Miya Diosi Israelítalaca seque chularasa cariyanae tinunca
31
15 Junni man nete Miya Diosi israelítalachi itsanque fiqui paca jominue: Ramá tinun pueblobi warelaquinaminca meralaquichunae. Atito warelaquichunae. Junbi chumin sonala yalachi naola tenchi warelaquichunae. Naola itolajonan, pansi manhituanae latichunae tinae. 16 Juntonan Miya Diosiri itsantinae: Israelita sonala, wari nantari warelaquituna! tinae. Amana laqui jototiya, manaman son jolajochunae. Jun tenchi wareno itolajoe. Nulachi naola pa jominlachi tobi nechi manjalaichunae tinae. Miya Diosi tsantinae. 17 Son tito meralarade! Israelítala yalachi toca manjanola joe tinae. Miya Diosi tsantinae.27 Junsi Miya Diosi israelítalabe itsantinae: Manaman duque tsachila israelítalachi tobi manchularachunae. Junsi duque animalila talarachunae wala, opisa titiya. La israelítalachi tobi duque tsachilanan sonnalarasa cariyanae Israel tinun tobi, junsi Judá tinun tobinan. 28 Nulaca duque casticaquito yucapiyarichun seiton quica joto, jun mate duque sen quino joyoe tinae. Miya Diosi tsantinae.
29 Tsachila itsantiminla joe: Apala seiton quilaquinan, nalalari padeseiminla joe. Juntonan jun materi tsanlatituchunae tinae. 30 Jun materi seiton quiminlari padeseilaichunae. Tsachi manca casticaquica jun puyatori, yachi jutsa tenchiri tsanhichunae tinae.
31 Junsi Miya Diosi israelítalabe itsantinae: Man tienpote la israelítalabe casan trato queyanae tinae. Israel tobi chumin israelítalabe trato quino joyoe; junsi Judabi chuminlabenan tsanquenan trato quino joyoe. 32 La nulachi tatalabe trato quica jomanyoe Egipto tobi nechi manlarino mate. Yalari ya tratoca obedeseilaitue. La Miya Diosi yalachi unila cuwenta laquirato cuidaimin josanan, yalari lachi tratoca obedeseilaitue. Juntonan israelítalabe casan trato quica junni, ya unica trato cuwenta itochunae tinae.
33 Ya casan tratori itsanque jochunae: La lachi mantaca yalachi tencabi pun josa cariyanae; junsi lachi mantaca yalachi misubi mirasa cariyanae. La Miya Diosi yalachi Diosi joanae; yalari lachi tsachila jolajochunae tinae. 34 Tsachilari amicolaca, junsi familialaca, laca mirasa carino munaratulajochunae. Jeralelanan laca numa miralarachunae. Fe sonba mantaminla, junsi fécari epe tsachilanan laca miralarachunae tinae. Jun mate jeralela laca miralarachunae. Jun materi nula seiton quica junca perdonaiyanae; junsi wari nulachi jutsaca mantenhituanae tinae. Miya Diosi tsanque cuenta quee yape la Jeremías israelítalabe manpolarisa.