Caque fiqui: Salmo pila israelítalachi canta quinun pila jominue. Yalari Diosica se tinato, o Diosibe rocainato, in pilaca canta quimin jominlanue. Amana mate natiya miituntsan joe niyaque tono jomin jonunca. Juntonan fiquiri catalarayoe Diosichi pilabi.

Miya David duque salmo chutenue. Junsi weyan salmoca uyan israelítalanan pechutelaquinue. Weyan salmochiri Diosica se tinun joe. Weyan salmochiri Diosibe rocainun joe salmo quiminca manse larisa. Weyan weyanni sonba rocainun joe yape Diosi seitonlaca casticaquisa. Weyan salmochiri Diosibe acradeseinun joe salmo quiminbe sen joeque.

Jesucristo naino mili wata cajosanan Salmo pilaca quilaquinue. Juntonan weyan salmo Jesucrístoca paminla joe. Salmo 16:10-bi itsantie: Nuri lachi tencaca puyan ocolachibi natiya puratuchunae. Junni miya Daviri ya pilaca chutenato, tencachiqueca patunue; Jesucrístoca pánaminue Diosi yaca mansoncarichunaeque.