12
Ya tsachi tsan labe itsantie: Debi malate anjeli manca jachunae Miguel mumun. Junni ya anjeliri nuchi tsachilabe isaito ayudaichunae israelita bolonlabe. Junni tsanhino mate duque jele tintsan ma jochunae. Junni tsachila jono male nechi, in tsansi seiton ma natiya caitominue tie. Junsi jera israelítalari librobi mumun chunlasiri se lolaichunae tie. 2 Junni jun mate duque puyaca junlari mansonhilaichunae tie. Junni weyanlari numatotiya Diosibe chuto polelaichunae. Weyanla mantimini numatotiya lu, fuda, padesein, ito polelaichunae tie. 3 Mannan duque min tsachilari numatotiya respetainunla jochunae tie. Junsi ya minlari tsachilaca Diosibe seque penenasa cariminla jochunae. Junto yalari yoquidobi tsabo cuwenta numatotiya tseminla joto polelaichunae.4 Junni Daniel, nuri in fiquica mobenantiya patuna! tie. Junsi in pilaca lasitunun suwana! tie to jeraino ma queloino fecári. Junni to jeraino inasa, tsachilari piyanlete sunenalarachunae. Junsi tsachila ticatiya duque fe miilaichunae tie. Ya tsachi tsan labe tsantie.
5 Junni lachi caquirajanasa, la Daniel man paluca tsachilaca quirayoe pi man beco, man beco wiruraminlaca. 6 Junsi yala manca, labe cuenta quinamin tsachi tsanbe ticato panhae. Yari lino tsanpaca pun tsachi joe; junsi pi jamo wirurae. Junni yala mancari itsanque panhae: ¿Nisi fecári jaatsanque wepanantsan ma jochunan? tie. 7 Junni ya lino tsanpaca pun tsachi tsanni jamochi tedeca jalitato, son Diosica pato juraquee. Juraquesi, itsanque pae: Wata, palu wata, quitsa watate Diosichi israelita tsachilaca fe lono deichunae tie. Junni la paca fiquiri jun tienpotenan jera tsa patichunae tie.
8 La Daniel ya tsachi pánaminca merátonan, ticanantiya entendeitiyoe. Jun tenchi itsanque panhayoe: Miya, ¿inni niyaque patichunan? tiyoe. 9 Junni yari labe itsantie: Daniel, nuri tennatuto chunirana! tie. Jeraino ma fecári monantiya la pacaca entendeino podeilaituchunae tie. 10 Duque tsachilari casicaito jera sen tenca ilaichunae tie. Junsi seitonlari fe seiton ilaichunae tie in cosalacari natiya tenhituto. Mannan min tsachilari jera entendeilaichunae. 11 Junni Diosichi yabi ma cura ticatiya Diosichi epe cuwanaminnan deinunsi, duque seiton suwamin wichunae tie. Aman junte nechi mili palu patsa nue chunca ma polechunae tie. 12 Junni Diosica tennato méraminlari, mili peman patsa peman chunca mante ma fecári seque méraminlari, duque son jolajochunae tie.
13 Junni Daniel, nuri puyano fecári seque chunirachunae. Junto to jeraino mate mansonhichunae tie Diosi sen cuwano junca cachun.