4 Junni la Jeremías Miya Diosi itsanque pacaca israelítalabe jera manpolariyoe:

Nula israelítala merátuminla joe tinae; junsi la Diosi paca junca merátuminla joe. 5 Lachi mantate pamin tsachila nulachi jutsaca purasa tilatinasa, nulari yalaca merátuminla joe. Duque ne nulachica pasa erecayoe; juntonan nulari merátuminla joe. 6 Junni tsanque nenato merátulajonari, nulaca casticaqueyanae. Mantenhilaide! Lari Silo pueblobi lachi ya quisa carica jotonan, jun yaca jera yucapiyarisa cariyoe israelítalaca casticaquito. Junni nulanan merátulajonari, in Diosichi yaca jun tsanquenan yucapiyarisa cariyanae. In puebloca duque casticaquinan, uyan tobi nechi tsachila in puebloca pato itsanlatichunae: Diosi paito tsanquimin joe latichunae tinae. Miya Diosi tsantinae.

7 Junni la Jeremías Diosichi fiquica polarinan, jeralela meralaquee. Patelela, Diosichi mantate pamin joyoe timinla, junsi jerale tsachila meralaquee. 8 Junni jera merátobi, duque paito, laca cato, labe itsanlatie:

—Nuca totelaquechinayoe latie. 9 ¿Niyaito nuca Miya Diosi seiton cosa pasa eree tinayun? latie. Nu pato, Miya Diosi patsa in Diosichi yaca seiton quisa carito yucapiyarino joe tinae latie Sílobi yachi yaca quicae, jun cuwenta. In puebloca yucapiyarichunae tinae monantiya sonnatunun fecári. ¿Ti quichun tsantinayun? tilatie.

Junni jeralela paito, la Jeremíachi quelo falaie Diosichi ya selate.

10 Junni jun Judá tobi mantaminlari meralaquinue tsachilari laca pailainaeque. Junto miyachi yate nechi Diosichi ya fecári jito, “Casan Tamolan” tinun quelole chudilaie. 11 Junni patelela, junsi Diosichi mantate pamin joyoe timinlari laca pa joto tsachilabe palaquee. Mantaminlabe, junsi jera tsachilabe itsantilatie:

—In tsachica toteto casticaquino joe latie in puebloca seitonque panun tenchi. Nulari nulachi punquichinan meracala joe latie.

12 Junni tsanlatinunsi, la Jeremíari mantaminlabe, junsi tsachilabe itsantiyoe:

—Lari lachi tenchi pátiyoe; Miya Diosi patsanan Diosichi yaca, junsi in puebloca, tsanque pasa ereca joe. 13 Seque nenato, sen cosa quilaquede! Nulachi Miya Diosica meralaquede! Jun tsanlainari, tsanque casticaquituchunae. 14 Amana lari nula mantanaca jun joyoe; junni laca niyan quintsan jonunca tenca catotiya, quinilaquede! tiyoe. 15 Juntonan man cosa mirano jolajoe: Laca totetori, culpa iton tsachica toteca jolajochunae. Jun totelaquitori, in pueblobi chuminla jeralela culpa ilaichunae. Tsa pato, lachi tenchi pátiyoe; Miya Diosi patsanan tsanque jera tuca pasa erecae tiyoe.

16 Junni la Jeremías tsanque panunsi, mantaminlari patelelabe, junsi Diosichi mantate pamin joyoe timinlabe itsanlatie:

—In tsachica totetuntsan joe latie. Yari chiquilachi Miya Diosi pasa tica junca paca joe latie.

17 Junni weyan unicalari wiruito, junte jaca jun tsachilabe itsanlatie:

18 —Ezequías Judá tobi miya jono mate Miqueas mumun tsachiri Moreset pueblobi nechi jato, Judá tobi chumin israelítalaca Miya Diosichi tenchi pabi janue. Yari itsantinue: Titiya jera quino poden Miya Diosi nulabe itsantinae tinue: Sion dubi Jerusalén pueblo joe; yaca jera yucapiyarica jun ino joe. Jun dubi ya itochunae; to buleca jun cuwenta jochunae. Pueblori tape ducarica cuwenta epe jochunae. Amana mate Diosichi ya chunun du nacate jun mate jera tsalaichunae tinae tinue. 19 Junni miya Ezequías, junsi yachi tsachila, yaca meráto, ¿Miquéaca totelaquin? jun tsantica jonun tenchi. Tsanlaquitunue; totetulajonue. Ya miyari Miya Diosica jelerato, laquirasa panhanue. Junnan Miya Diosiri laquirato, casticaquitunue tsanqueyanae tica jotonan. Ezequíalari Miquéaca totelaquitunue. ¿Junni chiquilari Jeremíaca totecaichunan? tsan jonun tenchi. Yaca toteno duque seiton jochunae tilatie.