Miya Sedequías Jeremíaca donunca
32
Junni miya Sedequías Judá tobi chunca wata mantanasa, Miya Diosi la Jeremíabe manaman panue israelítalabe manpasa. Miya Nabucodonosor chunca ochu wata Babilóniabi mantanasa tsanque pae. 2 Junni jun malate miya Nabucodonosor yachi soldadolaca Jerusalén puebloca manaman quera quisa ereca jominhe. Junnasa la Jeremíari Diosichi mantate pamin joto, chiquilachi miyachi yabi donun selate do chumanyoe.3 Judá to miya Sedequías laca dosa ereca jominhe yaca Diosichi mantate paca jonun tenchi. Diosi paca fiquica Sedequíabe itsanque paca jomanyoe: Miya Diosi itsantinae: Jerusalén puebloca Babilonia to miyaca tsacumin isa cariyanae tinae tiyoe. 4-5 Miya Sedequíanan sujino podeituchunae tinae. Nabucodonosor, ya babilónialachi miya, yari yachi soldadolaca ereto, Sedequíaca casa carito, Babilóniaca petanjichunae tinae. Junbi Babilonia miyabe cale cale quirato cuenta quichunae. Junni junbi la Miya Diosi pano fecári chuchunae tinae. Nula israelítalari babilónialabe duque sonba quicaalaquitonan, fe lono podeilaituchunae tinae. La Miya Diosi tsantinayoe tinae tiyoe.
Junni la Jeremías Diosichi fiquica tsanque polarinun tenchi miya Sedequías laca doca jominhe.
Miya Diosi Israelítalabe casan trato queyanae tinunca
36 Junni nanni fe wanbile israelítalachi Miya Diosi la Jeremíabe itsantie: Israelítala cuenta quiminla joe tie Babilonia to miyari yachi soldadolaca ereto, in Jerusalén puebloca quera quisa carichunaeque. Junsi inte chuminla ano mochi, quiyanchi padeseilaichunaeque cuenta quiminla joe tie. Junsi Babilonia to miyari chiquilaca jera mantachunaeque cuenta quiminla joe tie. Junni ya fiquiri jera tsa patino josanan, israelítalachi Diosi in puebloca man fiquinan capánae. Yari itsantinae: 37 Inte nechi do tanjica jun israelítalaca manaman inte manlayaisa cariyanae tie. Yalaca duque paito ereto, uyanlachi tobi chusa cariyanae. Manca tobi, manca tobi chusa cariyanae. Juntonan manjasa carito, inte pansi manchularasa cariyanae tie.
38 Yalari lachi tsachila jolajochunae; lari yalachi Diosi joanae tie. 39 Yalaca uyan tenca pun josa cariyanae tie yape numatotiya laca jelerato respetailaisa, junsi lachi minubi nenano munaralarasa. Junni tsanque nenalaratori, sequesiri chularachunae. Junsi yalachi alicalanan seque chularachunae. 40 Yalabe manca trato quino joyoe tie jeraitumin trato. Ya trato itsanque jochunae: Yalachi tenchi sen quinoca puratuanae; yalaca labe seque mantaino muna pun suwanae tie yape laca respetaito jeleralarasa. Numatotiya laca puratusa cariyanae tie. Tsanque casan trato israelítalabe queyanae tie.
Miya Diosi la Jeremíabe tsanque cuenta quee yape israelítalabe manpasa.