Daniel 1

Daniel chuteca jun pila

Daniélila Babilonia tobi mantá tan ilainunca

Junni miya Joacim Judá tobi peman wata mantanasa, Babilonia tobi nechi soldadola jato quera quilaquinue. Junni Nabucodonosor Babilonia tobi miya jominue; junni yachi soldadolari Jerusalén puebloca jera awintaito méraminlanue yape Jerusalénlari ano mochi padeseito peleilaisa. 2 Junni fe losi, miya Nabucodonosórichi soldadola Joacinca cato Babilóniaca tanjilainue. Miya Diosi patsa Nabucodonosórica tsansa carinue. Junni Diosichi yabi tanun tsanlaca weyanca tarinto tanjilainue. Ya cosalaca Babilonia toca jera tanjito, yachi epe diosi tinunlachi yabi senun tamochi chutelaquinue. 3 Junni weyan nalan nalan israelítalaca Babilonia toca tanjilainue yape miya Nabucodonosórichi tenchi trabajaquilaquisa.

Junni Nabucodonosórichi mayordomo Aspenaz tinun tsachi jominue. Yari eunuco tinun tsachi jominue. Aspenari duque fe sen nalan nalanlaca neyabi jinue yape miyabe mantaiminla josa. Junni yari miya Joacinchi familialaca pewentenue; junsi weyan mantá tan israelítalachi familialacanan pewentenue. 4 Junni duque min nalan nalanlaca, quiyanpun itonlaca, seque mantaiminlaca, junsi duque tenca oco tsachilaca wentenue. Tsanque sen nalan nalanlaca wentenue yape miyachi yabi mantaiminla josa Babilonia tobi. Junni jun wenteca junlaca Babilónialari yalachi fiqui pano micarino jominlanue. Junni jun fiqui jera micaritobi, caldéolachi librocanan pemicarino jominlanue. (Aman Babilónialacanan caldeo tinun jolajoe.)

5 Junni miya Nabucodonosóriri mantanue yape ya finun anocanan, ya cuchinun binocanan jun nalan nalanlachi pecuwalaquisa. Junsi peman wata fecári micarilaquisa tinue. Junni jera miitobi, miyabe petrabajaquilaquichunae tinue. 6 Junni Daniel, Ananías, Misael, junsi Azaríanan, ya nalan nalanlabe pejominlanue. Junni yalari israelita jominlanue Judachi alicala. 7 Junni miyachi mayordomori mumun jera canbiyaquinue. Itsanque canbiyaquinue: Daniélica Beltsasar tinue, Ananíaca Sadrac tinue, Misaélica Mesac tinue, junsi Azaríacanan Abednego tinue.

8 Junni miya finun anori israelítala fitunun ano jominue. Diosi mantaca jominue tsanca fitusa. Jun tenchi Daniéliri miya ano finunca fituchun, yachi binocanan cuchituchun, tenca canue jutsa quituchun. Junni Daniéliri miyachi mayordomobe itsanque panue: Miyachi ano finunca pefito jutsa quino munaratiyoe tinue. 9 Junni Diosiri ya mayordomoca Daniélica laquirasa carinue. Junnan Daniélica ayudaino tenca canue. 10 Junni ya mayordomori itsantinue:

—Lachiri miyaca duque jelequee tinue. Miyari nulachi sen anoca, junsi sen cuchinuncanan, pecuwasa mantaquee tinue. Junni pansile miyari nulaca quirato, uyan nalan nalanlaca fécari chide oco jolajonari, miyari laca casticaquito totesa mantachunae tinue.

11 Junni mayordomori manca peyunca mantaca jominue yape Daniélichi, Ananíachi, Misaélichi, Azaríachi ano poto cuwasa. Ya peyunni Melsar tinun jominue. Junni Daniéliri Melsáribe itsantinue:

12 —Chiquilaca miichun quirasa tenjae tinue yape niyan jolajonunca tenhito quirasa. Ano daminlabe pade! tinue chunca ma fecári ni tsanlacari dato chiquilachi cuwasa. Junsi picari cutsawosa tide! tinue. 13 Junni chunca ma polenunbi, chiquilaca quiran, junsi miya ano finunca fito chumin nalan nalanlaca quiran, quina! tinue mola fe senan cajolajosa. 14 Junni Melsar Daniel pacaca meráto, tsan joe tinue. Junni chunca ma fecári ni tsanlacasiri cuwato quiranue. 15 Junni chunca ma poletobi, Daniéliri yachi amicolaberi miyachi anoca fimin nalan nalanlaca fe quiyanpoica iton, junsi uyanlaca fe sonbanlanan, jominlanue. 16 Junni Melsar Daniélila fino jun anoca, binoca, larito, yalachi ni tsanlacari cuwanue.

17 Junni Diosiri ya junpaluca nalan nalanlaca duque tenca oco, junsi entendeimin, josa carinue. Junni yalari jera mirano jonunca miraminlanue. Daniéliri uyanlachi quipica, junsi quirajacacanan jera miimin jominue.

18 Junni miyari ya nalan nalanlaca peman wata fecári micarisa tica jominue. Aman junni peman wata inunsi, mayordomori yalaca miya Nabucodonosórichica tanjinue. 19 Junni miyari jerale nalan nalanlabe cuenta quinari, Daniel, Ananías, Misael, junsi Azarías fe sen jominlanue. Jun tenchi miyabe mantaito trabajaquiminla ilainue. 20 Junni miyari ti cosacatiya miino munaratori, junsi ticatiya panhano munaratori, yalabe panhaniquimin jominue. Junni miyari tenhinue yalari uyan minlaca, junsi ponelalaca, chunca ne tsansi fe min jolajoeque. 21 Junni Daniéliri jun to miyalachi tenchi duque numari trabajaquinue. Ciro miya ino matenan catrabajaquito chuminue.