Jeremías Babilonia tobi chumin israelítalachi pila quito erenunca
29
1-2 Junni Jeconías Judá tobi miya josa, Babilonia tobi nechi miya Nabucodonosor soldadolaca erenue israelítalaca cato Babilóniaca tanjichun. Soldadolari miya Jeconíaca, yachi yabi trabajaquiminlaca, yachi ayanca, Judá tobi junsi Jerusalén pueblobi mantaminlacanan tanjilainue. Junsi mecanicolaca, albanililaca, chideca ya quiminlaca, junsi uyan titiya jun tsan quiminlaca jera tanjilainue; junsi patelelaca, Diosichi mantate paminlaca, junte nechi duque tsachilaca tanjilainue. Junni ya tsachilaca Babilóniaca tanjica josa, la Jeremías Jerusalenbi nechi ya israelítalachi pila quito ereyoe. La pila quino mate weyan israelita mantaminla numa puyacala josanan, weyanlari Babilonia tobi casonnaminlanue. Junni jun pilabi itsantiyoe:10 Babilóniaca tanjica jun israelítalabe Miya Diosi itsantinae: Nula Babilóniabi siete chunca wata chularanunbi, la Diosi nulachi tenchi sen queyanae tinae. Matuleri paca jomanyoe nulachi toca manjasa cariyanaeque. Junte siete chunca wata chularasa, manjalaisa cariyanae tinae. 11 Junsi La mirayoe tinae nulachi tenchi sen quino joyoeque. Seiton quituto, seque queyanae. Nulari seque, pansi chuno munarato meralarae. Junni la Miya Diosi nulaca tsanque chularasa cariyanae tinae. La Miya Diosi tsantinayoe tinae. 12 Junnan nulari laca otito, labe rocailainan, lari meránae. 13 Lachi fe quelo ichique tenfelainanan, lanan nulachi quelo iyanae. Jera tencachi lachi quelo ichique tenfelaichunae. Jun tenchi la nulabe pejoanae tinae. 14 Nulaca lachi quelo josa cariyanae tinae. Amana titiya seitonquesiri joe; jun tienpote ticatiya sequesiri josa cariyanae. La Miya Diosi casticaquito, nulachi tote nechi sularito erecayoe yape uyanlachi tobi chularasa. Juntonan uyan tobi nechi manaman inte manlayaisa cariyanae. La inte nechi losa carica jotonan, inte manjasa cariyanae tinae.
Miya Diosi tsanque cuenta quee yape la Jeremías israelítalachi pila quito eresa.