. ¿Junni wa wu jasi, ya moldechi lucuca jera tanjinuco? tinue. ¿Junni ya moldeca icamin suri uwainni, uwainni inuco? tinue. ¿Wa du ito, jerale tote quidiinuco? tinue. 36 ¿Junni nuchiri tsanque quipinuco? tinue. Junni Daniel miyabe cacuenta quinato, itsantinue:

—Junni aman miya, nube lari manpachinayoe tinue nuchi quipiri ti niyaque pánanunca. 37 Junni miya, nuri fe sonban miya joe tinue. Junni jamochi chumin Diosi nuca mantá tan suwanue tinue. Junni nuri duque sonban jonan, nuca duque respetailainae tinue. 38 Junni Diosi nuca mantá tan suwanue tinue tsachilaca, animalilacanan, junsi pichulacanan, junsi tile chuminlacatiya jera mantasa. Junni Diosiri nuchi jeralelachica fe sonban mantá cuwanue tinue. Junni miya, nuri moldechi oro misu cuwenta joe tinue.

39 Junni nu puyanunbi, uyan manca mantamin jochunae tinue. Junni yari nu cuwenta seque mantamin itochunae tinue. Junni ya mantaminni jun moldechi panchile calaca quica jun cuwenta jochunae tinue. Junni jun benete manca mantaminman jerale tote mantachunae tinue. Junni ya mantaminni moldechi pecolole bronseca quica jun cuwenta jochunae tinue. 40 Junni yachi benele manca mantaminman jochunae tinue. Yari duque sonban jochunae tinue. Yari fiero cuwenta sonban jochunae. Junni fierodechi jera piti suwanun cuwenta, yanan uyan mantaminlachi tólaca jera yucapiyarichunae tinue.

41 Miya, ¿nuri quiranuco? moldechi nedebi man posto fiero jominueque, junsi man posto to jominueque. ¿To nida quinun to jera asuwaca tsan jominuco? Junni yari itsanque pánae tinue: jun mate miyalari chican chican mantalaquichunae tinue man postote manca miya, man postote manca miya. Junni jun tobi miyalari weyanteri fiero cuwenta sonban jolajochunae tinue; junsi weyanteri to cuwenta cumana jolajochunae tinue. 42 Junni nemisubiri tobe fierobeca palaca junca quica jominue tinue. Junni ya tobi miyalanan duque sonban jotonan, cumananan jolajochunae tinue. 43 ¿Junni nuri tobe fierobe palaca junca quiraco? tinue; junni jun tólabi mantaminlari man bolonni ito man junni ichique tenfelaichunae tinue fécari sonba mantá tachun. Juntonan tobe fierobe palaitonan natiya sonba itumin joe tinue. Junni ya mantaminlari man junni ichique tenfetonan, tsa sonban jono podeilaituchunae tinue.

44 Junni ya mantaminlari mantalaquinasa, jamochi chumin Diosiri casan miya manca suwachunae tinue. Junni ya miyacari uyan bolon tsachila fe lono podeilaituchunae tinue. Junni ya miyari Diosi suwaca jun miya joto, uyan miyalaca mantá iton jera mansuwachunae tinue. Junsi ya miyari numatotiya mantato polechunae tinue. 45 Junni nu quiraca jun sucari tsanque micuwamin jominue. ¿Ya sucari monantiya tulipoca itosanan dubi nechi bale januco? tinue. ¿Junsi fieroca, bronseca, tocanan, calacanan, órocanan jera luculenuco? tinue. Junni yari jera manmicuwamin joe ya casan miyari uyan miyalaca jera yucapiyarichunaeque. Junni, Miya, jamochi chumin Diosi nube tsanque quipibi panue tinue nanni ina itsanque patino joeque. Junni nuchi quipiri tsa joe tinue. Junsi la manpacanan tsa joe tinue.

46 Junni miya Nabucodonosor Daniélichi cale telenhinue misu tobi tiliino fecári. Junto Daniélichi ticatiya epe cuwato, insienso lucuca nin posa carinue. 47 Junsi Daniélibe itsantinue:

—Junni nula se tinun Diosiri jerale uyan diosilaca fe sonban joe tinue. Junni yari miyalachi Miya joe tinue. Yasiri miitonunca pamin joe tinue. Junnan Daniel, lachi quipica nuri miino podeinue tinue.

48 Junsi miyari Daniélica duque mantá tan suwato, ticatiya duque senlaca epe jera cuwanue. Junsi Babilonia tobi cobernadori suwato, jun tobinan minlaca mantamin suwanue.

49 Junni Daniéliri miyabe Sadraca, Mesaca, junsi Abednégocanan panhanue. Junnan miyari yala pemancaca Babilonia tobi duque mantá tan pesuwanue. Junsi Daniéliri miyabe purainue yabe pemantachun.