Moca respetaino jonunca
26
Fu mate wa suwa quinari, wepanantsan jochunae. Junsi puca cano mate suwa quinari, seitochunae. Jun tsanquenan tenca iton tsachi jonari, minlaca cuwenta respetaituntsan jochunae.Epele yucaquinoca
2 Quimi tsanla chuditumin joe. Jun tsanquenan sen tsachilaca epele yucaquilaquinari, yucaquica fiqui ya tsachilachibi chudituchunae.
Tenca itonla
3 Caluca seque jisa tenjanari, chide nacá tano joe. Junsi buroca seque jisa tenjanari, freno pono joe. Jun tsanquenan tenca itonca seque nenasa tenjanari, asota quino joe.
4 Tenca iton tsachibe ya cuwenta beco patuna! Tsantitori, nunan tenca iton cuwenta pejochunae.
5 Junni tenca itonbe beco pánato, minbe cuwenta patuna! Tsanque panari, tenca itonni min joyoeque tenhichunae.
6 Tsachi manca uyanlachi ticatiya cuwasa, tenca itonbe eretori, tencachique nedeca porenun cuwenta jochunae. Jun wanbileri problema jochunae.
7 Jancanni seque nenachi titonan, seque jituchunae. Jun tsanquenan tenca itonni min cuwenta seque pachique tenfenasanan, se patituchunae.
11 Susulari catsa quitonan yanan manfibi jamanhe. Jun tsanquenan tenca itonlari seiton cosaca manaman quilaquimanhe.
12 Tenca itonlaca ticatiya seque quichunaeque tenhituntsan joe.
Juntonan tenca itonlari seque quituminla jotonan, min joyoeque tenca caminlaca fe seque quilaquichunae.
Lan punla
13 Lan tsachiri trabaja quebi jituchique itsantichunae: Jino podeitiyoe; minute luquela jinachunae tichunae.
14 Bisacrabi tamoperi manchi manchi wemanhe. Jun cuwenta lan tsachiri yachi lowabi man tala man tala lecapolemanhe.
15 Lan tsachiri nidabi tedechi ano cachunae. Juntonan ano finaminnan cansaichunae.
Seiton cuenta polariminla